ថ្មីៗ ទីផ្សារឡានអគ្គិសនីហក់ដូចជាកំពុងតែមានប្រជាប្រិយភាពយ៉ាងខ្លាំងពីសំណាក់មនុស្សជាតិជុំវិញពិភពលោក ហើយនាថ្ងៃអនាគតឡានដែលប្រើប្រេងសាំងនឹងដាច់ពូជសាបសូន្យចេញពីផែនដីនៅឆ្នាំ២០៥០ ដែលសភាអឺរ៉ុបបានដាក់ផែនការយ៉ាងជាក់ច្បាស់ ដោយតម្រូវឲ្យក្រុមហ៊ុនឡានទាំងអស់លើពិភពលោក ផលិតតែឡានអគ្គិសនី ឬប្រភេទឡានដែលគ្មានការបំពុលដូចជាឧស្ម័នកាបូនិចជាដើម។
ជាក់ស្តែងកាលពីពេលថ្មីៗនេះ ក្រុមហ៊ុនស្តេចឡាន Performance របស់ជប៉ុន Nissan ទើបតែបានបង្ហាញនូវ concept ឡានអគ្គិសនីអនាគត មានរូបរាងដ៏អស្ចារ្យ ដោយបានដាក់បង្ហាញនៅទីស្នាក់ការកណ្តាលរបស់ខ្លួន Nissan Global Headquarters ក្នុងទីក្រុង Yokohama ប្រទេសជប៉ុន កាលពីសប្ភាហ៍មុន។ នេះបើយោងតតាមប្រភពពី The Verge ។
ចំពោះឡានអនាគតដែលអ្នកទាំងអស់បានឃើញនេះ មានឈ្មោះថា Nissan MAX-OUT វាជាឡានគំរូនៅអនាគត ដោយបានរចនាឡើងយ៉ាងអស្ចារ្យ គំនិតច្នៃប្រឌិតយ៉ាងសម្បូរបែប ជាពិសេសរូបរាងខាងក្រៅ មានលក្ខណ:ប្លែកពី Concept ឡានក្រុមហ៊ុនដទៃឆ្ងាយ គ្មានបៀតសូម្បីតែបន្តិច។ រីឯផ្នែកខាងមុខរបស់នេះ មានរាងមូលទ្រវែង ដូចនឹង Concept ឡាន Pick up របស់ខ្លួនដែរ ឈ្មោះថា Surf-out សូម្បីស្តុបក្រោយមានភាពស្រដៀងគ្នាដែរ។
ដោយឡែកខាង Nissan គាត់បានបញ្ចេញនូវ Concept ឡានអគ្គិសនី ច្រើនមែនទែនដល់ទៅ ៤ គ្រឿងឯណោះ សម្រាប់អនាគតមនុស្សជាតិដែលរស់នៅតាមបែបសម័យវិទ្យាសាស្ត្រទំនើប ហើយឡានអនាគតទាំង ៤ គ្រឿងនោះ ទី១ជា ឡានប្រភេទ SUV ឈ្មោះថា Hang-out ដែលមើលក្នុងរូបភាពទំនងជាអាចបើកបរដោយស្វ័យប្រវត្តិបាន ហើយទី២ ជាឡានប្រភេទ Crossover មានឈ្មោះថា Chill-Out រូបរាងឡាននេះស្លីមមែនទែន ផ្នែកខុសគ្នានឹង Concept ឡានដទៃ តែស្តុបក្រោយ គឺដូចគ្នាទេ។
ចំណែកឯទី៣ នោះជាឡានប្រភេទ Pick up ដែលបាននិយាយខាងលើអ៊ីចឹង ហើយចុងក្រោយគេនោះ គឺជា Nissan Max-Out នេះឯង។
គួរជំរាបផងដែរ សម្រាប់ការចំណាយលើការផលិតឡានអគ្គិសនី អនាគតទាំង ៤ គ្រឿងនេះ Nissan ត្រូវចាយលុយប្រមាណជា 17.7ពាន់លានដុល្លារសហរដ្ឋអាមេរិក ។ ហើយ Nissan ក៏បាននិយាយទៀតថា ខ្លួននឹងផលិតឡានអគ្គិសនីលក់ឲ្យបាន ១៥ ម៉ូដែល ត្រឹមឆ្នាំ២០៣០៕
អត្ថបទដោយ៖ ព្រឹម ភក្តី
