មូលហេតុដែលទូរស័ព្ទស៊ីលុយអស់ពីស៊ីម គឺមកពីមុខងារ Automatic Downloads ទាំង ៣ ក្នុង App Store (App Downloads, App Updates, និង In-App Content) លួចប្រើអ៊ីនធឺណិតដើម្បីទាញយកទិន្នន័យទំហំធំដោយស្វ័យប្រវត្តិ ទោះអ្នកមិនបានប្រើទូរស័ព្ទក៏ដោយ។
១. App Downloads (ការទាញយកកម្មវិធី)
នៅពេលអ្នកទិញ ឬទាញយក App ថ្មីនៅលើ iPad ឬ iPhone ផ្សេងទៀតដែលប្រើ iCloud តែមួយ វានឹងមកដំឡើងលើទូរស័ព្ទនេះដោយស្វ័យប្រវត្តិ។ ហើយបើ App នោះមានទំហំធំ វានឹងទាញយកភ្លាមៗ ដែលធ្វើឱ្យអស់ទិន្នន័យអ៊ីនធឺណិតលឿន។
២. App Updates (ការធ្វើបច្ចុប្បន្នភាពកម្មវិធី)
កម្មវិធីទាំងអស់ក្នុងទូរស័ព្ទអ្នក វានឹង Update ទៅជំនាន់ថ្មីដោយខ្លួនឯងរាល់ពេលមានកំណែអាប់ដេតពីកម្មវិធីណាមួយ។ ដូច្នេះហើយនេះជាអ្នកដែលស៊ីលុយធំបំផុត ព្រោះកម្មវិធីនីមួយៗពេលខ្លះ Update ម្តងៗដល់ទៅរាប់រយ MB ឬ GB ក៏មានដែរ។
៣. In-App Content (មាតិកាក្នុងកម្មវិធី)
វាអនុញ្ញាតឱ្យកម្មវិធីដំណើរការនៅពីក្រោយ (Background) ដើម្បីទាញយកទិន្នន័យទុកមុន មុនពេលអ្នកបើកវាប្រើ។ មានន័យថាវាធ្វើឱ្យទូរស័ព្ទអ្នករវល់ទាញយកទិន្នន័យរហូត ទោះបីអ្នកមិនទាន់ចុចបើក App ហ្នឹងក៏ដោយ។
របៀបចូលបិទទៅកាន់ការកំណត់ (សម្រាប់ iPhone/iPad)
- បើកកម្មវិធី Settings នៅលើទូរស័ព្ទរបស់អ្នក។
- អូសចុះក្រោមបន្តិច រួចស្វែងរកពាក្យថា App Store។
- ត្រង់ផ្នែក Automatic Downloads សូមចុចបិទឱ្យចេញពណ៌ប្រផេះលើ៖ App Downloads, App Updates, In-App Content ។
