អ្វីដែលយើងបានដឹងកន្លងមកទាក់ទងជាមួយនឹង S25 Ultra គឺវាអាចនឹងធ្វើការអាប់ឌេតទៅលើទំហំកាមេរ៉ា Telephoto មានរូបរាងស្តើង និងស្រាលជាងមុនជាដើម។ ក្នុងនោះផងដែរបើយោងទៅតាម Ice Universe គឺបានទម្លាយជាមួយនឹងចំណុចអាប់ដេតថ្មីបន្ថែមទៀតដូចជា គែម Bezel របស់វាអាចនឹងស្តើងជាង S24 Ultra ជំនាន់មុន ពោលគឺកាត់បន្ថយទំហំដល់ 0.2mm ដែលទំហំនេះគឺស្តើងជា iPhone 16 Pro Max។

លើសពីនេះទៅទៀតសម្រាប់រូបរាងរបស់ Galaxy S25 Ultra ក៏អាចនឹងមានការផ្លាស់ប្តូរទៅជារាងកោងវិញដែរ ដែលការផ្លាស់ប្តូរនេះគឺអាចធ្វើឲ្យរូបរាងទាំងប្រវែងទទឹង គែម Bezel កាន់តែស្តើងជាងមុន ហើយចំពោះអេក្រង់វាគេរំពឹងថានឹងមានទំហំ 6.86 អិញ មិនតែប៉ុណ្ណោះគេរំពឹងថា Galaxy S25 Ultra អាចនឹងក្លាយជាស្មាតហ្វូនដែលស្តើងនិងស្រាលជាងគេក្នុងទីផ្សារហើយ។

យ៉ាងណាមិញសម្រាប់រូបរាងកាមេរ៉ាវិញក៏អាចនឹងស្តើងជាងមុនផងដែរមិនសូវលៀនចេញមក្រៅខ្លាំងពេក​ទេ បើធៀបទៅគឺចង់ស្តើងជា iPhone 16 Pro Max ទៀតផងត្រឹមតែ 2.4mm ប៉ុណ្ណោះ រីឯកម្រាស់តួខ្លួនវិញគឺត្រឹមតែ 8.2mm ខណៈ iPhone 16 Pro Max វិញគឺ 8.3mm។

គូសបញ្ជាក់ផងដែរថា Galaxy S25 Ultra នឹងមានវត្តមាននៅឆ្នាំក្រោយហើយ ពោលគឺនៅតែ៥ខែទៀតប៉ុណ្ណោះ ដែលកំពូលស្មាតហ្វូនមួយនេះនឹងភ្ជាប់មកជាមួយឈីប Snapdragon 8 Gen 4 ថែមទៀត។

 អត្ថបទដោយ៖ រិន​ មករា