មុនពេលក្លាយជា platform រចនាដ៏ល្បីល្បាញលើពិភពលោក គំនិតបង្កើត Canva ត្រូវបានចាប់ផ្តើមឡើងនៅក្នុងបន្ទប់គេងតូចមួយរបស់ Melanie Perkins ក្នុងទីក្រុង Perth ប្រទេសអូស្ត្រាលី កាលពីនាងមានអាយុទើបតែ ១៩ ឆ្នាំ។ ក្នុងនាមជាគ្រូបង្រៀនក្រៅម៉ោងម្នាក់ នាងបានសង្កេតឃើញថា និស្សិតជាច្រើនជួបការលំបាកយ៉ាងខ្លាំងក្នុងការរៀនប្រើប្រាស់កម្មវិធីរចនាធំៗដូចជា Adobe Photoshop ឬ Illustrator ដែលមានភាពស្មុគស្មាញ និងត្រូវការពេលរៀនយូរ។ ភាពលំបាកទាំងនេះហើយ ដែលបានក្លាយជាផ្កាភ្លើងដំបូងជំរុញឱ្យនាងចង់បង្កើតកម្មវិធីមួយដែលមានភាពងាយស្រួល សាមញ្ញ និងអាចឱ្យមនុស្សគ្រប់គ្នាឌីហ្សាញបាននៅលើវេបសាយភ្លាមៗ។

ទោះបីជាមានគំនិតអាជីវកម្មល្អយ៉ាងណាក៏ដោយ ផ្លូវដើររបស់ Melanie មិនមែនក្រាលដោយផ្កាកុលាបនោះទេ។ នាង និងដៃគូរបស់នាង (បច្ចុប្បន្នជាស្វាមី) គឺលោក Cliff Obrecht បានចំណាយពេលជាង ៣ ឆ្នាំ ធ្វើដំណើរទៅជួបអ្នកវិនិយោគជាច្រើនដើម្បីស្នើសុំទុនមកអភិវឌ្ឍគម្រោង Canva។ ជាលទ្ធផល ពួកគេត្រូវបានអ្នកវិនិយោគបដិសេធ (Rejected) ជាង ១០០ ដង។ អ្នកវិនិយោគភាគច្រើនគិតថា គំនិតរបស់ពួកគេគ្រាន់តែជាការយល់សប្តិដែលមិនអាចទៅរួច និងមិនអាចប្រកួតប្រជែងជាមួយក្រុមហ៊ុនយក្សដែលមានស្រាប់ក្នុងទីផ្សារបានឡើយ ដែលនេះជាសម្ពាធផ្លូវចិត្តដ៏ធ្ងន់ធ្ងរ និងជូរចត់បំផុតសម្រាប់សហគ្រិនវ័យក្មេង។

ការលះបង់ និងការខាតបង់ដែលស្ទើរតែបោះបង់ដើម្បីរស់ និងបន្តក្តីស្រមៃ Melanie និង Cliff បានសម្រេចចិត្តចាប់ផ្តើមអាជីវកម្មតូចមួយមុន គឺការធ្វើសៀវភៅឆ្នាំសិក្សា (Yearbook) សម្រាប់សាលារៀន ដែលមានឈ្មោះថា Fusion Books ដើម្បីសន្សំលុយ និងសាកល្បងបច្ចេកវិទ្យា។ នៅក្នុងដំណាក់កាលនោះ ពួកគេត្រូវខាតបង់ទាំងពេលវេលា និងថវិកាផ្ទាល់ខ្លួនស្ទើរតែទាំងអស់ គ្មានប្រាក់ចំណេញ គ្មានស្ថិរភាពហិរញ្ញវត្ថុ និងត្រូវធ្វើការពីព្រលឹមទល់ព្រលប់នៅក្នុងបន្ទប់គេងរបស់ម្តាយនាង។ ការខាតបង់ និងការមើលមិនឃើញពន្លឺនៃភាពជោគជ័យនៅពេលនោះ បានធ្វើឱ្យពួកគេស្ទើរតែសម្រេចចិត្តបោះបង់ចោលពាក់កណ្តាលផ្លូវទៅហើយ។

