ប្រភពដដែលបានឱ្យដឹងថា Google បានលុបកម្មវិធីចំនួន 180 ដែលពាក់ព័ន្ធនឹងការបន្លំការផ្សាយពាណិជ្ជកម្ម (មានការទាញយក ៥៦ លានដង) និងកម្មវិធីដែលមានមេរោគ Anatsa/Teabot។ ការគំរាមកំហែងថ្មីបំផុតគឺ KoSpy ដែលជាមេរោគចារកម្មដែលទាក់ទងនឹងក្រុម Hacker របស់កូរ៉េខាងជើង APT37 វាអាចលួចព័ត៌មាន SMS, កំណត់ហេតុការហៅ, ទីតាំង, ឯកសារ, អូឌីយ៉ូ, រូបភាពអេក្រង់ និងព័ត៌មានផ្សេងៗ។

KoSpy គឺជាស្ប៉ាយប៊រ (spyware) ដែលត្រូវបានបង្កើតឡើងដើម្បីប្រមូលព័ត៌មានពីឧបករណ៍របស់អ្នកប្រើប្រាស់ដោយគ្មានការអនុញ្ញាត។ វាអាចត្រូវបានដំឡើងដោយក្រុមមិនស្របច្បាប់ ឬតាមរយៈការទាញយកកម្មវិធីពីប្រភពដែលមិនទុកចិត្តបាន។ ស្ប៉ាយប៊រនេះអាចប្រមូលព័ត៌មានផ្ទាល់ខ្លួន រួមទាំងពាក្យសម្ងាត់ ព័ត៌មានហិរញ្ញវត្ថុ និងសកម្មភាពប្រើប្រាស់អ៊ីនធឺណិត។

KoSpy បានបំពាក់ខ្លួនជាកម្មវិធីដូចជា File Manager, Smart Manager, និង Kakao Security ហើយវាបានមាននៅតាំងពីឆ្នាំ ២០២២។ ទោះបីវាត្រូវបានលុបចេញពី Play Store ក៏ដោយ វានៅតែអាចរកបាននៅលើវេទិកាផ្សេងទៀត។ ក្រុមហ៊ុន Google បានដាស់តឿនឱ្យ អ្នកប្រើប្រាស់គួរលុបកម្មវិធីទាំងនេះ (ឧទាហរណ៍: File Manager, Smart Manager, និង Kakao Security ដែលមានបំពាក់ KoSpy) ភ្លាមៗ និងបើក Google Play Protect ជានិច្ច។

គួរជម្រាបផងដែរថា ការសិក្សាថ្មីពី UCL ក៏បានព្រមានអំពីគ្រោះថ្នាក់នៃការដំឡើងកម្មវិធីក្រៅ Play Store (sideloading) ជាពិសេសកម្មវិធីត្រួតពិនិត្យឪពុកម្តាយ “មិនផ្លូវការជាច្រើន” ដែលអាចប្រមូលទិន្នន័យផ្ទាល់ខ្លួនដោយសម្ងំ។ Google កំពុងធ្វើឱ្យ Play Protect កាន់តែមានប្រសិទ្ធភាព ប៉ុន្តែសេវាកម្ម sideloading នៅតែមានហានិភ័យខ្ពស់។ 

យ៉ាងណាមិញ សូមលោកអ្នកពិនិត្យមើល app នៅក្នុងទូរស័ព្ទដៃឡើងវិញ ហើយកុំទុកកម្មវិធីដែលមិនចាំបាច់ត្រូវប្រើច្រើនពេក។ ទន្ទឹមនឹងនោះ សូមប្រយ័ត្នជាមួយនឹងការទាញយកកម្មវិធីតាមពាណិជ្ជកម្ម ឬលីងដែលគ្មានប្រភពច្បាស់លាស់ ជំនួសដោយការស្វែងរកនៅលើ Play store ដោយផ្ទាល់ និងបើកប្រព័ន្ធសុវត្ថិភាពជាប្រចាំ៕