ថ្មីៗនេះមានការបែកធ្លាយពព័ត៌មានលម្អិតអំពីនាឡិកាឆ្លាតវៃជំនាន់ថ្មីរបស់ Huawei គឺ Watch GT 5 និង Watch GT 5 Pro ត្រូវបានបង្ហាញតាមរយៈស្ថាប័នបញ្ជាក់គុណភាពផ្សេងៗ ដែលម៉ូដែលថ្មីទាំងនេះជាមូដែលបន្តពីស៊េរី Huawei Watch GT 4។
ស៊េរី Huawei Watch GT 5 ត្រូវបានគេរកឃើញថ្មីៗនេះនៅ IMDA ក្រោមលេខម៉ូដែល VLI-B19 និង VLI-B29 ដែលត្រូវគ្នានឹង Huawei Watch GT 5 និង Watch GT 5 Pro យោងតាមការលេចធ្លាយពីមុន។នេះបញ្ជាក់ថា Huawei នឹងចេញម៉ូដែល Pro ម្តងទៀត ដែលមិនមាននៅឆ្នាំមុន។
នាឡិកាឆ្លាតវៃទាំងនេះក៏ត្រូវបានគេឃើញនៅស្ថាប័នបញ្ជាក់គុណភាពនៅប្រទេសចិន និងឥណ្ឌូនេស៊ី ជាពិសេស 3C និង SDPPI ដែលបានភ្ជាប់លេខម៉ូដែលទៅនឹងឈ្មោះរបស់វា។ ការបញ្ជាក់ពី TÜV ក៏ត្រូវបានគេកត់សម្គាល់ផងដែរ។
ដោយសារតែការបញ្ជាក់គុណភាពទាំងនេះ យើងមានព័ត៌មានលម្អិតដំបូងខ្លះអំពី Huawei Watch GT 5 និង Watch GT 5 Pro។ ទាំងពីរនឹងគាំទ្រ Bluetooth មានឧបករណ៍ចាប់សញ្ញាតាមដានសកម្មភាពផ្សេងៗ មានភាពធន់នឹងធូលីនិងទឹកជាមួយនឹងកម្រិតការពារ IP68 និងផ្តល់នូវការសាកថ្មល្បឿនលឿនរហូតដល់ 18 W។
ទោះយ៉ាងណាក៏ដោយ វានៅមិនទាន់ច្បាស់នៅឡើយទេថាតើ Huawei នឹងណែនាំមុខងារថ្មីអ្វីខ្លះជាមួយនឹងស៊េរី Watch GT 5។ មិនទាន់មានការប្រកាសកាលបរិច្ឆេទចេញផ្សាយផ្លូវការ ឬព័ត៌មានលម្អិតបន្ថែមនៅឡើយទេ។ ដោយសារតែជំនាន់ទីបួនត្រូវបានចេញផ្សាយប្រហែលមួយឆ្នាំមុន ហើយការលេចធ្លាយកាន់តែកើនឡើង Huawei Watch GT 5 និង GT 5 Pro ត្រូវបានគេរំពឹងថានឹងត្រូវបានបង្ហាញក្នុងពេលឆាប់ៗនេះ។