កាលពីថ្ងៃសុក្រកន្លងទៅនេះ ក្រុមហ៊ុន Meta បានប្រកាសដាក់ចេញនូវឧបករណ៍ថ្មីៗ ដើម្បីស្វែងរកការបន្លំអត្តសញ្ញាណ ព្រមទាំងធ្វើបច្ចុប្បន្នភាពគោលការណ៍ណែនាំសម្រាប់អ្នកបង្កើតមាតិកា (Creators) ដែលកំណត់ឱ្យកាន់តែច្បាស់នូវអ្វីដែល Facebook ចាត់ទុកថាជា "មាតិកាដើម (Original content)"។

កាលពីឆ្នាំមុន ក្រុមហ៊ុនបានប្រកាសពីការរឹតបន្តឹងលើមាតិកាដែលជាប្រភេទ Spam និងមាតិកាមិនមែនជាច្បាប់ដើម ដូចជាការយក រូបភាព វីដេអូ ឬអត្ថបទរបស់អ្នកដទៃមកប្រើដដែលៗជាដើម។ គោលដៅគឺ៖ ដើម្បីលើកកម្ពស់មាតិកាដើមរបស់អ្នកបង្កើតមាតិកានៅលើ Feed និងជំរុញឱ្យថយចុះនូវ "សម្រាម AI" ក៏ដូចជាការបង្ហោះដែលមានគុណភាពទាបផ្សេងទៀត ដែលបាននិងកំពុងធ្វើឱ្យប៉ះពាល់ដល់កេរ្តិ៍ឈ្មោះរបស់ Facebook។

បច្ចុប្បន្ន Meta បានលើកឡើងថា កិច្ចខិតខំប្រឹងប្រែងកាលពីមុនរបស់ខ្លួន បានធ្វើឱ្យចំនួនអ្នកចូលមើល និងពេលវេលានៃការទស្សនាមាតិកាដើមនៅលើ Facebook កើនឡើងប្រហែលទ្វេដង ក្នុងអំឡុងឆមាសទីពីរនៃឆ្នាំ ២០២៥ បើធៀបនឹងរយៈពេលដូចគ្នាកាលពីឆ្នាំមុន។

ក្រុមហ៊ុនក៏បានបញ្ជាក់ផងដែរថា ខ្លួនសម្រេចបានវឌ្ឍនភាពក្នុងការលុបបំបាត់គណនីបន្លំអត្តសញ្ញាណ ដោយក្នុងនោះគណនីសរុបចំនួន ២០ លានត្រូវបានលុបចោលកាលពីឆ្នាំមុន និងមានការធ្លាក់ចុះ ៣៣% នៃចំនួនរបាយការណ៍បន្លំអត្តសញ្ញាណដែលផ្ដោតលើអ្នកបង្កើតមាតិកាល្បីៗ។