ជាក់ស្ដែង បើតាមការចុះផ្សាយរបស់សារព័ត៌មាន Bloomberg បានរាយការណ៍ថា ក្រុមហ៊ុន Apple នឹងលុបចោលផែនការបង្កើនការផលិតទូរសព្ទត្រកូល iPhone 14  ចំនួន ៦លានគ្រឿងនៅក្នុងឆមាសទីពីរនៃឆ្នាំនេះ។ ហើយផ្ដោតដើរតាមផែនការណ៍ចាស់ ពោលគឺគ្រោងផលិតត្រឹម ៩០លានគ្រឿងដូចឆ្នាំមុនៗដែរ។

ប្រភពដដែលបានឱ្យដឹងទៀតថា មូហេតុដែល Apple ជួបបញ្ហាខាងលើនេះ មួយផ្នែកគឺបណ្ដាលមកពីចិនដែលជាទីផ្សារស្មាតហ្វូនដ៏ធំបំផុតមួយលើលោក កំពុងតែមានសេដ្ឋកិច្ចធ្លាក់ចុះ ជាហេតុធ្វើឱ្យទូរសព្ទ iPhone 14 មានការលក់នៅចិនធ្លាក់ចុះខ្លាំងរហូតដល់ទៅ ១១% បើប្រៀបធៀបទៅនឹង iPhone ដែលចេញសេរីមុនៗ។ បន្ថែមពីនេះទៀត អតិថិជននៅចិន គិតថា iPhone 14 ធម្មតា មានរូបរាងនិងមុខងារស្រដៀងទៅនឹង iPhone 13 ដែរ។ ហេតុនេះ iPhone 14 ធម្មតាលក់មិនសូវដាច់ប៉ុន្មានទេនៅចិន ប៉ុន្ដែសម្រាប់ iPhone 14 Pro និង​ Pro Mac គឺនៅមានតម្រូវការច្រើន ជាហេតុធ្វើឱ្យ Apple កាត់បន្ថយការផលិត iPhone 14 ធម្មតា និងផ្ដោតលើការផលិត iPhone 14 Pro ជំនួសវិញ។

គួរជម្រាបផងដែរថា សម្រាប់បញ្ហាធ្លាក់ចុះនៃការលក់នេះមិនមែនកើតឡើងចំពោះតែ Apple ទេ ពោលគឺក្រុមហ៊ុនផ្សេងក៏អាចជួបបញ្ហានេះដូចគ្នា ពោលគឺបញ្ហាបណ្ដាលមកពីអតិផរណាកើនឡើងជុំវិញពិភពលោក ក៏ដូចជាបញ្ហាដែលបណ្ដាលមកពីសង្រ្គាមរវាងរុស្សីនិងអ៊ុយក្រែន ស្របពេលដែលបញ្ហាទាំងអស់នេះកំពុងតែកើតមានឡើង គេបានរំពឹងទុកថា នៅក្នុងឆ្នាំនេះទីផ្សារស្មាតហ្វូនពិភពលោក នឹងធ្លាក់ចុះ ៦.៥%៕