ជារឿងធម្មតា ប្រជាជននៅឌូបៃគឺស្រឡាញ់រថយន្តជាងគេបំផុតក្នុងចំណោមសម្ភារ:និយមទាំងអស់ ហើយគ្មានអ្វីចម្លែកនោះទេអ្នកមានភាគច្រើនគឺតែងតែចូលចិត្តទៅលេងទីក្រុងឌូបៃ ដោយសារមានកន្លែងដើរលេងកម្សាន្តជាច្រើន និងមានភាពប្លែកភ្នែក និយាយរួមប្រៀបបានជាទីកន្លែងអ្នកមានប្រមូលផ្តុំគ្នាអញ្ចឹង។ ហើយអ្វីកាន់តែពិសេសសម្រាប់អ្នកចូលចិត្តរថយន្ត គឺតែងតែទៅទស្សនានៅសារមន្ទីរថយន្តទាំង ៣០០០គ្រឿង របស់លោកតាអាយុ ៥០ឆ្នាំ គឺ លោក Sheikh Hamad binHamdan Al Nahyan ។
លោកតា Hamad គឺជាមនុស្សស្រឡាញ់គ្រឿងយន្តជាខ្លាំង ទើបគាត់បានចំណាយពេលជាច្រើនទសវត្សរ៍ក្នុងជីវិតរបស់គាត់ដើម្បីតែរកទិញរថយន្ត ហើយរថយន្តដែលគាត់ចូលចិត្តនោះ គឺជាប្រភេទរថយន្តកែច្នៃ ប្លែកៗ និងរថយន្តដែលផលិតមានចំនួនតិច ដើម្បីយកមកទុកដាក់ក្នុងសារមន្ទី The Emirates National Auto Museum របស់គាត់នៅ Abu Dhabi ។
ចំណោមរថយន្តដែលលោកតា Hamad បានរក្សាទុក មានរថយន្ត១គ្រឿង ឈ្មោះថា dodge ដែលមានទំហំធំជាងបង្អោះលើពិភពលោក ហើយរថយន្តនេះដែរ មានទាំងបន្ទប់គេង បន្ទប់ទឹក និងបន្ទប់ទទួលភ្ញៀវ មិនតែប៉ុណ្ណោះវាអាចបើកលើផ្លូវលើវាលខ្សាច់បានទៀតផង។
កាន់ប្លែកជាងនេះទៅទៀត គឺលោកតាមានទាំងរថយន្តដែលមានកង់៦ របស់ក្រុមហ៊ុន Nissan ដែលមានឈ្មោះថា Nissan Jack Up car មានសមត្ថភាពអាចលើកម្ពស់កង់ហើបពីដី ១ម៉ែត្រ ។ ចំពោះរូបរាងរថយន្តកង់ ៦នេះពិតប្លែកពីរថយន្តដទៃខ្លាំងណាស់ អាចនិយាយបានថាកម្របានឃើញ ព្រោះវាមានតែមួយគាត់នៅក្នុងដៃរបស់លោកតា Hamad ។
រថយន្តមួយទៀតដែលបងប្អូនមិនធ្លាប់បានឃើញនិងបានឮពីមុនមកគឺជារថយន្តដែលមានរាងជាភពផែនដី ហើយក្នុងរថយន្តនេះដែរគឺមានបន្ទប់គេងរហូតដល់ ៩ ។ ដូច្នេះយើងសាកស្រមៃបានថារថយន្តដែលមានបន្ទប់៩ មានទំហំប៉ុណ្ណា ដូច្នេះហើយរថយន្តរាងផែនដីនេះត្រូវបានគេដាក់តាំងនៅផ្នែកខាងមុខច្រកចូលនៃសារមន្ទី ។
មិនទាន់អស់ឡើយ គាត់ក៏មាននូវរថយន្តប្រភេទ Monster Truck ដូចជារថយន្តរបស់ GMC ដែលកង់របស់វាសមត្ថភាពអាចបើកបរលើទឹកបានទៀត និងរថយន្តរបស់ Mercedes 4X4 ដែលមានកង់ទាំង ៤ មានទំហំធំជាងមនុស្ស ហើយរថយន្តផ្សេងៗ ដូចជា ឡាន Jeep យោធារបស់អាមេរិកខ្នាតយក្ស និងរថយន្តរបស់ប៉ូលីសជាច្រើនស៊េរី លោកតា Hamad បានប្រមូលចូលសារមន្ទីរបស់គាត់សឹងតែទាំងអស់ មិនឲ្យបាត់ម៉ូដែលណាឡើយ ក្រៅពីនេះមានរថយន្តបុរាណជាច្រើនទៀត សូម្បីតែរថយន្តដែលបានបង្កើតឡើងដំបូងគេក៏មាននៅក្នុងសារមន្ទីនោះផងដែរ៕
ប្រភព៖ medium ,
អត្ថបទដោយ៖ ព្រឹម ភក្តី
