អារ៉ាប៊ីសាអូឌីតត្រូវបានកំណត់ថាជាម្ចាស់ផ្ទះរៀបចំការប្រកួត FIFA World Cup ឆ្នាំ ២០៣៤ ខណៈដែលសហព័ន្ធបាល់ទាត់អន្តរជាតិ (FIFA) បានបញ្ជាក់ពីការសម្រេចចិត្តនេះ។
អារ៉ាប៊ីសាអូឌីតបានដាក់ជូនផែនការដ៏មហិច្ឆតារបស់ខ្លួនដើម្បីធ្វើជាម្ចាស់ផ្ទះ FIFA World Cup ឆ្នាំ ២០៣៤ ដែលនឹងក្លាយជាព្រឹត្តិការណ៍ធំបំផុតមិនធ្លាប់មានក្នុងប្រទេសតែមួយ ដោយស្ថិតក្រោមពាក្យស្លោកថា "រីកចម្រើនជាមួយគ្នា" ផែនការនេះស្នើឱ្យមានពហុកីឡដ្ឋានកម្រិតខ្ពស់ចំនួន ១៥ កន្លែង ដែលក្នុងនោះ ១១ ជាការរចនាថ្មីទាំងស្រុង (ដូចជា Prince Mohammed Bin Salman Stadium) និង ៤ ទៀតជាការកែលម្អទីតាំងដែលមានស្រាប់។ ពហុកីឡដ្ឋានទាំងនេះនឹងចែកចាយនៅទូទាំងទីក្រុងម្ចាស់ផ្ទះចំនួន ៥ រួមមាន Riyadh, Jeddah, Al Khobar, Abha, និង NEOM។
១./ ពហុកីឡដ្ឋានណេអូម (NEOM Stadium) ដែលមានទីតាំងនៅក្នុងគម្រោង ឌឹ ឡាញ (THE LINE) ត្រូវបានគេរំពឹងថាជាពហុកីឡដ្ឋានដ៏លេចធ្លោបំផុតមួយ ដោយមានទីលានស្ថិតនៅកម្ពស់ជាង ៣៥០ ម៉ែត្រពីលើដី និងមានដំបូលបង្កើតឡើងពីទីក្រុងខ្លួនឯង។ ពហុកីឡដ្ឋាននេះនឹងប្រើប្រាស់បច្ចេកវិទ្យាទំនើបបំផុត (ដូចជា 4K Ultra HD) និងមានចំណុះជាង ៤៥,០០០ នាក់។
២./ ពហុកីឡដ្ឋានអន្តរជាតិឃីង សាល់ម៉ាន (King Salman International Stadium) ត្រូវបានរចនាឡើងដោយក្រុមហ៊ុន Populous ឱ្យក្លាយជាពហុកីឡដ្ឋានដែលមានចំណុះខ្ពស់បំផុតក្នុងប្រទេសអារ៉ាប៊ីសាអូឌីត ដោយមានសមត្ថភាពផ្ទុកអ្នកទស្សនាបាន ៩២,០០០ នាក់ ដែលធ្វើឱ្យវាស័ក្តិសមសម្រាប់រៀបចំការប្រកួតបើកឆាក និងវគ្គផ្តាច់ព្រ័ត្រនៃ FIFA World Cup ឆ្នាំ ២០៣៤។
៣./ ពហុកីឡដ្ឋានឆ្នេរគីឌីយ៉ា (Qiddiya Coast Stadium) ដែលរចនាដោយក្រុមហ៊ុន Populous មានចំណុះជាង ៤៥,០០០ នាក់ ត្រូវបានរចនាឡើងដើម្បីជានិមិត្តរូបនៃទំនាក់ទំនងរវាងមនុស្ស ទឹក ថាមពល និងរូបធាតុ។ ការរចនារបស់វាមានទម្រង់រលកឡើងចុះ និងពណ៌រស់រវើកដែលនឹកឃើញដល់ឥទ្ធិពលរលកនៃ 'Mexican wave'។
