មុខងារ Emergency SOS via Satellite ឬហៅថាមុខងារសង្គ្រោះបន្ទាន់ដោយប្រើប្រាស់ប្រព័ន្ធផ្កាយរណបពេលណាដែលអ្នកមានបញ្ហានៅកន្លែងណាមួយដែលគ្មានសេវាចូលដល់ ហើយវាត្រូវបាន Apple បំពាក់នៅលើ iPhone 14 ជាមួយនឹង iPhone 14 Pro Model ហើយថ្មីៗនេះ Apple ក៏ទើបតែបើកឱ្យដំណើរការប្រើប្រាស់ដែរ។ ឥឡូវមុខងារនេះក៏បានជួយសង្គ្រោះបុរសម្នាក់ពីការជាប់គាំងនៅតំបន់ដាច់ស្រយាលផងដែរ។
ដោយយោងទៅតាមការចុះផ្សាយរបស់ MacRumors បានឱ្យដឹងថា កាលពីយប់អាធ្រាត្រថ្ងៃទី1 ខែធ្នូនេះមានបុរសម្នាក់បានធ្វើដំណើរដោយជិះម៉ាស៊ីនលើព្រិលពីតំបន់ Noorvik ទៅកាន់តំបន់ Kotzebue នៃរដ្ឋអាឡាស្កា បន្ទាប់មកក៏បានជាប់គាំងនៅតំបន់ដែលត្រជាក់ហើយទីនោះពុំមានសេវាចូលទៅដល់ទេ ប៉ុន្តែយ៉ាងណាក៏ដោយបុរសម្នាក់នោះបានភ្ជាប់ដំណើរការជាមួយនឹងមុខងារ Emergency SOS via Satellite ដែលមាននៅលើ iPhone 14 របស់គាត់។
ភ្លាមៗនោះដំណឹងដែលចេញពីមុខងារទាក់ទងតាមផ្កាយរណបរបស់ iPhone 14 គឺបានទៅដល់ភ្នាក់ងារសង្គ្រោះបន្ទាន់របស់ Apple ហើយខាង Apple ក៏បានធ្វើការទាក់ទងជាមួយនឹងក្រុមជួយសង្រ្គោះដែលមាននៅក្នុងតំបន់ដែលគេជាប់គាំងនោះ។ ដូច្នេះគេក៏បានបញ្ជូនក្រុមស្ម័គ្រចិត្តដើម្បីស្វែងរកក៏ដូចជាជួយសង្គ្រោះបុរសដែលជាប់គាំងដោយជោគជ័យ តាមរយៈទិសដៅដែលបង្ហាញចេញពីមុខងារ ផ្កាយរណបរបស់ iPhone 14។
ទន្ទឹមនឹងនេះ បុរសដែលបានជាប់គាំងនៅតំបន់ត្រជាក់នោះគឺមិនមានគ្រោះអ្វីឡើយ ប៉ុន្តែអ្វីដែលគួរឱ្យកត់សម្គាល់នោះគឺយើងមិនត្រូវឱ្យថ្មទូរស័ព្ទរបស់យើងអស់នោះទេដូច្នេះដើម្បីរក្សាសុវត្ថិភាពគឺបញ្ចូលថ្មឱ្យពេញៗពេលទៅតំបន់ណាដែលដាច់ស្រយាល។
គូសបញ្ជាក់ផងដែរថាសម្រាប់មុខងារមួយនេះគឺមិនទាន់អាចដំណើរការនៅក្នុងស្រុកខ្មែរយើងបានទេ ពោលគឺវាដំណើរការតែនៅបណ្តាប្រទេសធំៗដូចជា អាមេរិក កាណាដា និងប្រទេសមួយចំនួនទៀតតែប៉ុណ្ណោះ។
អត្ថបទដោយ៖ រិន មករា
