កាលពីថ្ងៃទី២០ ខែមេសា ឆ្នាំ២០២៥ យោងតាមការចុះផ្សាយរបស់សារព័ត៌មាន CNBC បានប្រាប់ឲ្យដឹងថា ចិនបានព្រមានថា ខ្លួននឹងសងសឹកប្រទេសណាដែលសហការជាមួយសហរដ្ឋអាមេរិក ក្នុងវិធីដែលធ្វើឱ្យប៉ះពាល់ដល់ផលប្រយោជន៍របស់ទីក្រុងប៉េកាំង ខណៈដែលសង្គ្រាមពាណិជ្ជកម្មរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោកកំពុងគំរាមកំហែងដល់ប្រទេសដទៃទៀត។
ការព្រមានរបស់ចិនបានកើតឡើង ខណៈរដ្ឋបាលរបស់ប្រធានាធិបតីសហរដ្ឋអាមេរិក ដូណាល់ ត្រាំ ត្រូវបានគេរាយការណ៍ថា កំពុងគ្រោងនឹងប្រើប្រាស់ការចរចារពន្ធគយ ដើម្បីដាក់សម្ពាធលើដៃគូរបស់សហរដ្ឋអាមេរិកឱ្យកាត់បន្ថយទំនាក់ទំនងរបស់ពួកគេជាមួយចិន។
លោក ត្រាំ បានផ្អាកការដំឡើងពន្ធគយដ៏ធំលើប្រទេសផ្សេងទៀតក្នុងរយៈពេល ៩០ ថ្ងៃកាលពីខែនេះ ខណៈពេលដែលបានដំឡើងពន្ធបន្ថែមទៀតលើទំនិញពីប្រទេសចិនដល់ ១៤៥%។
ក្រសួងពាណិជ្ជកម្មចិនបាននិយាយថា "ចិនប្រឆាំងយ៉ាងម៉ឺងម៉ាត់ចំពោះភាគីណាមួយដែលឈានដល់កិច្ចព្រមព្រៀងដោយចំណាយលើផលប្រយោជន៍របស់ចិន។ ប្រសិនបើករណីនេះកើតឡើង ចិននឹងមិនទទួលយកទេ ហើយនឹងចាត់វិធានការតបតវិញយ៉ាងម៉ឺងម៉ាត់"។
សេចក្តីថ្លែងការណ៍នេះក៏បានព្យាយាមបង្ហាញថា ចិនមានឆន្ទៈធ្វើការជាមួយគ្រប់ភាគីទាំងអស់ និង "ដាច់ខាតការពារយុត្តិធម៌ និងភាពត្រឹមត្រូវនៃអន្តរជាតិ" ខណៈពេលដែលពណ៌នាអំពីសកម្មភាពរបស់សហរដ្ឋអាមេរិកថាជា "ការរំលោភបំពានពន្ធគយ" និង "ការគំរាមកំហែងឯកតោភាគី" ។