៤./ ពហុកីឡដ្ឋានគីង ហ្វាហាដ ស្ព័រ ស៊ីធី (King Fahad Sports City Stadium) ក្នុងទីក្រុងរីយ៉ាដ គឺជាពហុកីឡដ្ឋានចម្រុះមុខដ៏លេចធ្លោ ដែលជាផ្ទះរបស់ក្រុមបាល់ទាត់ជាតិអារ៉ាប៊ីសាអូឌីត។ លក្ខណៈពិសេសរបស់វាគឺដំបូលក្រណាត់ដ៏ប្លែក ដែលបំផុសគំនិតដោយតង់ប្រពៃណី។ បច្ចុប្បន្នវាមានចំណុះជាង ៥៨,០០០ នាក់ ហើយត្រូវបានគ្រោងទុកជាទីតាំងសម្រាប់ការប្រកួត AFC Asian Cup ឆ្នាំ ២០២៧។ ផែនការកែលម្អដោយក្រុមហ៊ុន Populous មានគោលបំណងពង្រីកចំណុះដល់ជាង ៧០,០០០ នាក់ និងបង្កើតជា "ទីក្រុងបាល់ទាត់ទាំងមូល"។
៥./ ពហុកីឡដ្ឋានព្រះអង្គម្ចាស់ មូហាំម៉ាត់ ប៊ីន សាល់ម៉ាន (Prince Mohammed Bin Salman Stadium) ដែលមានសមត្ថភាពផ្ទុកជាង ៤៦,០០០ នាក់ គឺជាកន្លែងដ៏ទំនើបដែលរចនាដោយក្រុមហ៊ុន Populous។ ពហុកីឡដ្ឋាននេះមានលក្ខណៈពិសេសត្រង់ថា វាមានរាងដូចចានបីជ្រុង ដែលផ្តល់នូវទិដ្ឋភាពដ៏គួរឱ្យភ្ញាក់ផ្អើលនៃច្រាំងថ្មចោទ Tuwaiq។ រូបរាងដ៏អនាគតរបស់អគារនេះត្រូវបានបង្កើតឡើងតាមរយៈកញ្ចក់ឥន្ទធនូ អេក្រង់ LED ផ្ទាំងសូឡា និងលោហៈដែលមានប្រហោង។
៦./ ពហុកីឡដ្ឋានសាកលវិទ្យាល័យឃីង ខាលីដ (King Khalid University Stadium) ដែលបច្ចុប្បន្នកំពុងដំណើរការ នឹងត្រូវពង្រីកជាបណ្ដោះអាសន្នដល់ជាង ៤៥,០០០ កៅអី សម្រាប់ការប្រកួត FIFA World Cup ឆ្នាំ ២០៣៤។ ផែនការកែលម្អរបស់ក្រុមហ៊ុន Populous មានគោលបំណងធ្វើទំនើបកម្មហេដ្ឋារចនាសម្ព័ន្ធ (រួមទាំងសាងសង់អគារទស្សនិកជនអចិន្ត្រៃយ៍ថ្មីនៅទិសខាងលិច និងធ្វើឱ្យប្រសើរឡើងនូវបច្ចេកវិទ្យា) ខណៈដែលរក្សាតម្លៃប្រវត្តិសាស្ត្ររបស់វាផងដែរ។
៧./ ពហុកីឡដ្ឋានញូវ មូរ៉ាបាបា (New Murabba Stadium) ដែលមានទីតាំងនៅភាគពាយ័ព្យនៃទីក្រុងរីយ៉ាដ នឹងមានចំណុះជាង ៤៥,០០០ នាក់ ហើយត្រូវបានបំផុសគំនិតដោយសំបកដើមអាកាស្យា (acacia tree) ដែលមានស្រទាប់ និងវាយនភាព។ វានឹងបំពាក់នូវបច្ចេកវិទ្យាទំនើបបំផុតដើម្បីផ្តល់នូវបទពិសោធន៍ផ្ទាល់ខ្លួនដល់អ្នកគាំទ្រ ដោយមានស្លាកសញ្ញាឌីជីថលបង្កើតតំបន់ប្លែកៗតាមចំណូលចិត្ត។
