ថ្លែងនៅក្នុងវេទិកា Global Mobile Broadband Forum 2022 (MBBF2022) នៅឯងទីក្រុងបាងកកប្រទេសថៃ លោក Yang Chaobin ប្រធានក្រុមហ៊ុន Huawei ICT Products & Solutions និង Huawei Wireless Solution បានលើកឡើងថា 5G កំពុងតែរីកចម្រើនយ៉ាងខ្លាំង ស្របពេលដែលបច្ចុប្បន្ននេះ ​គេកំពុងតែជំរុញការអភិវឌ្ឍន៍ឱ្យពិភពលោកអាចភ្ជាប់  5G បានគ្រប់ប្រេកង់ និងមានល្បឿនដំណើរការពេញលេញផងដែរ។

លោក Yang Chaobin បានលើកឡើងបន្ថែមទៀតថា សេវាអ៊ីនធឺណិតល្បឿនលឿន បានជួយឱ្យអ្នកប្រើប្រាស់អ៊ីនធឺណិតជុំវិញពិភពលោក អាចអាចមើលវីដេអូចាប់ពីកម្រិតកម្រិត HD ដែលមានរូបភាពច្បាស់ និងទទួលបានបទពិសោធន៍កាន់តែប្រសើរជាងមុនក្នុងប្រើប្រាស់អ៊ីនធឺណិត។​ ដោយនៅក្នុងសម័យ 5G នេះមនុស្សទូទាំងពិភពលោកប្រមាណ ៦០% អាចមើលវីដេអូកម្រិត HD តាមរយៈទូរសព្ទដៃបានយ៉ាងងាយស្រួល។ បន្ថែមពីនេះទៀត វាក៏បានជួយសម្រួលឱ្យបុគ្គលិកជុំវិញពិភពលោកអាចធ្វើការបានកាន់តែងាយស្រួលជាងមុន និងបានធ្វើឱ្យមានការផ្លាស់ប្ដូរឱ្យកាន់តែមានភាពងាយស្រួលនិងទំនើបជាងមុនស្ទើរតែគ្រប់ផ្នែកវិស័យផងដែរ។

យ៉ាងណាក៏ដោយ ទោះបីជា 5G ជាសេវាអ៊ីនធឺណិតល្បឿនលឿនដែលមនុស្សនឹងប្រើបន្ទាប់ពី 4G ក៏ពិតមែន ប៉ុន្ដែបច្ចុប្បន្ននេះ បើតាមក្រុមហ៊ុន Huawei សេវា 5G ទើបតែគ្របដណ្ដប់បាន២៩% ប៉ុណ្ណោះទូទាំងសាកលលោក ខណៈ 4G បានគ្របដណ្ដប់ដល់ទៅ៩២%។ ហើយគេត្រូវរកដំណោះស្រាយបន្ថែមដើម្បីឱ្យ 5G អាចគ្របដណ្ដប់ជុំទូទាំងពិភពលោកបាន។

បើតាមលោក Yang Chaobin មូលហេតុដែលធ្វើឱ្យ​ 5G មិនទាន់គ្របដណ្ដប់ទូទាំងពិភពលោកបាននោះ គឺដោយសារតែដើម្បីអាចដាក់ឱ្យប្រើប្រាស់ 5G ក្រុមហ៊ុនសេវាទូរសព្ទត្រូវធ្វើការបន្ថែមទំហំល្បឿនអ៊ីនធឺណិតរបស់ខ្លួនឱ្យកាន់តែធំដល់កម្រិត 5G។ ប៉ុន្ដែអ្វីដែលជាបញ្ហានោះ គឺលក្ខកខណ្ឌឧបករណ៍ផ្ទុកនិងទទួលអ៊ីនធឺណិតបច្ចុប្បន្ននេះ មិនអាចបន្ថែមទំហំអ៊ីនធឺណិតឱ្យធំដល់ 5G ឱ្យដំណើរបានស្រួលនោះទេ ពោលគឺព្រោះតែឧបរកណ៍សេរីចាស់ត្រូវចំណាយថាមពលភ្លើងអគ្គិសនីកាន់តែខ្លាំងប្រសិនបើគេបន្ថែមទំហំល្បឿនអ៊ីនធឺណិត ដែលបណ្ដាលឱ្យថ្លៃចំណាយកាន់តែកើនឡើងច្រើន។ ហេតុនេះហើយទើបបានជាប្រទេសជាច្រើនមិនទាន់មាន 5G ប្រើពេញលេញ។

គោលគំនិត ONE 5G

ជាដំណោះស្រាយចំពោះបញ្ហាធំៗពីរខាងលើនេះ លោក Yang Chaobin  តំណាងឱ្យក្រុមហ៊ុ​ន Huawei បានប្រកាសពីបច្ចេកវិទ្យាថ្មីឈ្មោះថា MetaAAU ជាបច្ចេកវិទ្យាជំនាន់ទី៣ (5G RAN) ចុងក្រោយបំផុតរបស់ក្រុមហ៊ុន Huawei ប្រើប្រាស់អង់តែន ​massive MIMO លើបង់ (Band) 3.5 GHz (TDD) និងភ្ជាប់ជាមួយអារេអង់តែនដ៏ធំបំផុត (ELAA) ដែលធ្វើឱ្យវិសាលភាពអាចគ្របដណ្ដប់បានកាន់តែធំ។

