លោក ចាន់ថា ស៊ីណាត (Chantha Sinat) បច្ចុប្បន្នជានិស្សិតឆ្នាំទី ៣ នៅសាកលវិទ្យាល័យ លីមកុកវីង Limkokwing University។ នៅក្នុងគម្រោង GoLoca នេះ លោកទទួលបន្ទុកទៅលើការរៀបចំចក្ខុវិស័យយុទ្ធសាស្ត្រ និងការជម្រុញការរីកចម្រើនរបស់វេទិកាទាំងមូល។ ចំណែកឯលោក សំណាង សកល (Samnang Sakal) ជាសហស្ថាបនិក ដែលជាបេក្ខជនបញ្ចប់ការសិក្សាផ្នែកវិទ្យាសាស្ត្រកុំព្យូទ័រពីសាកលវិទ្យាល័យអន្តរជាតិផារ៉ាហ្គន Paragon International University។ លោកបានចូលខ្លួនមកបំពេញបន្ថែមលើផ្នែកបច្ចេកវិទ្យា ដោយសារលោកមានបទពិសោធន៍ស៊ីជម្រៅជាច្រើនឆ្នាំលើវិស័យហេដ្ឋារចនាសម្ព័ន្ធ FinTech, វេទិកាទូរស័ព្ទដៃ និងវិស័យពាណិជ្ជកម្មឌីជីថលជាដើម។

GoLoca App គឺជាកម្មវិធីទូរស័ព្ទដៃមួយ ដែលប្រមូលផ្តុំរាល់កន្លែងដើរលេង ហាងកាហ្វេប្លែកៗ និងហាងអាហារឆ្ងាញ់ៗនៅក្នុងប្រទេសកម្ពុជា មកដាក់នៅកន្លែងតែមួយ ដើម្បីកុំឱ្យយើងពិបាកចំណាយពេលដើររកមើលតាម Facebook ឬ TikTok ទៀត។ សម្រាប់អ្នកប្រើប្រាស់ វាជួយឱ្យអ្នកប្រើប្រាស់រកឃើញកន្លែងប្លែកៗ និងសម្រេចចិត្តបានលឿនថា «គួរទៅលេង ឬទៅញ៉ាំអីនៅឯណា»។ ចំណែកឯសម្រាប់ម្ចាស់អាជីវកម្មក្នុងស្រុកវិញ App នេះជួយផ្សព្វផ្សាយហាងរបស់ពួកគាត់ឱ្យមនុស្សស្គាល់កាន់តែច្រើន និងមានឧបករណ៍បច្ចេកវិទ្យាសម្រាប់គ្រប់គ្រងហាង និងដាក់ប្រម៉ូសិនទាក់ទាញអតិថិជនផងដែរ។ និយាយឱ្យខ្លី GoLoca គឺជា App ជំនួយការឆ្លាតវៃ បើកមើលភ្លាម ដឹងភ្លែតថាមានកន្លែងណាឡូយៗជុំវិញខ្លួនយើង។

GoLoca ត្រូវបានបើកដំណើរការផ្តើមជាផ្លូវការនៅចុងខែវិច្ឆិកា ឆ្នាំ២០២៥ កន្លងទៅនេះ នៅពេលដែលរូបលោកទាំងពីរបានយកគំនិតស្នូលមកច្នៃឱ្យចេញជារូបរាង។ ចាប់តាំងពីពេលនោះមក រហូតមកដល់ពេលបច្ចុប្បន្នពោល គឺនៅក្នុងខែឧសភា ឆ្នាំ២០២៦ នេះ រូបលោកទាំងពីរបានចំណាយពេល និងកម្លាំងចិត្តទាំងស្រុងក្នុងការរួមបញ្ចូលគ្នារវាងចំណុចខ្លាំងផ្នែកអាជីវកម្ម និងបច្ចេកវិទ្យា ដើម្បីបង្កើត កែលម្អ និងត្រៀមលក្ខណៈជាស្រេចក្នុងការដាក់ដំណើរការវេទិកាមួយនេះក្នុងគោលបំណងផ្លាស់ប្តូរប្រព័ន្ធអេកូឡូស៊ីឌីជីថលនៅក្នុងស្រុកឱ្យកាន់តែប្រសើរឡើង។