ទោះជាត្រូវដួល និងជួបភាពបរាជ័យក្នុងការរៃអង្គាសប្រាក់ដដែលៗ ប៉ុន្តែ Melanie មិនដែលព្រមចុះចាញ់នឹងព្រះជតាកម្មឡើយ។ ដើម្បីអាចទាក់ទាញអ្នកវិនិយោគលំដាប់ពិភពលោកនៅ Silicon Valley នាងបានបង្ខំចិត្តរៀនជំនាញថ្មីៗដែលនាងមិនចូលចិត្ត ដូចជាការលេងកីឡាជិះក្តារលើទឹក (Kitesurfing) ដើម្បីគ្រាន់តែមានឱកាសបានជួប និងជជែកពិភាក្សាការងារជាមួយក្រុមអ្នកវិនិយោគធំៗ។ នាងបានកែសម្រួលគម្រោងអាជីវកម្ម (Pitch Deck) ឡើងវិញរាប់សិបដង រៀនពីកំហុសនៃការបដិសេធពីមុនៗ ហើយយកវាមកអភិវឌ្ឍខ្លួនឯងជានិច្ច។

ពន្លឺនៃភាពជោគជ័យពីការមិនព្រមលះបង់ ភាពអត់ធ្មត់ និងការមិនរាថយចំពោះឧបសគ្គបានហុចផលឱ្យពួកគេ នៅពេលដែលលោក លី ឌៀស (Bill Tai) ដែលជាអ្នកវិនិយោគល្បីឈ្មោះម្នាក់បានមើលឃើញពីការតាំងចិត្តដ៏មោះមុតរបស់ពួកគេ។ ទីបំផុត នៅឆ្នាំ ២០១៣ គេហទំព័រ Canva ត្រូវបានបើកដំណើរការជាផ្លូវការ បន្ទាប់ពីទទួលបានទុនវិនិយោគដំបូង និងបានទាក់ទាញលោក Cameron Adams ដែលជាអតីតបុគ្គលិក Google ឱ្យមកចូលរួមជាសហស្ថាបនិក និងជាអ្នកមើលការខុសត្រូវលើប្រព័ន្ធបច្ចេកវិទ្យា (Tech Co-founder)។ Canva បានរីកចម្រើនយ៉ាងគំហុក ដោយសារតែវាពិតជាបានដោះស្រាយបញ្ហារបស់អ្នកប្រើប្រាស់ពិតប្រាកដ។

គូសបញ្ជាក់ផងដែរថា បច្ចុប្បន្ន Canva មានតម្លៃខ្លួនរាប់ពាន់លានដុល្លារ និងមានអ្នកប្រើប្រាស់រាប់រយលាននាក់នៅទូទាំងពិភពលោក រីឯ Melanie Perkins បានក្លាយជាស្ត្រីម្នាក់ក្នុងចំណោមស្ត្រីដែលមានឥទ្ធិពលបំផុតក្នុងពិភពបច្ចេកវិទ្យា។ រឿងរ៉ាវរបស់នាងគឺជាមេរៀន និងជាការដាស់តឿនដ៏មានតម្លៃមួយសម្រាប់អ្នកចង់បង្កើតអាជីវកម្ម ឬកំពុងរៀនបច្ចេកវិទ្យាដំបូងៗថា៖“ភាពជោគជ័យមិនមែនកើតឡើងក្នុងរយៈពេលមួយយប់នោះទេ គឺវាទាមទារការអត់ធ្មត់ ការចាប់ផ្តើមពីចំណុចតូចៗ និងការហ៊ានធ្វើខុស។ បើអ្នកមានគំនិត ត្រូវហ៊ានសាកល្បង ធ្វើវាឱ្យដំណើរការសិន រួចចាំកែសម្រួលតាមក្រោយ ព្រោះមានតែអ្នកមិនធ្វើអ្វីសោះទេ ទើបមិនចេះខុស”។