ឧបរកណ៍បច្ចេកវិទ្យាថ្មីរបស់ក្រុមហ៊ុន​ Huawei នេះទៀតសោត នឹងជួយឱ្យក្រុមហ៊ុនសេវាទូរសព្ទអាចបន្ថែមទំហំបង់ (Band) ល្បឿនអ៊ីនធឺណិតបានកាន់តែធំ (High-Bandwidth) និងអាចធ្វើការផ្ទេរទិន្នន័យបានកាន់តែលឿនផងដែរ។ ហើយអ្វីកាន់តែពិសេសនោះ សម្រាប់បច្ចេកវិទ្យាថ្មីនេះ អាចជួយកាត់បន្ថយការប្រើប្រាស់ថាមពលអគ្គិសនីតិចជាងមុនដល់ទៅ ៣០% ឯណោះ។​

បើតាមលោក Yong បានថ្លែងទាំងមានមោទកភាពថា «ក្រុមហ៊ុនទូរគមនាគមន៍អ៊ឺរ៉ុបបានធ្វើការសាកល្បងយ៉ាងយកចិត្តទុកដាក់លើឧបករណ៍ផ្សេងៗគ្នា ហើយជាលទ្ធផលគេរកឃើញថា ឧបរកណ៍បច្ចេកវិទ្យារបស់ Huawei ប្រើប្រាស់ថាពលអគ្គិសនីតិចជាង ២០% បើប្រៀបធៀបទៅនឹងឧបករណ៍បច្ចេកវិទ្យាផ្សេងៗនៅលើទីផ្សារនារពេលបច្ចុប្បន្ន»។

ក្រោមគោលគំនិត ONE 5G ក្រុមហ៊ុន Huawei បាននាំមកនូវបច្ចេកវិទ្យាថ្មីដែលនឹងជួយក្រុមហ៊ុនប្រព័ន្ធទូរសព្ទជុំវិញពិភពលោកអាចពង្រីកទំហំអ៊ីនធឺណិតរបស់ខ្លួនឱ្យដល់កម្រិត 5G យ៉ាងពេញលេញ ដោយមិនបារម្ភពីបញ្ហាការចំណាយច្រើនទៅលើថាមពលអគ្គិសនីដូចមុននោះឡើយ។ ហើយដំណោះស្រាយនេះ នឹងឆ្លើយតបចំពោះបញ្ហាដែលធ្វើឱ្យក្រុមហ៊ុនសេវាទូរសព្ទជាច្រើនមិនទាន់អាចពង្រីកខ្លួនទៅកាន់ 5G ឱ្យបានពេញលេញ។

គួរជម្រាបផងដែរថា ចាប់តាំងពីងបង្កើតឡើងនៅក្នុងឆ្នាំ១៩៨៧ មក ក្រៅពីផលិតទូរសព្ទដៃ ក្រុមហ៊ុន Huawei ក៏ជាក្រុមហ៊ុនបច្ចេកវិទ្យាមួយ ដែលធ្វើការស្រាវជ្រាវភិវឌ្ឍន៍ទៅលើបច្ចេកវិទ្យាព័ត៌មាន និងទំនាក់ទំនង (ICT) និងឧបករណ៍ឆ្លាតវៃ (Smart Devices)។​ ដោយ Huawei ធ្លាប់បានធ្វើការសហការណ៍ជាមួយប្រទេសជាច្រើន រួមទាំងប្រទេសកម្ពុជា ក្នុងការបង្កើតហេដ្ឋារចនាសម្ព័ន្ធបច្ចេកវិទ្យាជាច្រើន ជាពិសេសគឺការអភិវឌ្ឍន៍ទៅលើបច្ចេកវិទ្យាទូរគមនាគមន៍ និងបណ្ដាញតែម្ដង។ ហើយសម្រាប់ការប្រកាសចេញបច្ចេកវិទ្យាថ្មី បូករួមនឹងគោលគំនិត One 5G ខាងលើ ក្រុមហ៊ុន Huawei រំពឹងថា អាចឆ្លើយតបចំពោះបញ្ហា និងអាចជួយក្រុមហ៊ុនទូរសព្ទនៅតាមបណ្ដារប្រទេសអាចពង្រីកទំហំអ៊ីនធឺណិតដល់ 5G សម្រាប់ផ្ដល់សេវាកម្មឱ្យអ្នកប្រើក្នុងប្រទេស ដោយមិនបារម្ភពីបញ្ហាចំណាយច្រើនទៅលើអគ្គិសនីដូចមុន។ ហើយ ក្រុមហ៊ុន Huawei រំពឹងថា តាមរយៈកិច្ចខិតខំប្រឹងប្រែងនេះ នឹងជួយជំរុញឱ្យ 5G អាចគ្របដណ្ដប់ទូទាំងពិភពលោក ក្នុងពេលដ៏ខ្លីខាងមុខនេះ៕