នៅក្នុងប្រព័ន្ធប្រតិបត្តិការ iOS 27 ក្រុមហ៊ុន Apple នឹងដាក់ឱ្យប្រើប្រាស់នូវក្របខ័ណ្ឌការងារថ្មីមួយហៅថា Trust Insights ដែលមានតួនាទីជួយផ្តល់ដំណឹងទៅកាន់កម្មវិធីផ្សេងៗនៅពេលរកឃើញថាអ្នកប្រើប្រាស់អាចនឹងកំពុងធ្លាក់ក្នុងអន្ទាក់នៃការបោកប្រាស់។ Apple បានពន្យល់ថា ករណីបោកប្រាស់បែបលួងលោមផ្ដល់ទំនុកចិត្តដូចជា ការបន្លំខ្លួនធ្វើជាផ្នែកជំនួយបច្ចេកទេស ការបន្លំជាសមត្ថកិច្ច ឬការបង្កើតរឿងអាសន្នគ្រួសារ កំពុងតែកើនឡើងយ៉ាងខ្លាំងដោយសារបច្ចេកវិទ្យា AI Deepfakes ហើយវាមានភាពពិបាកក្នុងការចាប់សញ្ញាណាស់ ព្រោះជនរងគ្រោះជាអ្នកចុចបញ្ជាប្រតិបត្តិការដោយខ្លួនឯងទាំងស្រុង។
ដើម្បីដោះស្រាយបញ្ហានេះប្រព័ន្ធ Trust Insights នឹងដំណើរការស្កេនផ្ទាល់នៅលើម៉ាស៊ីនទូរស័ព្ទ ដោយផ្តោតលើការវិភាគទៅលើទម្រង់នៃការប្រកបសកម្មភាព ពេលវេលា បរិបទជុំវិញ និងទិន្នន័យឧបករណ៍ចាប់សញ្ញាមូលដ្ឋាន។ ប្រសិនបើប្រព័ន្ធរកឃើញសញ្ញាណាមួយដែលបង្ហាញថា អ្នកប្រើប្រាស់កំពុងត្រូវបានពួកបោកប្រាស់ណែនាំ ឬបង្គាប់បញ្ជាឱ្យធ្វើសកម្មភាពនោះ វានឹងកំណត់កម្រិតហានិភ័យទៅជា មធ្យម ឬខ្ពស់ ដែលអនុញ្ញាតឱ្យកម្មវិធីទូរស័ព្ទ (ដូចជា App ធនាគារ) បន្ថែមសារព្រមាន ពន្យារពេលប្រតិបត្តិការ ឬទាមទារការផ្ទៀងផ្ទាត់បន្ថែមភ្លាមៗ Sage។
ទាក់ទងនឹងការរក្សាការសម្ងាត់ក្រុមហ៊ុន Apple បានបញ្ជាក់យ៉ាងច្បាស់ថា Trust Insights មិនចូលទៅពិនិត្យមើលខ្លឹមសារនៅក្នុង Photos, Messages ឬ Mail របស់អ្នកឡើយ។ វានឹងវិភាគតែសញ្ញាឥរិយាបថនៅលើម៉ាស៊ីន រួចលុបទិន្នន័យដើមចោលភ្លាមៗ ដោយបញ្ជូនទៅកាន់ Server របស់ Apple តែតម្លៃលទ្ធផលចុងក្រោយមួយគត់ ដើម្បីយកទៅផ្ទៀងផ្ទាត់ជាមួយគណនី Apple Account ក្នុងការវាយតម្លៃចុងក្រោយថាតើវាជាករណីបោកប្រាស់ពិតប្រាកដឬអត់។
ជាចុងក្រោយ ទោះបីជាអ្នកប្រើប្រាស់មានសិទ្ធិអាចបិទមុខងារ Trust Insights នេះនៅក្នុងការកំណត់ក៏ដោយ ក៏ប្រព័ន្ធនឹងមានយន្តការពន្យារពេលបិទជាបណ្តោះអាសន្នផងដែរ។ ការធ្វើបែបនេះ គឺដើម្បីការពារសុវត្ថិភាពដល់អ្នកប្រើប្រាស់ ក្នុងករណីដែលពួកគេត្រូវបានពួកបោកប្រាស់ ល្បួង ឬបង្ខំចិត្តឱ្យចូលទៅបិទមុខងារការពារនេះដោយខ្លួនឯង។
