កាលពីឆ្នាំ2020កន្លងទៅ ក្រុមហ៊ុន Apple បានធ្វើការផ្លាស់ប្តូរឈីបពី Intel processors ទៅប្រើ Apple Silicon វិញដោយដាក់ឱ្យប្រើនៅលើ Mac Computer ទាំងអស់ ហើយបច្ចុប្បន្ននេះ Apple បានបន្តប្រើឈីបនេះនៅលើ Mac Pro ទៀត ដោយគេបានកំពុងតេស្តវាជាមួយនឹងការបន្ថែម RAM កាន់តែធំជាងមុនមិនដែលធ្លាប់មាន។
ដោយយោងទៅតាមការចុះផ្សាយរបស់ Bloomberg បានឱ្យដឹងថា ចំពោះ Mac Pro ដែលប្រើទៅដោយ Apple Silicon នេះគឺអាចនឹងចេញលក់នៅក្នុងឆ្នាំ2023 តែមិនប្រាកដខែណាមួយឱ្យជាក់លាក់នោះទេ ដោយឥឡូវនេះកំពុងស្ថិតក្នុងដំណាក់កាលតេស្ត។ លើសពីនេះទៅទៀត Apple ក៏គ្រោងនឹងបង្ហាញខ្លួន Mac Mini និង MacBook Pro នៅប៉ុន្មានខែក្រោយនេះផងដែរ។
ក្នុងនោះផងដែរចំពោះ Mac Pro គឺជាប្រភេទម៉ាស៊ីនសម្រាប់ធ្វើការកម្រិតខ្ពស់ រួមជាមួយនឹងការបំពាក់ទៅដោយឈីបដែលមានកម្លាំងខ្លាំងជាងប្រភេទឈីប M2 Max រហូតដល់3ទៅ4ដង ហើយឈីបមួយនេះគឺហៅថា M2 Ultra និង M2 Extreme។ ហើយគេរំពឹងថាចំពោះ Mac Pro នេះនឹងមានជម្រើស CPU Core 24 និង 28 និង Graphic Core 76 និង 152 ក៏ដូចជា Storage 256GB ។
មិនតែប៉ុណ្ណោះ Mac Pro ដែលគេកំពុងតែតេស្តនេះគឺ អាចនឹងមាន RAM ឡើងរហូតទៅដល់ 192GB ឯណោះរួមជាមួយនឹងការប្រើប្រាស់ទៅដោយប្រព័ន្ធប្រតិបត្តិការ macOs Vetura 13.3 ផងដែរ។
យ៉ាងណាមិញសម្រាប់ Mac ពីរម៉ូឌែលទៀតដែលនឹងចេញមកមុនគេនោះគឺ MacBook Pro និង Mac Mini ក្នុងនោះផងដែរគេរំពឹងថា Apple នឹងបញ្ចេញ MacBook Pro 14អិញ និង 16អិញ ហើយ2ម៉ូឌែលនឹងបំពាក់ទៅដោយឈីប M2 Pro និង M2 Max ខណៈ M2 Max នឹងមាន 12 CPU Core ក៏ដូចជា 38 Graphic Core។ បន្តែគេនៅតែបន្តប្រើជាមួយនឹង RAM 64GB ដដែល។
រីឯ Mac Mini វិញនឹងបំពាក់មកជាមួយឈីប M2 ដូចគ្នាទៅនឹង MacBook Air និង MacBook Pro 13អិញដែរ ហើយវាក៏មាន CPU Core 8 និង Graphic Core 10 ផងដែ។
អត្ថបទដោយ៖ រិន មករា
