តាមរយៈការបង្ហោះរបស់ The nation បានចុះផ្សាយថា​ នាយករដ្ឋមន្ត្រីថៃ ផែថងថា ឈីណាវ៉ាត់ បានបញ្ជាក់ថាពី ស្ថានភាពរញ្ជួយដីត្រូវបានដោះស្រាយហើយកាលពីល្ងាចថ្ងៃសុក្រ ដោយនិយាយថា ប្រជាជនអាចត្រឡប់ទៅផ្ទះវិញបានហើយ។ បន្ទាប់ពីកិច្ចប្រជុំស្តីពីការត្រួតពិនិត្យការរញ្ជួយដីនៅស្ថានីយ៍អាកាសយោធាទី 2 ក្នុងស្រុកដនមឿង នាយករដ្ឋមន្ត្រីថៃបានលើកឡើងថា អគារដែលកំពុងសាងសង់នៅក្នុងទីក្រុងបាងកកបានរងផលប៉ះពាល់ដោយសារការរញ្ជួយដី។

ដោយដកស្រង់សំដីពីនាយកដ្ឋានឧតុនិយមថៃបានពន្យល់ថា ការរញ្ជួយដីនេះមានចំណុចកណ្តាលនៅទីក្រុងម៉ាន់ដាឡេ ប្រទេសមីយ៉ាន់ម៉ា។ នាងបានកត់សម្គាល់ថា ការរញ្ជួយដីបន្តបន្ទាប់បានកើតឡើងចំនួន 12 ដង ដែលបណ្តាលឱ្យមានផលប៉ះពាល់ដល់ប្រជាជននៅទីក្រុងបាងកក និងភាគខាងជើង។ នាយករដ្ឋមន្ត្រីថៃ ផែថងថា ឈីណាវ៉ាត់ បានសង្កត់ធ្ងន់ថា ប្រជាជនអាចចូលអគារស្នាក់នៅ ឬធ្វើការវិញបានហើយ ដោយសាររញ្ជួយដីមានកម្រិត ៤.៩ រ៉ិចទ័រ ដោយបានបញ្ជាក់ថា នឹងមិនមានរលកយក្សស៊ូណាមិទេ ដោយសារការរញ្ជួយដីកើតឡើងលើដីគោក។

ថៃរំពឹងថា ប្រព័ន្ធដឹកជញ្ជូនរហ័ស BTS និង MRT នឹងចាប់ផ្តើមដំណើរការឡើងវិញនៅព្រឹកស្អែក។ ក្រសួងដឹកជញ្ជូនបានបង្កើនចំនួនជើងរថយន្តក្រុងសាធារណៈ ដើម្បីជួយសម្រួលដល់ការធ្វើដំណើររបស់ប្រជាជន។ ប្រជាជនដែលបារម្ភអំពីសុវត្ថិភាពលំនៅឋានរបស់ពួកគេអាចធ្វើដំណើរទៅកាន់ឧទ្យានសាធារណៈដែលមានទឹកនិងអាហារផ្តល់ឲ្យផងដែរ។ 
ទាក់ទងនឹងការដួលរលំអគារការិយាល័យសវនកម្មរដ្ឋដែលកំពុងសាងសង់នៅក្នុងខណ្ឌចតុចក្រ លោកស្រីប៉ែតុងតានបានមានប្រសាសន៍ថា ការជម្លៀសអ្នកដែលជាប់ក្នុងគំនរកំពុងដំណើរការបន្តថែមទៀត និងរងចាំការអាប់ដេតជាបន្ត។

សម្រួលអត្ថបទឡើងវិញដោយ : ងួន ឃុនណា