កាលពីថ្ងៃទី០៨ ខែឧសភា ឆ្នាំ២០២៦ កន្លងទៅនេះ មន្ទីរបញ្ចកោណសហរដ្ឋអាមេរិក (The Pentagon) បានធ្វើឱ្យពិភពលោកមានការចាប់អារម្មណ៍យ៉ាងខ្លាំង បន្ទាប់ពីបានសម្រេចចិត្តទម្លាយសំណុំឯកសារសម្ងាត់ វីដេអូ និងរូបថតពាក់ព័ន្ធនឹង «វត្ថុហោះហើរមិនអាចកំណត់អត្តសញ្ញាណបាន» ឬ UFO មកពីស្ថាប័នសហព័ន្ធផ្សេងៗ។ អ្វីដែលគួរឱ្យកត់សម្គាល់នោះ គឺឯកសារមួយចំនួនមានកាលបរិច្ឆេទតាំងពីចុងទសវត្សរ៍ឆ្នាំ ១៩៤០ មកម្ល៉េះ ហើយត្រូវ បានបញ្ជាក់ថាជាភស្តុតាងដែលមិនធ្លាប់ត្រូវបានគេទម្លាយពីមុនមក។
ដើម្បីបង្កើនតម្លាភាព រដ្ឋាភិបាលអាមេរិកបានបង្កើតគេហទំព័រផ្លូវការថ្មីមួយ ដែលអនុញ្ញាតឱ្យសាធារណជនទូទាំងពិភពលោកអាចចូលពិនិត្យ និងសិក្សាភស្តុតាងទាំងនោះបានដោយសេរី ដោយមិនចាំបាច់មានការអនុញ្ញាតពិសេសដូចពេលមុនឡើយ។ យោងតាមសេចក្តីថ្លែងការណ៍របស់មន្ទីរបញ្ចកោណ បានឱ្យដឹងថា ប្រជាពលរដ្ឋអាចចូលមើលឯកសារដើម រូបថត និងវីដេអូបាតុភូតមិនអាចកំណត់អត្តសញ្ញាណបាន (UAP) ទាំងអស់ដែលត្រូវបានប្រមូលផ្តុំពីគ្រប់ស្ថាប័នរដ្ឋាភិបាលអាមេរិកនៅទីតាំងតែមួយ។
ទោះបីជាការបញ្ចេញទិន្នន័យនេះ មិនទាន់អាចសន្និដ្ឋានជាផ្លូវការថាជាភស្តុតាងនៃជីវិតក្រៅភព ឬមនុស្សភពផ្កាយ ១០០% ក៏ដោយ ប៉ុន្តែវាបានបង្ហាញយ៉ាងច្បាស់អំពីវត្តមាននៃវត្ថុហោះហើរដែលមានបច្ចេកវិទ្យាចម្លែក និងសមត្ថភាពផ្លាស់ទីក្នុងល្បឿនលឿនខុសពីធម្មតានៅលើអាកាស។ ជាមួយគ្នានេះ ក្រសួងការពារជាតិអាមេរិកក៏បានប្តេជ្ញាចិត្តថា នឹងបន្តផ្ទៀងផ្ទាត់ និងបញ្ចេញសំណុំឯកសារសម្ងាត់ដែលនៅសេសសល់ជាបន្តបន្ទាប់ទៀតនាពេលខាងមុខ។
សម្រាប់អ្នកដែលមានបំណងចង់ស្វែងយល់បន្ថែម ឬទស្សនាបណ្តុំវីដេអូ និងឯកសារភស្តុតាងជាក់ស្តែងដែលថតបានក្នុង និងក្រៅលំហអាកាស អាចចូលទៅកាន់គេហទំព័រផ្លូវការរបស់មន្ទីរបញ្ចកោណ និងការិយាល័យ AARO (All-domain Anomaly Resolution Office) បាន។
- UNITED STATES: Courtesy Video Naval Air Systems Command
UNITED STATES: All Domain Anomaly Resolution Office
UNITED STATES: Courtesy Video Naval Air Systems Command
