បអរសាទរ ដល់កីឡាករកម្ពុជា ត្រា ឆានី (Skynin) ទទួលបានមេដាយមាស ក្នុងវិញ្ញាសា E-Sport Pubg Mobile ឯកត្តជន ឬហៅថា Solo ដែលមានការចូលរួមប្រកួតពីបណ្តាប្រទេសទាំង ១០ នៃព្រឹត្តិការណ៍ស៊ីហ្គេម ២០២៣ លើកទី៣២ ដោយ Skynin ទទួលបាននពន្ទុសរុបទាំង ៨វគ្គ គឺ ៨៤ពិន្ទុ ។
សម្រាប់ការប្រកួតវិញ្ញាសា E-Sport: Pubg Mobile ឯកត្តជន នេះដែរ បានប្រព្រឹត្តិឡើងនៅថ្ងៃទី១៥ ខែឧសភា ឆ្នាំ២០២៣ ដោយការប្រកួតតម្រូវឲ្យមាន Match 8 ឬ ៨វគ្គ ដោយមានការចូលរួមបេក្ខជនទាំង ១០ប្រទេស សរុប ៥៩នាក់ ហើយក្នុងការប្រកួតនេះតម្រូវឲ្យ លេងជាលក្ខណ: Solo ។
ជាលទ្ធផល ក្រោយបញ្ចប់ការប្រកួតយ៉ាងក្តៅគគុក ទាំង ៨វគ្គរួចមក កីឡាករកម្ពុជា ត្រា ឆានី ហៅថា Skynin ទទួលបានពិន្ទុសរុប ៨៤ពិន្ទុ ដោយយកឈ្នះបេក្ខជនទាំង ៥៩នាក់ មកពីប្រទេសទាំង ១០ ទទួលបានមេដាយមាស ដំបូងគេបង្អស់ក្នុងប្រវត្តិសាស្រ្ត នៃកីឡា E-sport: Pubg Mobile ឯកត្តជន(solo)។
ពីក្រុមការងារចាប់ខៀវពិតជាមាន មោទកភាពខ្លាំងមែនទែនចំពោះកីឡាករកម្ពុជាយើង ដែលបានយកមេដាយមាស ជូនឲ្យប្រទេសកម្ពុជា ១ គ្រឿងទៀត ហើយក៏អរគុណដល់កីឡាករកម្ពុជា ៥នាក់ទៀតដូចជា JOSETH, NANGX, THETOP, POVPOV និង KAIYA ដែលបានចូលការប្រកួតវិញ្ញាសាឯកត្តជននេះ ទោះជាលទ្ធផលយ៉ាងណាក្តី តែពួកគាត់សុទ្ធសឹងជាកីឡាករឡើងប្រកួតតំណាងឲ្យប្រទេសកម្ពុជាទាំងមូល និងប្រជាជនជាង ១៦លាននាក់ផងដែរ៕
រូបភាព៖ PUBG Mobile Esports Cambodia
អត្ថបទដោយ៖ ព្រឹម ភក្តី