៨./ ពហុកីឡដ្ឋានរ៉ូសន (ROSHN Stadium) ដែលជាទីតាំងថ្មីនៅភាគនិរតីនៃទីក្រុងរីយ៉ាដ នឹងមានចំណុះជាង ៤៥,០០០ នាក់។ វាត្រូវបានរចនាឡើងដោយមានរាងដូចកែបអង្គុយ (saddle-shaped seating bowl) ដែលផ្តល់នូវផាសុកភាព ម្លប់ និងខ្យល់ចេញចូលឆ្លងកាត់ ខណៈដែលរាងកោងរបស់វាជួយពង្រឹងសូរស័ព្ទផងដែរ។ ពហុកីឡដ្ឋាននេះមានគោលបំណងបញ្ចូលខ្លួនទៅក្នុងបរិយាកាសទីក្រុង ដោយមានទីលានកណ្តាលហ៊ុមព័ទ្ធដោយរចនាសម្ព័ន្ធ 'crystalline' ដែលមានរាងដូចសំណាញ់ ហើយអាចបញ្ចេញពន្លឺនៅពេលយប់។
៩./ ពហុកីឡដ្ឋានឃីង អាប់ឌុលឡាហ៍ ស្ព័រ ស៊ីធី (King Abdullah Sports City Stadium) ត្រូវបានសាងសង់ក្នុងឆ្នាំ ២០១៤ ដោយក្រុមហ៊ុន Arup និងជាពហុកីឡដ្ឋានធំទីពីររបស់អារ៉ាប៊ីសាអូឌីត ដែលអាចផ្ទុកអ្នកទស្សនាបានជាង ៥៧,០០០ នាក់។
១០./ ពហុកីឡដ្ឋានអារ៉ាមកូ (ARAMCO Stadium) ដែលមានចំណុះជាង ៤៥,០០០ នាក់ និងត្រូវបានរចនាដោយក្រុមហ៊ុន Foster + Partners នឹងត្រូវសាងសង់នៅមាត់ឆ្នេរឈូងសមុទ្រអារ៉ាប៊ី (Arabian Gulf) ក្នុងតំបន់ អាល់ ខូបា (Al Khobar)។ ការរចនារបស់វាត្រូវបានបំផុសគំនិតដោយឥទ្ធិពលខ្យល់កួចក្នុងតំបន់ Dawwama ដោយមានរូបរាងដូចក្តោងត្រួតគ្នា និងលំនាំរលក ដែលស៊ីគ្នានឹងទេសភាពឆ្នេរ។ ពហុកីឡដ្ឋាននេះនឹងរៀបចំការប្រកួត FIFA World Cup ឆ្នាំ ២០៣៤ និង AFC Asian Cup ឆ្នាំ ២០២៧។
១១./ ពហុកីឡដ្ឋានភាគខាងត្បូងរីយ៉ាដ (South Riyadh Stadium) ដែលជាទីតាំងថ្មីដោយក្រុមហ៊ុន Populous នឹងមានចំណុះជាង ៤៥,០០០ នាក់ ហើយមានផ្នែកខាងមុខដែលរួមបញ្ចូលនូវធាតុទំនើបជាមួយនឹងរចនាប័ទ្ម និងសម្ភារៈស្ថាបត្យកម្មប្រពៃណីក្នុងតំបន់។ ពហុកីឡដ្ឋាននេះត្រូវបានរចនាឡើងដោយផ្តោតលើនិរន្តរភាព ដោយប្រើប្រាស់រុក្ខជាតិធន់នឹងគ្រោះរាំងស្ងួត ប្រព័ន្ធប្រមូលទឹកភ្លៀង និងបន្ទះសូឡាដើម្បីបង្កើតថាមពលដែលគាំទ្រដល់បរិស្ថាន។
១២./ ពហុកីឡដ្ឋានឃីង អាប់ឌុលឡាហ៍ អេកូណូមិក ស៊ីធី (King Abdullah Economic City Stadium) ដែលមានចំណុះជាង ៤៥,០០០ កៅអីស្ថិតនៅភាគខាងជើងទីក្រុងជីដា (Jeddah) តាមបណ្តោយឆ្នេរសមុទ្រក្រហម។ ការរចនារបស់វាត្រូវបានបំផុសគំនិតដោយថ្មប៉ប្រះទឹកផ្កាថ្មក្នុងស្រុក ដោយផ្តោតលើភាពបត់បែន និងសោភ័ណភាពធម្មជាតិ។
