ថ្មីៗនេះ Apple បានធ្វើការបញ្ចេញឈីបជំនាន់ថ្មីកម្លាំងខ្លាំង2ប្រភេទគឺ M2 Pro និង M2 Max ដោយប្រភេទឈីបទាំងនេះគេនឹងបំពាក់វានៅលើ MacBook Pro 14អិញ និង 16អិញ ផងដែរ។ មិនតែប៉ុណ្ណោះឈីបថ្មីទាំង2ប្រភេទនេះ Apple ថាវាអាចធ្វើការបានធ្ងន់ៗជាងមុន មិនសូវស៊ីថ្មខ្លាំងពេកហើយថែមទាំងអាចប្រើប្រាស់ជាមួយនឹង HDMI ដែលអាចបង្ហាញបានដល់កម្រិត 8K ថែមទៀតផង។
បើតាមការបង្ហាញរបស់ Apple បានឱ្យដឹងថា សម្រាប់ឈីប M2 Pro គឺមាន 12-Core CPU, GPU ឡើងដល់ 16-Core ចំណែកឯ RAM វិញគឺឡើងដល់ 32GB ឯណោះ។ លើសពីនេះទៅទៀតឈីបមួយនេះគេគឺប្រើប្រាស់ជាមួយនឹងបច្ចេកវិទ្យា 5-nanometer ហើយវាមានសមត្ថភាពខ្លាំងជាងឈីប M1 Pro ដែលមាន 10-Core CPU រហូតដល់ទៅ 20% ឯណោះ។
ជាក់ស្តែងដូចការប្រើប្រាស់ជាមួយនឹង Photoshop ជាដើមគឺវាអាចឈីប M2 Pro នេះ គឺអាចធ្វើការលឿនជាងឈីប M1 Pro រហូតដល់ទៅ 40% ហើយបើធៀបជាមួយនឹងឈីប Intel Core i9 វិញគឺវាអាចដំណើរការបានលឿនជាងរហូតដល់80% ឯណោះដែលកម្លាំងប៉ុណ្ណេះគឺអាចចាត់ទុកថាវាអាចធ្វើការលឿនដែលមិនធ្លាប់ឃើញពីមុនមកទេ។ ហើយបើនិយាយពីការប្រើប្រាស់ Xcode វិញគឺអាចដំណើរការលឿនជាង M1 Pro 25% និងលឿនជាង Intel Core i9 រហូតដល់ទៅ 2.5ដងផងដែរ។
យ៉ាងណាមិញសម្រាប់ឈីប M2 Max វិញក៏រឹតតែខ្លាំងដែរ វាមាន 12-Core CPU ប៉ុន្តែសម្រាប់ GPU វិញគឺឡើងដល់ 38-Core ឯណោះ ដូចគ្នាហើយវាមានកម្លាំងខ្លាំងជាងឈីប M1 Max រហូតដល់ទៅ20%។ លើសពីនេះទៅទៀត Apple ក៏បានបន្ថែមថាឈីប M2 Max នេះវាខ្លាំងទៅលើការធ្វើ Visual Effect, ការអភិវឌ្ឍទៅលើ Machine Learning ផ្សេងៗ, រួមជាមួយការកែររូបភាពជាដើម ពោលគឺ Apple ថាវាជាឈីបខ្លាំងបំផុតលើលោកថែមទៀតផង។
មិនតែប៉ុណ្ណោឈីប M2 Pro និង M2 Max ទាំងពីរនេះគឺនៅមានចំណុចពិសេសមួយចំនួនទៀតដូចជា៖
- ទាំងឈីប M2 Pro និង M2 Max គឺដំណើរការលឿនជាងមុន 40%
- ឈីប M2 Pro គឺមានកម្លាំងខ្លាំងក្នុងការប្រើប្រាស់ជាមួយនឹងវីដេអូប្រភេទ 264, HEVC, និងប្រភេទ ProRes ជាដើម មិនតែប៉ុណ្ណោះវាអាច Stream វីដេអូដល់កម្រិត 4K និង 8K ថែមទៀតផងដោយមិនប្រើថាមពលខ្លាំងទេ។
- ចំពោះបច្ចេកវិទ្យា ISP ចុងក្រោយរបស់ Apple ឬហៅថា Image Signal Processor គឺវាអាចធ្វើឱ្យគុណភាពនៃរូបក៏ដូចជាវីដេអូលែងសូវមាន Noise និងច្បាស់ជាងមុន។
អត្ថបទដោយ៖ រិន មករា