លោក Ming-Chi Kuo (អ្នកវិភាគទីផ្សារបច្ចេកវិទ្យាដ៏ល្បីល្បាញបំផុតក្នុងពិភពលោក) បានប្រាប់ឱ្យដឹងថា OpenAI បានបោះជំហានកាន់តែជ្រៅក្នុងវិស័យ Hardware ដោយគ្រោងនឹងដាក់សម្ពោធស្មាតហ្វូនដំបូងរបស់ខ្លួននៅឆ្នាំ ២០២៨។ អ្វីដែលគួរឱ្យចាប់អារម្មណ៍នោះគឺ ការផលិតនេះនឹងមិនមែនត្រឹមតែជាស្មាតហ្វូនដែលមានមុខងារ AI បន្ថែមនោះទេ ប៉ុន្តែជាឧបករណ៍ដែលនឹងផ្លាស់ប្តូរទម្លាប់ប្រើប្រាស់ App ទាំងស្រុង។

ចំណុចគន្លឹះសំខាន់ៗនៃស្មាតហ្វូន AI របស់ OpenAI៖

•  បច្ចេកវិទ្យា AI Agent ជំនួសឱ្យ Apps៖ ស្មាតហ្វូននេះនឹងផ្តោតលើ "AI Agent" ដែលមានសមត្ថភាពយល់ដឹងពីបរិបទ (Context-aware)។ អ្នកប្រើប្រាស់មិនចាំបាច់ចុចបើកកម្មវិធីនីមួយៗនោះទេ គឺគ្រាន់តែប្រើបញ្ជាសម្លេង ឬប្រាប់ពីតម្រូវការ នោះ AI នឹងចាត់ចែងកិច្ចការគ្រប់យ៉ាងជំនួសអ្នកដោយស្វ័យប្រវត្តិ។
•   ការរចនាដោយអតីតអ្នករចនា iPhone៖ គម្រោងនេះមានការចូលរួមពីលោក Jony Ive (អតីតប្រធានផ្នែករចនារបស់ Apple) តាមរយៈក្រុមហ៊ុន LoveFrom របស់លោក ដែលធ្វើឱ្យគ្រប់គ្នារំពឹងថា ស្មាតហ្វូននេះនឹងមានរូបរាងប្លែក និងទាក់ទាញបំផុត។
• កិច្ចសហការជាមួយក្រុមហ៊ុនបន្ទះឈីបយក្ស៖ OpenAI ត្រូវបានគេរាយការណ៍ថា កំពុងសហការជាមួយ MediaTek និង Qualcomm ដើម្បីផលិតបន្ទះឈីបផ្ទាល់ខ្លួន (Custom Chips) ហើយក្រុមហ៊ុន Luxshare នឹងក្លាយជាអ្នកតម្លើងផ្តាច់មុខ។

ព័ត៌មានលម្អិតនៃលក្ខណៈបច្ចេកទេស និងដៃគូផ្គត់ផ្គង់នឹងត្រូវបញ្ចប់នៅចុងឆ្នាំ ២០២៦ ឬដើមឆ្នាំ ២០២៧ ខាងមុខនេះ ហើយការផលិតទ្រង់ទ្រាយធំនឹងចាប់ផ្តើមនៅឆ្នាំ ២០២៨ តទៅ។ 

គូសបញ្ជាក់ផងដែរថា នាយកប្រតិបត្តិ OpenAI លោក Sam Altman ក៏បានបង្ហើបនៅលើបណ្តាញសង្គម X ដែរថា៖ "វាដល់ពេលដែលត្រូវគិតគូរឡើងវិញយ៉ាងហ្មត់ចត់ អំពីរបៀបដែលប្រព័ន្ធប្រតិបត្តិការ និងផ្ទៃកម្មវិធី (UI) ត្រូវបានរចនាឡើង" ។