យ៉ាងណាមិញ ដោយសារតែចំនួនអ្នកប្រើប្រាស់កាន់តែកើនឡើងពីមួយថ្ងៃទៅមួយថ្ងៃ ប្រាកដណាស់ចំនួនថវិការបរិច្ចាគ និងលុយដែលបានមកពីវិនិយោគគិន​មិនអាចយកមកទប់ទល់ទៅលើការចំណាយក្នុងប្រតិបត្តិការអាជីវកម្មនោះទេ ដោយហេតុនេះហើយក្រុមហ៊ុន Telegram បានសម្រេចចិត្តចាប់ផ្ដើមទាញបង្កើតមុខងារមួយចំនួនដើម្បីទាញចំណូល យកមកដំណើរការអាជីវកម្មរបស់ខ្លួនបន្ដទៀត។

ជាក់សស្ដែងកាលពីពេលថ្មីៗនេះ ក្រុមហ៊ុន Telegram បាននឹងកំពុងតែគ្រោងបញ្ចេញមុខងារថ្មី ដើម្បីសាកល្បងរកចំណូលបន្ថែម តាមរយៈការលក់រូបស្ទីឃ័រ ដែលសេវាកម្មនេះ មានឈ្មោះថា Telegram Premium ហើយសម្រាប់អ្នកដែលត្រូវធ្វើការ ដែលមុខងារនេះមាននៅក្នុងកំណែទម្រង់ថ្មីបែលតា 8.7.2 របស់ Telegram នេះបើតាមការចុះផ្សាយរបស់សារព័ត៌មាន Cnet។

ប្រភពដដែលបានឱ្យដឹងទៀតថា សម្រាប់មុខងារ Telegram Premium នេះ ខាងក្រុមហ៊ុនបានបញ្ចូលស្ទីគ័រ និងរូបភាពមានចលនាស្អាតៗជាច្រើន ហើយដើម្បីប្រើរូបភាពទាំងនេះបាន អ្នកប្រើប្រាស់ត្រូវចុះឈ្មោះបង់លុយ។ ហើយសម្រាប់តម្លៃយ៉ាងណា ខាងក្រុមហ៊ុនមិនទាន់បញ្ជាក់ឱ្យដឹងជាផ្លូវការនៅឡើយទេ។ ដោយឡែក សម្រាប់អ្នកប្រើប្រាស់ធម្មតាដែលមិនបានចុះឈ្មោះប្រើសេវាកម្ម Telegram Premium ពួកគេនឹងមិនអាចឃើញ ឬរូបភាពមានចលនា ក៍ដូចជា ស្ទីគ័រទាំងនោះឡើយ។

យ៉ាងណាក៏ដោយ សម្រាប់ Telegram Premium គ្រាន់តែជាការបង់លុយប្រើប្រាស់មុខងារ ស្ទីគ័រ និងរូបភាពមានចលនាពិសេសៗតែប៉ុណ្ណោះ ដោយឡែកសម្រាប់ការប្រើក្នុងការផ្ញើសារ អ្នកប្រើប្រាស់នៅតែអាចប្រើដោយឥតគិតថ្លៃដដែល។

ជាមួយគ្នានេះដែរ ក្រៅពីការរកចំណូលពី  មុខងារ Telegram Premium ខាងក្រុមហ៊ុន Telegram ក៏បានគិតគូរពីគម្រោង រកចំណូលបន្ថែមតាមរយៈការផ្សាយពាណិជ្ជកម្មនៅតាម Group និងតាមឆានែលធំៗដែលមានសមាជិកច្រើន ហើយចំណែកឯម្ចាស់គ្រុប​និង Channel ទាំងនោះក៏អាចបានចំណូលផងដែរ។

គួរជម្រាបងផងដែរថា បច្ចុប្បន្ននេះ Telegram មានអ្នកប្រើប្រាស់សរុបប្រមាណ ៥០០លាននាក់ ខណៈ Telegram បានជាប់ជាកម្មវិធីផ្ញើសារលេខ១ នៅកម្ពុជាក្នុងចំណោមកម្មវិធីដទៃទៀតប្រចាំឆ្នាំ២០២១៕

អត្ថបទដោយ៖ Nava Siri