អ្នកបង្កើតមាតិកា គឺជាបុគ្គលដែលផលិតទម្រង់ផ្សេងៗនៃប្រព័ន្ធផ្សព្វផ្សាយ ដូចជាអត្ថបទ វីដេអូ កម្មវិធីផតឃែស្ថ ឬការបង្ហោះលើបណ្តាញសង្គម ដើម្បីចូលរួមជាមួយទស្សនិកជនឲ្យចំគោលដៅ។ ដូច្នេះមកដឹងពីតិកនិចក្នុងការផលិតវីដេអូ ទោះមិនចេះសោះក៏អ្នកអាចចាប់ផ្តើមបាន។
លោក ពឹង ឆាយហេង ជាអ្នកផលិតមាតិកាលើបណ្តាញសង្គម តិចតុក និងហ្វេសប៊ុកដែលមានប្រជាប្រិយភាពមួយរូប។ លោកបានចាប់ផ្តើមផលិតមាតិកាតាំងពីឆ្នាំ ២០២៣ រហូតបន្តមកដល់បច្ចុប្បន្ននេះ សម្រាប់ប្រភេទមាតិកា លោក ឆាយ ហេង បានផ្តោតទៅលើមតិកាដូចជា៖ គន្លឹះសិក្សា, តិចណូឡូជី, មាតិកាពេញនិយម (On Trend)…។ល។ មូលហេតុដែលលោក ចាប់ផ្តើមជាអ្នកផលិតមាតិកា គឺដោយសារលោកជាមនុស្សដែលចូលចិត្តចែករំលែកទៅកាន់មនុស្សជុំវិញខ្លួន ដូច្នេះហើយវាជាកត្តាដែលជុំរុញឲ្យលោកចាប់ផ្តើមបោះជំហានជាអ្នកផលិតមាតិកាមកទល់សព្វថ្ងៃ។
លោក ពឹង ឆាយហេង បានលើកឡើងថាបណ្តាញសង្គមដែលមានមនុស្សចាប់អារម្មណ៍ច្រើនជាងគេនៅកម្ពុជានោះគឺ តិកតុក (TikTok) ដូច្នេះប្រសិនបើអ្នកចង់ក្លាយជាអ្នកផលិតមាតិកាថ្មីថ្មោងគួរតែចាប់ផ្តើមលើបណ្តាញសង្គមតិកតុកជាមុនសិន ព្រោះវាមានឥទ្ធិពលដល់អ្នកទស្សនាជាងបណ្តាញសង្គមផ្សេងៗទៀត រួចអ្នកក៏អាចយកវីដេអូនោះទៅផុសបន្តលើបណ្តាញសង្គមផ្សេងៗទៀតដូចជា FB Reel, Instagram Reel ជាដើម ដើម្បីបុកសន្ទុះទាញអ្នកទស្សនាឲ្យស្គាល់ពីយើងច្រើន។
ប្រសិនបើអ្នកទាំងអស់គ្នាចង់ចាប់ផ្តើមពីមាតិកាដែលខ្លួនស្រលាញ់មិនថាជាប្រភេទមាតិកា៖ គន្លឹះសិក្សា, Vlog, ហ្គេម, តិចណូឡូជី, របៀបរកចំណូល, Make up Cosmetic, មាតិកាញាំ, គំនូរ, Podcast, ដំណើរកំសាន្ត…ឬផ្សេងៗទៀត ឲ្យតែខ្លួនស្រលាញ់សូមដាក់ចិត្តចាប់ផ្តើមធ្វើពីឥឡូវ។
សម្រាប់ប្រភពចំណូលរបស់អ្នកផលិតមាតិកាអាចមានច្រើនច្រកដូចជាការបើក Monetize (តិចតួច), ចំណូលពីអ្នកឧបត្ថម្ភ (Sponsor), ការ Review ផលិតផលដែលបានចំណូលពីម្ចាស់អជីវកម្មជាដើម។ លោក ឆាយ ហេង ក៏បានបង្ហើបចំណុចខ្លះពីច្រកចំណូល ដែលលោកអាចផលិតមាតិការហូតទទួលបាន Sponsor, លក់មេរៀនឌីជីថលទៅកាន់អ្នកដែលចង់ចាប់ផ្តើមផលិតមាតិកា ឬសម្រាប់ម្ចាស់អជីវកម្ម និងមានលក់ផលិតផលផ្ទាល់ខ្លួនថែមទៀតផង វគ្គសិក្សា Content Creating ឬ កសាង Branding សម្រាប់ខ្លួនឯងនឹងអាជីវកម្មក្នុងរយៈពេល ១៤ ថ្ងៃ (14 Days to build your TikTok Branding) ។ ប្រសិនបើអ្នកទាំងអស់គ្នាមានចំណាប់អារម្មណ៍លើវគ្គសិក្សា ឬតាមដានព័ត៌មាន On Trends, Tech និងគន្លឹះល្អៗអ្នកទាំងអស់គ្នាចូលទៅ Follow គេហទំព័រហ្វេសប៊ុក Chhayheng - ឆាយហេង, និងលើអាខោនតិកតុ chhayxheng ។
ការចាប់ផ្តើមផលិតមាតិកាគឺ មិនបានទាមទារឲ្យអ្នកជាមនុស្សដែលពូកែគ្រប់សព្វ ឬទាល់តែមានអ្វីគ្រប់យ៉ាងទើបអាចក្លាយជាអ្នកផលិតមាតិកាបាននោះទេ តែវាទាមទារឲ្យអ្នកចាប់ផ្តើមពីអ្វីដែលខ្លួនមាន មិនថាជាធនធាន ចំណូល ឬឋិតក្នុងកន្លែងណានោះទេ ត្រឹមទូរស័ព្ទ១គ្រឿងក៏អ្នកអាចចាប់ផ្តើមវាជាមួយនឹងមាតិកាដែលខ្លួនស្រលាញ់បានដែរ ។
មតិចុងក្រោយរបស់លោក ពឹង ឆាយហេង ទៅកាន់អ្នកអានទាំងឡាយដែលកំពុងមានចិត្តចង់ក្លាយជាអ្នកផលិតមាតិកា គួរចាប់ផ្តើមធ្វើអ្វីដែលខ្លួនឯងស្រលាញ់ រើសយកបណ្តាញសង្គមតិកតុកសម្រាប់ការបង្ហោះវីដេអូរបស់ខ្លួន ធ្វើអ្វីដែលជាខ្លួនឯងបង្ហាញទៅអ្នកទស្សនា រៀនកាត់វីដេអូតាមទូរស័ព្ទ (Capcut, Inshort, VN), ផលិតវីដេអូខ្លីខ្លឹមងាយស្រួលយល់, ស្វ័យសិក្សាពីមាតិកា, កុំបោះបង់ប្រសិនបើជួបបញ្ហាអ្វីមួយ និងចុងក្រោយត្រូវចាំថា “កុំខ្វល់ពីសម្តីអ្នកដ៏ទៃ ព្រោះថា អ្នកនិយាយមិនដែលធ្វើ ហើយអ្នកធ្វើមិនមានពេលនិយាយនោះទេ” ។
អត្ថបទដោយ៖ ងួន ឃុនណា
