លោកអ្នកប្រហែលជាបានស្គាល់ហើយថានូវយីហោនាឡិកាខ្មែរមួយដែលមានឈ្មោះថា ពូ ហើយយីហោមួយនេះគឺកំពុងតែមានមានភាពល្បីល្បាញនិងមានការគាំទ្រខ្លាំងពីសំណាក់អតិថិជនទាំងក្នុងស្រុកនិងក្រៅស្រុកផងដែរជាមួយនឹងភាពប្លែកពីគេ ស្អាត ប្រណិត ជាពិសេសមានការរួមបញ្ចូលក្បាច់រចនាដែលជាអត្តសញ្ញាណខ្មែរផងដែរ។
ដោយយោងទៅតាមបទសម្ភាសន៍រវាងក្រុមការងារចាបខៀវ Technology Cambodia ជាមួយនឹងលោក សែត ពិទួរ្យ ដែលជាស្ថាបនិករបស់ ពូ Watch ផ្ទាល់បានឲ្យដឹងថា យីហោខ្មែរមួយនេះគឺបានចាប់ផ្តើមឡើងតាំងពីឆ្នំ២០១៨ មកម្លេះ ពោលគឺបានប្រហែលជិត៥ឆ្នាំហើយ ដោយក្នុងនោះនាឡិកា ពូ គឺបាននាំចេញទៅក្រៅមិនតិចជាង១០ប្រទេសទេ ដូចជា ថៃ វៀតណាម កូរ៉េ សឹង្ហបុរី អាមេរិក និងប្រទេសផ្សេងៗទៀត។
លោកបានបន្ថែមថាចំពោះប្រទេសដែលនាំចេញទៅច្រើនជាងគេគឺ ប្រទេសកូរ៉េ បន្ទាប់មកមាន អាមេរិច និងថៃជាដើម ក្រៅពីនេះគឺជាការចែកចាយលក់នៅក្នុងស្រុកខ្មែរ។ ហើយការគាំទ្រនេះគឺដោយសារតែនាឡិកា ពូ មានភាពប្រណិតប្លែកពីគេ។
ស្ថាបនិកវ័យក្មេងរូបនេះ បានបញ្ជាក់ឲ្យដឹងបន្ថែមទៀតថា ក្បាច់ដែលលោកធ្វើការរចនាវាមកដាក់នៅលើនៅលើនាឡិកា ពូ គឺសុទ្ធសឹងតែយកចេញពចម្លាក់នៃប្រាសាទបុរាណខ្មែរ ជាពិសេសគឺប្រាសាទបន្ទាយស្រីតែម្តង ហើយសម្រាប់ឈ្មោះនីមួយៗក៏សុទ្ធសឹងតែបញ្ជាក់ពីអត្ថសញ្ញាណខ្មែរដែរ។
សម្រាប់តម្លៃនៃនាឡិកានេះគឺអាចមានតម្លៃខ្ពស់បំផុតរហូតដល់ទៅជាង៣ម៉ឺនដុល្លារឯណោះ រីឯតម្លៃទាបវិញគឺមានចាប់ពីជាង៤០០ដុល្លារឡើងទៅ ហើយគ្រប់នាឡិកានីមួយៗគឺជាការធ្វើចេញពីដៃផ្ទាល់តែម្តង ហើយអ្វីដែលកាន់តែពិសេសទៅទៀតនោះ មុននឹងចេញទៅដល់ដៃអតិថិជនគឺបានឆ្លងកាត់ម៉ាស៊ីនត្រួតពិនិត្យគុណភាពដែលមានតម្លៃថ្លៃៗមកពីបរទេសថែមទៀតផង។
អត្ថបទដោយ៖ រិន មករា