លោក ចាន់ថា ស៊ីណាត បានបង្ហាញពីគំនិតបង្កើត GoLoca នេះ គឺកើតចេញពីការធុញទ្រាន់នឹងបញ្ហាសាមញ្ញៗដែលមនុស្សជួបប្រទះរាល់ថ្ងៃ នោះគឺ ព័ត៌មានដែលនៅរាយប៉ាយ និងគ្មានសណ្តាប់ធ្នាប់ ដោយមិនមានលម្អិតច្បាស់លាស់ពីរបស់អ្វីមួយ មានន័យថាបច្ចុប្បន្ននេះនៅក្នុងប្រទេសកម្ពុជា ប្រសិនបើអ្នកចង់ស្វែងរកហាងកាហ្វេក្នុងស្រុកដ៏ទាក់ទាញមួយ កន្លែងដើរលេងលាក់ខ្លួនពីភ្នែកមនុស្ស ឬហាងអាហារថ្មីៗ អ្នកត្រូវចំណាយពេលរុករកច្រើនណាស់។ អ្នកត្រូវចូលមើលទំព័របណ្តាញសង្គមជាច្រើន ផ្លាស់ប្តូរពីកម្មវិធីមួយទៅកម្មវិធីមួយ ឬពឹងផ្អែកទាំងស្រុងលើការសាកសួរពីមាត់មួយទៅមាត់មួយ ដែលវាខាតពេលវេលាច្រើនណាស់សម្រាប់អ្នកប្រើប្រាស់។

ទន្ទឹមនឹងនេះហើយ ទើបរូបលោកទាំងពីរ សង្កេតឃើញមានគម្លាតដ៏ធំមួយសម្រាប់ អាជីវករក្នុងស្រុក។ មានអាជីវកម្មក្នុងស្រុកប្លែកៗ និងល្អៗជាច្រើនដែលមានផលិតផលដ៏អស្ចារ្យ ប៉ុន្តែពួកគាត់ខ្វះខាតឧបករណ៍ឌីជីថល និងឱកាសក្នុងការបង្ហាញខ្លួនដើម្បីទៅដល់អតិថិជនឱ្យបានទូលំទូលាយ។ នេះហើយជាកាតាលីកររបស់ស្ថាបនិកទាំងពីរ។ ជារួម គោលដៅ គឺជួយឱ្យអ្នកប្រើប្រាស់អាចសម្រេចចិត្តបានលឿន និងងាយស្រួលថាត្រូវទៅកន្លែងណា ហើយក្នុងពេលតែមួយ ក៏ជួយផ្តល់ឱកាសឱ្យអាជីវករក្នុងស្រុកមានមុខមាត់លើប្រព័ន្ធឌីជីថល និងមានឧបករណ៍បច្ចេកវិទ្យាដើម្បីរីកចម្រើនផងដែរ។ នេះបើតាមគំនិតរបស់លោក ចាន់ថា ស៊ីណាត និង លោក សំណាង សកល គឺចង់ឱ្យ GoLoca ក្លាយជា App តែមួយគត់ដែលមនុស្សគ្រប់គ្នាបើកមើលភ្លាម នៅពេលចង់ស្វែងរកអ្វីដែលល្អបំផុតនៅក្នុងសហគមន៍របស់ពួកគេ ដែលងាយស្រួលក្នុងការស្វែងរកកន្លែងលំហែអារម្មណ៍ទាំងជិត និងឆ្ងាយក្នុងប្រទេសកម្ពុជា។ 

បើនិយាយទៅដល់ចំណុចពិសេសេពីធនធានក្នុងការបង្កើត App មួយនេះឡើង ស្ថាបនិកទាំងពីររូបនេះបានប្រាប់ឲ្យដឹងថា គឺទាមទារការបែងចែកយុទ្ធសាស្ត្រច្បាស់លាស់ទាំងផ្នែកហិរញ្ញវត្ថុ និងធនធានមនុស្ស ហើយវាអាស្រ័យទៅតាមដំណាក់កាលនៃផលិតផល៖

