ក្រុមហ៊ុន វ៉ុលវ៉ូ គ្រុប មានផែនការបញ្ឈប់បុគ្គលិកចំនួន ៨០០នាក់ នៅរោងចក្រចំនួនបីក្នុងសហរដ្ឋអាមេរិក ក្នុងរយៈពេលបីខែខាងមុខ ដោយសារតែភាពមិនច្បាស់លាស់នៃទីផ្សារ និងការព្រួយបារម្ភអំពីតម្រូវការ ស្របពេលដែលប្រធានាធិបតី ដូណាល់ ត្រាំ ដាក់ពន្ធគយ នេះបើតាមអ្នកនាំពាក្យបាននិយាយកាលពីថ្ងៃសុក្រ។
នៅថ្ងៃទី ១៨ ខែមេសា ឆ្នាំ២០២៥ យោងតាមសារព័ត៌មានរ៉យទ័របានប្រាប់ឲ្យដឹងថា ក្រុមហ៊ុន វ៉ុលវ៉ូ គ្រុប មានផែនការបញ្ឈប់បុគ្គលិកចំនួន ៨០០នាក់ នៅរោងចក្រចំនួនបីក្នុងសហរដ្ឋអាមេរិក ក្នុងរយៈពេលបីខែខាងមុខនេះ។
ក្រុមហ៊ុន វ៉ុលវ៉ូ គ្រុប អាមេរិកខាងជើង បាននិយាយនៅក្នុងសេចក្តីថ្លែងការណ៍មួយថា ខ្លួនបានប្រាប់បុគ្គលិកអំពីផែនការបញ្ឈប់មនុស្សចំនួន ៥៥០ ទៅ ៨០០នាក់ នៅទីតាំង ម៉ាក ត្រាក់ស៍ (Mack Trucks) របស់ខ្លួន ក្នុងទីក្រុង ម៉ាកាន់ជី (Macungie) រដ្ឋ ផេនស៊ីលវេនៀ (Pennsylvania) និងរោងចក្រ វ៉ុលវ៉ូ គ្រុប ពីរផ្សេងទៀត ក្នុងទីក្រុង ឌូប្លិន (Dublin) រដ្ឋ វើជីនៀ (Virginia) និង ហាហ្គឺស្តោន (Hagerstown) រដ្ឋ ម៉េរីលែន (Maryland)។
ក្រុមហ៊ុនដែលជាផ្នែកមួយនៃក្រុមហ៊ុន AB Volvo របស់ប្រទេសស៊ុយអែត (VOLVb.ST) ដែលជួលបុគ្គលិកជិត ២០,០០០នាក់ នៅអាមេរិកខាងជើង ។ លោក ត្រាំ បានរុះរើប្រព័ន្ធពាណិជ្ជកម្មសកលដែលបានដំណើរការអស់រយៈពេលជាង ៧៥ឆ្នាំ ជាមួយនឹងផែនការដាក់ពន្ធគយលើផលិតផលពីទូទាំងពិភពលោក។ គោលនយោបាយពាណិជ្ជកម្មដែលមិនច្បាស់លាស់របស់លោកបានធ្វើឱ្យប៉ះពាល់ដល់ទំនុកចិត្តអ្នកប្រើប្រាស់ និងអាជីវកម្ម ហើយបានធ្វើឱ្យអ្នកសេដ្ឋកិច្ចបង្កើនការព្យាករណ៍អំពីវិបត្តិសេដ្ឋកិច្ចនៅសហរដ្ឋអាមេរិក។
ការបញ្ឈប់បុគ្គលិករបស់ វ៉ុលវ៉ូ គ្រុប គឺជាការឆ្លើយតបចុងក្រោយពីឧស្សាហកម្មរថយន្ត និងរថយន្តដឹកទំនិញ ដែលកំពុងរងផលប៉ះពាល់ពីពន្ធគយរបស់ប្រធានាធិបតីមកពីគណបក្សសាធារណរដ្ឋ លើគ្រឿងបន្លាស់មួយចំនួន ដែលគេរំពឹងថានឹងបង្កើនថ្លៃដើមនៃការផលិតយានយន្ត។ អ្នកនាំពាក្យរបស់ វ៉ុលវ៉ូ គ្រុប អាមេរិកខាងជើង បាននិយាយនៅក្នុងសេចក្តីថ្លែងការណ៍តាមរយៈអ៊ីមែលថា "ការបញ្ជាទិញរថយន្តដឹកទំនិញធុនធ្ងន់នៅតែបន្តរងផលប៉ះពាល់អវិជ្ជមានដោយសារតែភាពមិនច្បាស់លាស់នៃទីផ្សារអំពីអត្រាដឹកជញ្ជូន និងតម្រូវការ ការផ្លាស់ប្តូរបទប្បញ្ញត្តិដែលអាចកើតមាន និងផលប៉ះពាល់នៃពន្ធគយ"។
