Citroen My Ami Tonic គឺជាកូនឡានអគ្គិសនីតូចច្រឡឹងរបស់ចក្រភពអង់គ្លេស ដែលថ្មីៗនេះ ទទួលបានការចាប់អារម្មណ៍ខ្លាំងមែនទែន ពីសំណាក់អ្នកលេងបណ្តាញសង្គមជាច្រើន ជាពិសេសអ្នកនៅអង់គ្លេសតែម្តង ដោយសារតែឡាននេះរាងតូច Cute គួរឲ្យស្រឡាញ់ ហើយតម្លៃវិញមិនដល់ ១ម៉ឺនដុល្លារនោះទេ។
បើយោងតាមការចុះផ្សាយពីគេហទំព័រ Auto Express បានឲ្យដឹងថា ក្រុមហ៊ុន Citroen ដែលមានទីតាំងនៅចក្រភពអង់គ្លេសបានបង្ហាញនូវកូនឡានអគ្គិសនី Citroen My Ami Tonic តម្លៃថោកជាងបំផុតក្នុងចក្រភពអង់គ្លេស ។ រថយន្តអគ្គិសនីនេះមានពណ៌ក្រៅចំនួន ២ គឺពណ៌កាគី និពណ៌លឿន អមជាមួយនឹងអំពូល LED ផ្នែកខាងមុខ និងស្តុបក្រោយរាងមូល យ៉ាងស្រស់ស្អាតបែប Classic និងមានដំបូលកញ្ចក់ Sunroof ទៀតផង ។
រីឯផ្នែកខាងក្នុងវិញ យើងឃើញថាមានកៅអីចំនួន ២ មានអេក្រង់មើលកុងទ័រតូចមួយ ប៉ុន្តែអ្វីដែលឡានភាគច្រើនមាននោះ តែCitroen My Ami Tonic គ្មានគឺជា អេក្រង់កម្សាន្ត ផ្ទុយមកវិញគេបានដាក់ប្រដាក់កៀបទូរស័ព្ទដៃជំនួសវិញម្តង។
ដោយឡែកចំពោះ គ្រឿងកម្លាំងរបស់កូនឡានអគ្គិសនីនេះ គេបានបំពាក់នូវម៉ូទ័រអេឡិចត្រូនិចកម្លាំង ៨សេះ ឬ ៦គីឡូវ៉ាត់ និងកញ្ចប់ថ្មទំហំ ៥.៥គីឡូវ៉ាត់ម៉ោង ដែលអាចអនុញ្ញាតឲ្យយើងបើកបរក្នុងចម្ងាយអតិបរមា ៧០គីឡូម៉ែត្រ រាល់ពេលសាកថ្មពេញម្តង។ មិនតែប៉ុណ្ណោះ ចំពោះល្បឿនលឿនបំផុតរបស់ឡានអគ្គិសនីមួយនេះ គឺ ៤៥គីឡូម៉ែត្រក្នុងមួយម៉ោងផងដែរ ។
គួរបញ្ជាក់ផងដែរ សម្រាប់កូនឡានអគ្គិសនី Citroen my Ami Tonic ត្រូវបានដាក់លក់នៅក្នុងចក្រភពអង់គ្លេសដំបូងគេបង្អស់ជាមួយនឹងតម្លៃពិតប្រាកដតម្លៃតែ៩៩៩០ដុល្លារសហរដ្ឋអាមេរិកតែប៉ុណ្ណោះ ៕
អត្ថបទដោយ៖ ព្រឹម ភក្តី