• ចំពោះដើមទុនហិរញ្ញវត្ថុ៖ ដើម្បីបង្កើតត្រឹម MVP (Minimum Viable Product ដែលជាជំនាន់ដំបូងមានមុខងារស្នូលសម្រាប់សាកល្បងទីផ្សារ ជារួមត្រូវការទុនចន្លោះពី ២,០០០ ដុល្លារ ដល់ ៥,០០០ ដុល្លារ។ ប៉ុន្តែដើម្បីពង្រីកវាឱ្យទៅជាវេទិកាដែលមានសុវត្ថិភាពពេញលេញ មានការរចនាស្អាត និងរឹងមាំជាមួយមុខងារស្មុគស្មាញជាច្រើន ថវិកាអាចនឹងត្រូវចំណាយចន្លោះពី $១០,០០០ ដល់ $៣០,០០០+។
• សម្រាប់ធនធានមនុស្ស៖ ការមានក្រុមការងារគ្រឹះដ៏រឹងមាំគឺជារឿងសំខាន់បំផុត ទោះមានជំនាញខាង FinTech និង Mobile Infrastructure ក៏ដោយ ប៉ុន្តែដើម្បីពង្រីកខ្លួន យើងនៅតែត្រូវការពង្រីកក្រុមការងារបន្ថែម រួមមាន៖ UI/UX Designer (អ្នករចនាផ្ទៃកម្មវិធីឱ្យងាយស្រួលប្រើ), ក្រុម Frontend និង Backend Developers ដើម្បីអភិវឌ្ឍមុខងារកម្មវិធី និងក្រុមប្រតិបត្តិការ ដើម្បីចុះទៅទំនាក់ទំនង និងសហការជាមួយអាជីវករផ្ទាល់។
• ផ្អែកលើហេដ្ឋារចនាសម្ព័ន្ធ និងសម្ភារៈ៖ ក្រៅពីកុំព្យូទ័រដែលមានសមត្ថភាពខ្ពស់សម្រាប់សរសេរកូដ ថវិកាមួយផ្នែកធំត្រូវចំណាយទៅលើការចំណាយប្រចាំខែ ដូចជា Cloud Hosting/Servers ឧទាហរណ៍ AWS ឬ Google Cloud ដើម្បីរក្សាទុកទិន្នន័យដោយសុវត្ថិភាព, ការចុះឈ្មោះ Domain, និងគណនី Developer នៅលើ App Store និង Google Play Store ជាដើម។

ស្ថាបនិកទាំងពីររូបលោក​ ចាន់ថា ស៊ីណាត និងលោក សំណាង សកល បានបង្ហាញពីចក្ខុវិស័យធំ គឺចង់ឱ្យ GoLoca ក្លាយជា App តែមួយគត់ដែលមនុស្សគ្រប់គ្នាបើកមើល ដើម្បីស្វែងរក និងទទួលបានបទពិសោធន៍ពីកន្លែងល្អៗនៅក្នុងស្រុក មិនត្រឹមតែនៅក្នុងប្រទេសកម្ពុជានោះទេ ប៉ុន្តែគឺនៅទូទាំងតំបន់តែម្តង។ រូបលោកទាំងពីរកំពុងអភិវឌ្ឍវេទិកានេះឱ្យលើសពីកម្មវិធីបញ្ជីរាយនាមធម្មតា។ ផែនទីយុទ្ធសាស្ត្ររបស់ GoLoca រួមមាន៖

• ប្រព័ន្ធណែនាំវៃឆ្លាត៖ ការបញ្ចូលបច្ចេកវិទ្យាដែលឆ្លាតវៃ ដើម្បីណែនាំទីកន្លែងនានាឱ្យត្រូវទៅតាមចំណង់ចំណូលចិត្ត និងទម្លាប់ផ្ទាល់ខ្លួនរបស់អ្នកប្រើប្រាស់ម្នាក់ៗ។
• មុខងារសហគមន៍៖ បង្កើនការចូលរួមរបស់អ្នកប្រើប្រាស់ ដែលអនុញ្ញាតឱ្យសហគមន៍របស់យើងអាចចែករំលែកការវាយតម្លៃ ការផ្តល់ផ្កាយ និងរូបភាពពិតៗបានភ្លាមៗ។
• ការផ្តល់សិទ្ធិដល់អាជីវករ៖ ផ្តល់ជូនម្ចាស់អាជីវកម្មនូវផ្ទាំងគ្រប់គ្រងកម្រិតខ្ពស់ (Advanced Dashboards) ដើម្បីគ្រប់គ្រងវត្តមានអនឡាញរបស់ពួកគេ បង្កើតកម្មវិធីប្រម៉ូសិនចំគោលដៅ និងអាចភ្ជាប់ទំនាក់ទំនងផ្ទាល់ជាមួយអតិថិជនរបស់ពួកគេបានយ៉ាងងាយស្រួល។

