កាលពីថ្មីៗកន្លងទៅនេះធនាគារស្វីសបានប៉ាន់ប្រមាណថា សហរដ្ឋអាមេរិកបានបង្កើតមហាសេដ្ឋីថ្មីប្រមាណ ៣៧៩.០០០ នាក់ កាលពីឆ្នាំមុន ឬច្រើនជាងមួយពាន់នាក់ក្នុងមួយថ្ងៃ ដែលជាការកើនឡើង ១.៥%។

ចំនួនប្រជាជនមហាសេដ្ឋីរបស់អាមេរិកបានកើនឡើង ៣៧៩.០០០ នាក់ សរុបមាន ២៣,៨ លាននាក់ ដែលច្រើនជាងប្រទេសដទៃទៀត នេះបើយោងតាមការសិក្សាថ្មីមួយរបស់ UBS។ កំណើនទ្រព្យសម្បត្តិភាគច្រើនបានមកពីទីផ្សាររឹងមាំ និងប្រាក់ដុល្លារមានស្ថិរភាព ដែលទាំងពីរនេះត្រូវបានរំខាននៅឆ្នាំ ២០២៥ ដោយសារសង្គ្រាមពាណិជ្ជកម្ម និងការភ័យខ្លាចចំពោះវិបត្តិសេដ្ឋកិច្ច។ លោក James Mazeau សេដ្ឋវិទូរបស់ UBS បានប្រាប់ថា ទោះបីជាក្នុងចំណោមអ្នកមានបំផុតក្នុងពិភពលោកក៏ដោយ ក៏មាន "គម្លាតទ្រព្យសម្បត្តិ" ផងដែរ។

ចិនដីគោកបានជាប់ចំណាត់ថ្នាក់ទី ២ ជាមួយនឹងចំនួនសេដ្ឋី ៦.៣ លាននាក់ កើនឡើង ២.៣% ដែលមានសេដ្ឋីថ្មីចំនួន ១៤១,០០០ នាក់។ ដោយគិតជាភាគរយ ចំនួនប្រជាជនសេដ្ឋីរបស់ប្រទេសតួកគីបានកើនឡើងច្រើនបំផុតគឺ ៨.៤% ដល់ ៨៧,០០០ នាក់។  សហរដ្ឋអាមេរិកបានបន្តនាំមុខគេ ដោយសារតែឆ្នាំដ៏ល្អសម្រាប់ Wall Street ព្រមទាំងប្រាក់ដុល្លារអាមេរិកដែលមានស្ថិរភាព។ ទោះជាយ៉ាងណាក៏ដោយ រយៈពេល ៦ ខែដំបូងនៃឆ្នាំ ២០២៥ នេះមានភាពលំបាក។ សង្គ្រាមពាណិជ្ជកម្មរបស់ប្រធានាធិបតី Donald Trump និងការភ័យខ្លាចនៃវិបត្តិសេដ្ឋកិច្ចបានធ្វើឱ្យទីផ្សារមានភាពចលាចល និងបានដាក់សម្ពាធលើប្រាក់ដុល្លារ ដែលបានធ្លាក់ចុះប្រហែល ៩% នៅឆ្នាំនេះ។

គូសបញ្ជាក់ផងដែរថា ការប្រមូលផ្តុំទ្រព្យសម្បត្តិ ឬអាចនិយាយបានថា វិសមភាពទ្រព្យសម្បត្តិ គឺមកពីការប្រមូលផ្តុំភាគច្រើន ដោយសារតែការរីកចម្រើនលើសលប់នៃវិស័យបច្ចេកវិទ្យា និងការកើនឡើងនៃ «សហគ្រិនបច្ចេកវិទ្យាធំៗ» លើវិស័យពាណិជ្ជកម្មពិភពលោក។ 

អត្ថបទដោយ៖ ងួន ឃុនណា