នេះជាឡានអគ្គិសនី Polestar 4 ប្រភេទ SUV ដែលត្រូវបានយកទៅបង្ហាញនៅឯ Auto Shanghai 2023 នៃប្រទេសចិន កាលពីពេលថ្មីៗនេះ ។ អ្វីដែលប្លែកចំពោះឡាននេះ យើងឃើញថាទ្វារក្រោយរបស់ឡានគឺមានកញ្ចក់ទេ តែជំនួសមកវិញជាកាមេរ៉ាគុណភាព អាចមើលបានប្លង់ទូលាយ បានយ៉ាងធំ។
យោងតាមប្រភពពី Techcrunch បានឲ្យដឹងថា Polestar 4 ត្រូវបានបំពាក់មកជាមួយនឹងកាមេរ៉ា១២ គ្រាប់ និង Sensor ចំនួន ១២ គ្រាប់ដែលមានសមត្ថភាពខ្លាំងមែនទែន ជំនួយដល់ប្រព័ន្ធសុវត្ថិភាព ដូចជា មុខងារ ADAS , ការចូលចំណតដោយ Auto ដែលហៅថា Pilot Park និងការចាប់សញ្ញានៅពេលឡានប្តូរគន្លងផ្លូវ Lane Change assistance ជាដើម។
ហើយអ្វីដែលគួររំភើបមួយទៀតនោះ គ្រប់ព័ត៌មានដែលផ្តល់តាមរយ:អេក្រង់ infotainment ត្រូវបានដំណើរការដោយ Android Automotive OS និងប្រើជាមួយនឹងឈីប Snapdragon Cockpit Platform របស់ក្រុមហ៊ុន Qualcomm ដែលមានសមត្ថភាពអាចអូសនូវកម្មវិធីជាច្រើនលើ អេក្រង់ 15.4 អ៊ីញបានយ៉ាងរលូត ដូចជាប្រើជាមួយកម្មវិធី Apple CarPlay និង Android Auto ជាដើម។ ហើយមួយវិញទៀត គឺយើងអាចបញ្ជារដោយប្រើ Voice Control តាមរយ: Google Assistant បានថែមទៀតផង ។
យ៉ាងណាមិញ សម្រាប់ឡានអគ្គិសនី Poloster 4 ត្រូវបានបំពាក់មកជាមួយនឹងម៉ូទ័រអគ្គិសនីកម្លាំង 554 hp និងអាគុយទំហំ 102KWh អាចទ្រាំទ្របានចម្ងាយផ្លូវ 482Km នៅពេលសាកថ្មពេញម្តង ។ Polestar 4 អាចជាន់ល្បឿនស្ទុះពី 0 ទៅ 100Km/h ចាយពេលតែ 3.8s តែប៉ុណ្ណោះ ។
គូសបញ្ជាក់ផងដែរថា ឡានអគ្គិសនី Polestar 4 គ្រោងនឹងចេញលក់នៅខែវិច្ឆកា ឆ្នាំ២០២៣ នៅលើទីផ្សារប្រទេសចិន និងចំណែកឯ ទីផ្សារអ៊ឺរ៉ុប អាមេរិក និងអាស៊ីប៉ាស៊ីហ្វិក នៅដើមឆ្នាំ២០២៤ ហើយចំពោះតម្លៃរបស់ឡានអគ្គិសនីនេះ គឺខ្ទង់ ៦ម៉ឺនដុល្លារតែប៉ុណ្ណោះ ៕
អត្ថបទដោយ៖ ព្រឹម ភក្តី