ជាចុងក្រោយលោក ចាន់ថា ស៊ីណាត និងលោក សំណាង សកល ដែលជាស្ថាបនិក App Goloca បានផ្តល់ជាពាក្យពេជន៍ផ្តាំផ្ញើ សម្រាប់សហគ្រិនវ័យក្មេងកម្ពុជាដែលចង់ឈានជើងចូលក្នុងវិស័យបច្ចេកវិទ្យា ឬ Start Up រូបលោកទាំងពីរមានដំបូន្មានស្នូល មួយចំនួនចង់ចែករំលែកនោះគឺ៖

ស្រឡាញ់បញ្ហា កុំស្រឡាញ់ដំណោះស្រាយរបស់ខ្លួនឯង កុំបង្កើត App មួយគ្រាន់តែដោយសារវាស្តាប់ទៅឡូយ​​ ឬអស្ចារ្យ។ ត្រូវបង្កើតវាឡើងព្រោះវាអាចដោះស្រាយបញ្ហាពិតប្រាកដ និងការឈឺចាប់ដែលមនុស្សជួបប្រទះរាល់ថ្ងៃ។ ប្រសិនបើវេទិការបស់អ្នកមិនអាចដោះស្រាយបញ្ហាពិតប្រាកដបានទេ មនុស្សនឹងមិនប្រើប្រាស់វានឡើយ។ អ្នកត្រូវមានសហស្ថាបនិក ឬសមាជិកក្រុមដែលមានជំនាញបំពេញបន្ថែមឱ្យគ្នាទៅវិញទៅមក។ ត្រូវមានតុល្យភាពរវាងអ្នកពូកែសរសេរកូដ (Technical/Coding) ជាមួយអ្នកខ្លាំងខាងអភិវឌ្ឍន៍អាជីវកម្ម ផ្នែកទីផ្សារ និងផ្នែកប្រតិបត្តិការ។ ជួបការបរាជ័យលឿន រៀនឱ្យកាន់តែលឿន ព្រោះប្រព័ន្ធអេកូឡូស៊ីបច្ចេកវិទ្យាដើរលឿនខ្លាំងណាស់។ អ្នកនឹងខុស ហើយមុខងារខ្លះនឹងត្រូវបរាជ័យ។ កុំទន់ជ្រាយ ត្រូវចាត់ទុកបរាជ័យនោះជាទិន្នន័យសម្រាប់រៀនសូត្រ ស្ដាប់អ្នកប្រើប្រាស់របស់អ្នក ហើយបត់បែនយុទ្ធសាស្ត្រឱ្យបានលឿន។ ចាប់ផ្តើមពីតូច គិតឱ្យធំ អ្នកមិនចាំបាច់ទៅវាយលុកទូទាំងតំបន់តាំងពីថ្ងៃដំបូងនោះទេ ត្រូវផ្តោតលើការវាយលុកទីផ្សារគោលដៅតូចមួយ ឱ្យបានច្បាស់លាស់ជាមុនសិន ហើយបង្កើតក្រុមអ្នកប្រើប្រាស់ដែលមានភក្តីភាព និងធ្វើឱ្យផលិតផលស្នូលរបស់អ្នកល្អឥតខ្ចោះ។ នៅពេលដែលអ្នកមានគ្រឹះដ៏រឹងមាំហើយ ទើបពង្រីកមហិច្ឆតារបស់អ្នកទៅថ្នាក់ជាតិ ឬអន្តរជាតិយ៉ាងខ្លាំងក្លាបំផុត។

អត្ថបទដោយ៖ ងួន ឃុនណា