យ៉ាងណាក៏ដោយ សំណួរមួយដែលគួរឱ្យចាប់អារម្មណ៍នោះគឺថា​ តើអស់រយៈពេលជាង៣០ឆ្នាំមកនេះ តើ NCX លក់ម៉ូតូបានប៉ុន្មានលានគ្រឿងហើយឱ្យទៅប្រជាជនខ្មែរ?

បើតាមលោក លោក បេ​ន កៀ​ស្រ៊ី​ថា​ណា​កន (Ben Kiasrithanakorn) ប្រធាន​ក្រុមហ៊ុន N.C.X បានថ្លែងនៅក្នុងកម្មវិធីសម្ពោធម៉ូតូ Honda Dream សេរីថ្មី ២០២៣ កាលពីថ្ងៃទី ២៨ ខែតុលា ឆ្នាំ ២០២២កន្លងនេះ បានឱ្យដឹងថា អស់រយៈពេលជាង ៣០ឆ្នាំកន្លងមកនេះ Honda Dream ទទួលបានការគាំទ្រយ៉ាងខ្លាំងពីសំណាកប្រជាជនខ្មែរ និងអាចលក់ម៉ូតូសរុបបានរហូតដល់ទៅ ២,៨៥០,០០០ គ្រឿងរហូតមកដល់បច្ចុប្បន្ន។

គួរជម្រាបផងដែរថា ក្រុមហ៊ុន NCX បាននាំចូលម៉ូតូ Honda លក់ក្នុងទីផ្សារស្រុកខ្មែរតាំងតែពីឆ្នាំ ១៩៩២មកម្លេះ ហើយបច្ចុប្បន្ននេះ ម៉ូតូ Honda Dream គឺជាម៉ូតូមួយប្រភេទ ក្នុងចំណោមម៉ូតូដទៃទៀត ដែលទទួលបានការពេញនិយមយ៉ាងខ្លាំង ពីសំណាកប្រជាជនខ្មែរ។ ដោយសារតែទទួលបានការគាំទ្រខ្លាំងពីសំណាក់ប្រជាជនខ្មែរ នៅក្នុងឆ្នាំ១៩៩៩ ក្រុមហ៊ុន NCX បានបង្កើតសង្វាក់ផលិតកម្មដែលមានទីតាំងនៅកណ្ដាលរាជធានីភ្នំពេញ សម្រាប់ជាកន្លែង ផលិតនិងដំឡើងម៉ូតូ ចែកចាយក្នុងទីផ្សារប្រទេសកម្ពុជាតែម្ដង។

ដោយឡែក សម្រាប់ម៉ូតូ Honda Dream សេរីថ្មី២០២៣ ដែលទើបតែសម្ពោធជាផ្លូវការណ៍កាលពីពេលថ្មីៗ កន្លងទៅនេះ ខាងក្រុមហ៊ុន NCX បានប្រកាស ធ្វើការផ្លាស់ប្ដូររូបរាងថ្មី ជាមួយនឹងការញ៉ុកបច្ចេកវិទ្យាថ្មីជាច្រើនចូលបន្ថែមផងដែរ ដែលធ្វើឱ្យម៉ូតូ Honda Dream 2023 មានរូបរាងកាន់តែស្រស់ស្អាត និងទំនើបជាងមុន៕

ប្រភព៖ ncxhonda