បច្ចុប្បន្នមានករណីជាច្រើនទាក់ទងជាមួយនឹងការ ហេកហ្វេសប៊ុក ដោយអ្នកខ្លះអាចបាត់បង់ត្រឹមគណនីរីឯអ្នកខ្លះទៀតឈានដល់ការបាត់បង់លុយកាក់រាប់ម៉ឺនដុល្លារក៏មាន ដោយបញ្ហាទាំងអស់នេះគឺដោយសារតែយើងជាអ្នកប្រើប្រាស់មានការធ្វេសប្រហេស ក៏ដូចជាមិនមានការការពារឲ្យបានត្រឹមត្រូវ។
ទាក់ទងជាមួយនឹងបញ្ហានេះខាង Facebook ក៏បានប្រាប់ពីមូលហេតុក៏ដូចជាល្បិចការពារមួយចំនួនផងដែរ។ ជាក់ស្តែងបញ្ហាដែលកើតឡើងកន្លងគឺគេហៅថា Phishing ដែលមានន័យថាជាការបោកបញ្ឆោតតាមរយៈការផ្ញើសារបង្កប់មេរោគ ឬលីងដែលអាចទាញយកព័ត៌មានសំខាន់ៗរបស់យើងជាដើម។
ដូច្នេះដើម្បីការពីបញ្ហាទាំងអស់នេះ Facebook បានប្រាប់រឿង៣ដែលអ្នកមិនគួរធ្វើដាច់ខាត៖
កុំជឿលើសារទាំងអស់នេះ
- ត្រូវការលុយ
- ឲ្យរង្វាន់ឬកាដូរផ្សងៗ
- គម្រាមលុបឬហាមឃាត់គណនីរបស់អ្នកលែងឲ្យប្រើប្រាស់
ក្នុងចំណុចនេះមានន័យថា ប្រសិនបើអ្នកណាផ្ញើសារមកកាន់អ្នកក្នុងទម្រង់ដូចជាការលុយចាំបាច់ ឬផ្ញើសារមកកាន់យើងក្នុងរូបភាពជាការផ្តល់រង្វាន់ឬយើងឈ្នះរង្វាន់អ្វីមួយ និងការផ្ញើសារមកកាន់យើងដោយប្រាប់ថា គណនីរបស់យើងត្រូវបានលុប ឬហាមឃាត់ជាដើម សូមកុំជឿឬកុំចុចលើលីងទាំងអស់នោះឲ្យសោះព្រោះវាអាចបង្កប់លីងមេរោគ។
គេហទំព័រផ្លូវការរបស់ហ្វេសប៊ុក
- fb.com
- facebook.com
- facebookmail.com
ដូច្នេះខាងលើនេះគឺជាគេហទំព័រផ្លូវការរបស់ហ្វេសប៊ុក ដែលមានន័យថា រាល់ការផ្ញើសារជូនដំណឹងផ្សេងៗគឺចេញពីគេហទំព័រទាំង៣ខាងលើ ហើយហ្វេសប៊ុក បានប្រាប់ថាប្រសិនបើមានគេហទំព័រផ្សេងដែលផ្ញើសារមកកាន់អ្នកហើយអះអាងថាជាភ្នាក់ងាររបស់ ហ្វេសប៊ុក សូមអ្នកកុំចុចលើសារក៏ដូចជាលីងទាំងអស់នោះអី។
កុំឆ្លើយតបសារទាំងអស់នេះ
- សុំលេខកូដហ្វេសប៊ុករបស់អ្នក
- សុំលេខសម្ងាត់ផ្សេងៗ
- ព័ត៌មានអំពីកាតធនាគាររបស់អ្នក
ក្នុងចំណុចចុងក្រោយនេះមានន័ថា ប្រសិនបើមាននរណាម្នាក់ផ្ញើសារមកដោយគេត្រូវការលេខសម្ងាត់ឬព័ត៌មានផ្សេងៗពីយើង នោះយើងមិនគួរតបក៏ដូចជាផ្តល់ព័ត៌មានណាមួយទៅវិញនោះទេ។
សរុបមក៣ចំណុចខាងលើគឺសុទ្ធសឹងតែជាវិធីសាស្រ្តដែលពួក Hacker តែងប្រើប្រើប្រាស់ដើម្បីស្ទូចយកព័ត៌មានសំខាន់ៗរបស់អ្នករួចធ្វើការវាយប្រហាទៅលើគណនីរបស់អ្នកតែម្តង។ ហើយក្រៅពីនេះគឺនៅមានវិធីសាស្រ្តការពារជាច្រើនទៀតដូចជាការដាក់ 2FA ឬការសម្គាល់អត្តសញ្ញាណជាដើម។
អត្ថបទដោយ៖ រិន មករា
