ស្របពេលមានមនុស្សជាច្រើន កំពុងព្រួយបារម្ភពីវិបត្តិសេដ្ឋកិច្ចដែលកំពុងអូសបន្លាយមកយូរដែរហើយ ពេលនេះលោក Elon Musk មហាសេដ្ឋីពិភពលោក បាននិយាយ ឬព្យាករណ៍ជាសារធារណៈ នៅលើគណនី Twitter របស់លោកថា វិបត្តិសេដ្ឋកិច្ចដែលពិភពលោកកំពុងជួបប្រទះនេះ អាចនឹងបន្តដល់ឆ្នាំ២០២៤ ទើបចប់។
កាលពីម្សិលមិញនេះលោក Elon Musk បានឆ្លើយតបសារអ្នកគាំទ្រនៅលើ Twitter មួយនិយាយថា “អ្វីដែលមនុស្សត្រូវព្រួយបារម្ភបំផុតនៅពេលនេះគឺវិបត្តិសេដ្ឋកិច្ចនិងវិបត្តិនុយក្លេអ៊ែរ។” ជាមួយសារនេះ លោក Elon Musk បានឆ្លើយតប និងព្យាករណ៍យ៉ាងច្បាស់ៗថា វិបត្តិសេដ្ឋកិច្ចសាកលនឹងបន្តប្រហែល១ឆ្នាំកន្លះទៀត ឬអាចនិយាយបានថាដល់ឆ្នាំ២០២៤ ទើបបញ្ចប់វិញ។ លោកបានបន្ថែមថា វិបត្តិសេដ្ឋកិច្ចលើកនេះនៅមានភាពល្អខ្លះដែរ ព្រោះវាមិនបង្កជាផលវិបាកខ្លាំងអ្វីឡើយ។
គូសបញ្ជាក់ថា GDP សកលបានកើនឡើងចំនួន 6% កាលពីឆ្នាំ 2021 ប៉ុន្តែវាត្រូវបានគេរំពឹងថា នឹងចាប់ផ្ដើមថយចុះមកវិញ ត្រឹម 3.2% នៅក្នុងឆ្នាំនេះ និង 2.7% នៅឆ្នាំ 2023 ខាងមុន នេះបើយោងតាមទិន្នន័យរបស់មូលិធិរូបិយវត្ថុអន្តរជាតិ ចេញផ្សាយដោយកាសែត CNBC កាលពីថ្ងៃទី២២ ខែតុលា ឆ្នាំ២០២២ កន្លងទៅថ្មីៗនេះ៕
អត្ថបទដោយ៖ ផែន ផាន់ណា