កាលពីដើមខែកន្លងទៅក្រុមហ៊ុន Samsung បានធ្វើការបញ្ចេញកំពូលទូរស័ព្ទកម្លាំងខ្លាំងរបស់ខ្លួនគឺ Galaxy Z Fold 4 ជាមួយនឹង Galaxy Z Flip 4 ហើយថ្មីៗនេះបើយោងទៅតាមការចុះផ្សាយរបស់ Digital Trend បានឱ្យដឹងថា អតិថិជនម្នាក់បានធ្វើការទិញ Galaxy Z Fold 4 ចេញពីក្រុមហ៊ុនថ្មីសន្លាងតម្លៃខ្ទង់2ពាន់$ តែជាអកុសលមិនទាន់បានប្រើផងក៏ខូចបាត់។
ប្រភពដដែលក៏បានបន្តថាម្ចាស់ទូរស័ព្ទបានធ្វើការផុសនៅលើបណ្តាញសង្គម Reddit ដោយបានបញ្ជាក់ថា Galaxy Z Fold 4 ដែលគាត់ទើបតែទិញថ្មីនេះគឺយកមកបើកបានតែម្តងគត់ហើយក៏ឮសូរសំឡេងប្រេះបែកនៅចំខ្សែបន្ទាត់កណ្តាលតែម្តង ប៉ុន្តែចំពោះការបែកនេះមិនមែនធ្វើអ្វីមិនកើតទាំងស្រុងនោះទេពោលគឺនៅអាចតេទៅ Samsung Support Center បាន។
យ៉ាងណាមិញចំពោះបញ្ហាបែកអេក្រង់ទូរស័ព្ទតម្លៃខ្ទង់2ពាន់$នេះ គឺមិនទាន់ធ្ងន់ធ្ងរនៅឡើយទេដោយគេបានរកឃើញថា វាខូចខាតតែចំពោះបន្ទះ UTC(ultra-thin-glass) តែប៉ុណ្ណោះ ដែលវាគឺជាស្រទាប់ឬក៏បន្ទះអេក្រង់ស្តើង។ លើសពីនេះទៅទៀតបញ្ហាមួយនេះក៏មិនមែនជាលើកទីមួយរបស់ក្រុមហ៊ុន Samsung នោះដែរព្រោះកន្លងមកក៏ធ្លាប់កើតនៅលើ Fold 2 និង Fold 3 ដែរ។
គូសបញ្ជាក់ផងដែរថា សម្រាប់បញ្ហាមួយនេះគឺមិនមែនកើតឡើងរហូតចំពោះទូរស័ព្ទបត់នោះទេពោលគឺវាមានភាគរយតិចណាស់ដែលកើតឡើងលើអតិថិជន។
អត្ថបទដោយ៖ រិន មករា
