ផ្លូវក្រោមទឹកដ៏វែងបំផុតនៅក្នុងប្រទេសចិនពេលនេះបានដាក់ឱ្យប្រើប្រាស់ហើយបន្ទាប់ពីចំណាយពេលក្នុងការសាងសង់អស់រយៈប្រមាណ4ឆ្នាំ។ ផ្លូវក្រោមទឹកល្បឿនលឿនរបស់ចិនមួយនេះមានចម្ងាយ10.79គីឡូម៉ែតឯណោះ។
ដោយយោងទៅតាមការចុះផ្សាយរបស់ CNN បានបញ្ជាក់ថាផ្លូវក្រោមទឹកមួយខ្សែនេះមានឈ្មោះថា Taihu Tunel ដែលធ្វើការសាងសង់លាតសន្ធឹងនៅក្រោមទន្លេ Taihu តែម្តងពោលគឺស្ថិតនៅភាគខាងកើតនៃខេត្ត ជាំងស៊ូ(Jiansu) នៃប្រទេសចិន។
ប្រភពដដែលក៏បានបន្តថា ផ្លូវមួយនេះបានចាប់ផ្តើមសាងសង់ឡើងតាំងពីថ្ងៃទី9 ខែមករា ឆ្នាំ2018 មកម្លេះ ដោយធ្វើវាជា2ខ្សែជាប់គ្នាគឺផ្លូវទៅនិងផ្លូវមក ដោយខ្សែនីមួយៗមាន3ផ្លូវសម្រាប់បើកបរដែលមានទំហំទទឹក17.45ម៉ែត្រ។លើសពីនេះទៅទៀតផ្លូវមួយនេះបានសាងសង់ឡើងដោយប្រើប្រាស់បេតុងអស់2លានឯណោះ។
អ្វីដែលកាន់តែពិសេសទៅទៀតនោះផ្លូវមួយនេះមានបំពាក់មកជាមួយនឹងភ្លើង LED ចម្រុះព័ណ៌និងរូបភាពសម្រាប់ទស្សនាត្រជាក់ភ្នែកមើលទៅដូចជាមេឃសិប្បនិម្មិត ដែលវាអាចជួយកាត់បន្ថយការនឿយហត់របស់អ្នកបើកបរទៀតផង។
គូសបញ្ជាក់ផងដែរថា ផ្លូវល្បឿនលឿនមួយខ្សែនេះគឺអាចឱ្យអ្នកធ្វើដំណើរចន្លោះពី Shanghai, Nanjing និងរាជធានី Jiangsu ដែលវាជួយសម្រួលដល់ការធ្វើដំណើរចេញពីការកកស្ទះនៅទីក្រុង។ លើសពីនេះទៅទៀតចំពោះការចំណាយទាំងមូលខ្ទង់9.9ពាន់លានយ័ន ដែលស្មើរនឹងទឹកប្រាក់ប្រមាណ 1.56ពាន់លាន$ ។
អត្ថបទដោយ៖ រិន មករា