ក្រុមហ៊ុនយក្សចិន BYD សហការគ្នានឹងក្រុមនហ៊ុន WHA Group បណ្តាក់ទុនរួមគ្នាជាមួយនឹងប្រាក់ ៤៩១,៤១លានដុល្លារ ដើម្បីបង្កើតរោងចក្រផលិតរថយន្ត ប្រើប្រាស់ថាមពលអគ្គិសនីសុទ្ធ និងពាក់កណ្ដាលអគ្គិសនីនៅក្នុងប្រទេសថៃ ក្នុងបំណងក្នុងការផលិតរថយន្តទាំងពីរប្រភេទ ឲ្យបាន ១៥០,០០០គ្រឿងចាប់ពីឆ្នាំ ២០២៤។
បើយោងសេចក្តីប្រកាសរួមគា្នរវាងក្រុមហ៊ុន BYD នឹងដៃគូសហការអ្នកអភិវឌ្ឍន៍ឧស្សាហកម្មនៅប្រទេសថៃ WHA Group(WHA.BK) បានធ្វើឡើងនូវកិច្ចព្រមព្រៀងចុះហត្ថលេខាទិញដីក្នុងទំហំ ៩៦ហិកតា នៅខេត្ត Rayong សម្រាប់សាងសង់រោងចក្រ។ មួយវិញទៀតកាលពីខែសីហា បានឲ្យដឹងទៀតថា ទឹកប្រាក់ដែលត្រូវបានវិនិយោគលើគម្រោងសាងសង់រោងចក្រផលិតរថយន្តគឺរហូតដល់ ១៧,៩ពាន់លានបាត ឬ ៤៩១,៤១លានដុល្លារសហរដ្ឋអាមេរិក ឯណោះ នេះបើយោងតាមការចុះផ្សាយពី Reuters ។
ជាមួយគ្នានេះដែរ រោងចក្រនៅក្នុងប្រទេសថៃ ខាងក្រុមហ៊ុន BYD ដាក់ផែនការចាប់ពីឆ្នាំ២០២៤ តទៅនឹងត្រូវបានផលិតរថយន្តប្រើប្រាស់អគ្គិសនីសុទ្ធ និងរថយន្តប្រើថាមពលពាក់កណ្ដាលអគ្គិសនី(Hybrid) ១៥០,០០០គ្រឿង ដើម្បីលក់ចេញទៅកាន់បណ្តាប្រទេសនានាជុំវិញពិភពលោក ក៏ដូចជាប្រទេសកម្ពុជាផងដែរ។
គួរបញ្ជាក់ផងដែរថា រោងចក្រផលិតរថយន្តរបស់ BYDនៅប្រទេសថៃ គឺជារោងចក្រមានលេខរៀងទី៣០ ក្នុងចំណោមរោងចក្រទាំងអស់របស់ក្រុមហ៊ុនយក្សចិនមួយនេះ ក្នុងនោះរួមមាន សហរដ្ឋអាមេរិក ប្រេហ្ស៉ីល ឥណ្ឌា ៕
អត្ថបទដោយ៖ ព្រឹម ភក្តី