១៣./ ពហុកីឡដ្ឋានព្រះអង្គម្ចាស់ ហ្វៃសាល់ ប៊ីន ហ្វាហាដ ស្ព័រ ស៊ីធី (Prince Faisal bin Fahad Sports City Stadium) ក្នុងទីក្រុងរីយ៉ាដ ត្រូវបានបង្កើតឡើងដោយក្រុមហ៊ុន Populous ថាជាកន្លែងចម្រុះថ្មីមួយដែលមានចំណុះជាង ៤៥,០០០ នាក់។ ការរចនារបស់វាត្រូវបានបំផុសគំនិតដោយ 'ភាពទំនើបស្របតាមបរិបទវប្បធម៌' នៃស្ថាបត្យកម្ម Salmani។
១៤./ ពហុកីឡដ្ឋានអភិវឌ្ឍន៍កណ្តាលជីដា (Jeddah Central Development Stadium) ដែលដឹកនាំដោយក្រុមហ៊ុនស្ថាបត្យកម្មអាល្លឺម៉ង់ GMP Architecten នឹងត្រូវសាងសង់នៅក្នុងតំបន់ Al Andalus នៃទីក្រុងជីដា (Jeddah) ជាប់ឆ្នេរ ដោយមានចំណុះជាង ៤៥,០០០ នាក់។ ការរចនារបស់វារួមបញ្ចូលគ្នានូវស្ថាបត្យកម្មប្រពៃណី Al Balad ជាមួយនឹងបច្ចេកវិទ្យាទំនើប ដោយមានលក្ខណៈពិសេសរួមមានដំបូលដែលអាចបត់បិទបាន ៣៦០° LED screen។
១៥./ ពហុកីឡដ្ឋានសាកលវិទ្យាល័យឃីង សូអ៊ូដ (King Saud University Stadium) ដែលស្ថិតនៅក្នុងបរិវេណសាកលវិទ្យាល័យភាគខាងលិចទីក្រុងរីយ៉ាដ និងបច្ចុប្បន្នជាទីលានផ្ទះរបស់ក្លឹបបាល់ទាត់ Al Nassr នឹងត្រូវពង្រីកជាបណ្ដោះអាសន្នដោយក្រុមហ៊ុន Populous ដល់ ៤៦,០០០ កៅអី សម្រាប់ការប្រកួត FIFA World Cup ឆ្នាំ ២០៣៤។
គូសបញ្ជាក់ផងដែរថា ព្រឹត្តិការណ៍នេះនឹងក្លាយជា World Cup ដែលមាន ៤៨ ក្រុមដំបូងគេដែលរៀបចំក្នុងប្រទេសតែមួយ។ ផែនការនេះស្នើឱ្យមានការសាងសង់និងកែលម្អពហុកីឡដ្ឋានកម្រិតខ្ពស់សរុប ១៥ កន្លែង ដែលក្នុងនោះ ១១ កន្លែងជាការរចនាថ្មីទាំងស្រុង និង ៤ កន្លែងទៀតជាការកែលម្អទីតាំងដែលមានស្រាប់។ ពហុកីឡដ្ឋានទាំងនេះនឹងចែកចាយនៅទូទាំងទីក្រុងម្ចាស់ផ្ទះចំនួន ៥ គឺ Riyadh, Jeddah, Al Khobar, Abha, និង NEOM ដោយមានពហុកីឡដ្ឋានអន្តរជាតិឃីង សាល់ម៉ាន (King Salman International Stadium) គ្រោងសម្រាប់ការប្រកួតបើកឆាក និងវគ្គផ្តាច់ព្រ័ត្រ។
