យោងតាមការចេញផ្សាយរបស់កាសែត CNBC មុននេះបន្តិច បានឲ្យដឹងថា Zoom ត្រូវបង្ខំចិត្ត កាត់បុគ្គលិកចំនួន ១៣០០នាក់ ស្មើនឹង១៥% នៃកម្លាំងពលកម្មក្នុងក្រុមហ៊ុនទាំងមូល ខណ: ភាគហ៊ុនរបស់ Zoom ក៏ត្រូវបិទប្រហែល ៩.៨% ដែរ។ លោក Eric Yuan នាយកប្រតិបត្តិរបស់ Zoom បានសរសេរនៅក្នុងប្លុកថា “បន្ទាប់ពីមនុស្សព្យាយាមសម្របខ្លួនទៅនឹងកូវីដ១៩ ពេលនេះក្រុមហ៊ុន ត្រូវសម្របខ្លួនទៅនឹងភាពមិនច្បាស់លាស់នៃសេដ្ឋកិច្ចពិភពលោក និងការប៉ះពាល់ដល់អតិថិជន របស់យើង។ លោកបានបន្តថា យើងបានធ្វើការដោយមិននឿយហត់ និងធ្វើឱ្យ Zoom កាន់តែប្រសើរឡើងសម្រាប់អតិថិជន។ ប៉ុន្តែ​យើង​ក៏​មាន​កំហុស​មួយ ដោយយើងពុំបានចំណាយពេលច្រើន​ដើម្បិគិតវិភាគឱ្យបានហ្មត់ចត់អំពីថ្ងៃអនាគត ឬវាយតម្លៃថាតើយើងកំពុងរីកចម្រើនប្រកបដោយនិរន្តរភាព ឬក៏អត់។”

លោកបានបន្ថែមទៀតថា ការកាត់បន្ថយនេះនឹងប៉ះពាល់ដល់គ្រប់ផ្នែកទាំងអស់នៅរបស់ Zoom ចំណែកបុគ្គលិកដែលត្រូវបញ្ឈប់ពីការងារ នឹងត្រូវផ្ដល់ជូនប្រាក់បៀវត្សន៍ចំនួន១៦សប្ដាហ៍ បូករួមទាំងកញ្ចប់ធានារ៉ាប់រងមួយចំនួនទៀត។ អ្វីដែលគួរឲ្យភ្ញាក់ផ្អើលមួយទៀតនោះ សូម្បីតែខ្លួនលោក ដែលជា​ CEO Zoom ក៏ត្រូវកាត់ប្រាក់បៀវត្សន៍៩៨% និងឈប់ទទួលយកប្រាក់ លើកទឹកចិត្ត សម្រាប់ឆ្នាំ២០២៣ នេះដែរ។

លោកក៏បានថ្លែងទាំងក្ដុកក្ដួលផងដែរថា “ក្នុងនាមជា CEO និងស្ថាបនិក Zoom ខ្ញុំពិតជាមានទំនួល ខុសត្រូវជាមួយចំពោះកំហុសទាំងអស់នេះ ហើយខ្ញុំចង់បង្ហាញទំនួលខុសត្រូវនេះ មិនត្រឹមតែជាពាក្យសំដី របស់ខ្ញុំប៉ុណ្ណោះទេ ពោលគឺតាមរយ:ទង្វើផងដែរ។"

គូសបញ្ជាក់ថា អំឡុងឆ្នាំ២០២០ និង២០២១ កន្លងទៅ Zoom ទទួលបានប្រជាប្រិយភាពច្រើន ពីសំណាក់មនុស្សជុំវិញពិភពលោក ពិសេសអ្នកត្រូវធ្វើការមកពីផ្ទះ និងការងារប្រជុំផ្សេងៗ ប៉ុន្តែក្រោយកូវីដ១៩ សាបម្ដងបន្តិចៗ ធ្វើឲ្យ Zoom ធ្លាក់ចុះ និងត្រូវប្រឈមមុខជាមួយភាព មិនប្រក្រតី នៃសេដ្ឋកិច្ចពិភពលោកទៀត៕

អត្ថបទដោយ៖ ផែន​ ផាន់ណា