ស្របពេលជាមួយនឹងការរីកចម្រើននៃបច្ចេកវិទ្យា AI អ្នកដែលចង់ផលិតមាតិការជាពិសេសការផលិតវីដេអូគឺមិនចាំបាច់ត្រូវតែចេញមុខឯងក៏បានដែរ ពោលគឺយើងអាចប្រើប្រាស់បច្ចេកវិទ្យា AI ដើម្បីឲ្យវាជួយផលិតឲ្យយើងបានទៅតាមចំណង់ចំណូលចិត្ត ទៅតាមអ្វីដែលយើងកំណត់ និងចំណេញពេលវេលាថែមទៀត។
លើសពីនេះទៅទៀត វាថែមទាំងអាចធ្វើការបកប្រែភាសានៃវីដេអូរបស់យើងទៅជាភាសាផ្សេងៗទៀតក៏បានដែរ ដូច្នេះភាសាក៏លែងរបាំងរារាំងការធ្វើវីដេអូរបស់យើងទៀតហើយ។ ក្នុងអត្ថបទមួយនេះអ្នកទាំងអស់គ្នានឹងស្គាល់ពីវេបសាយល្បីៗចំនួន៥ដែលវាអាចជួយបង្កើតវីដេអូ តាមអ្វីដែលអ្នកចង់បាន។
1, HyGen
សម្រាប់វេបសាយ AI ទីមួយនេះគឺមាន Tools ក៏ដូចជាមុខងារច្រើនសម្រាប់ឲ្យយើងធ្វើការប្រើប្រាស់ជាក់ស្តែងដូចជា៖ AI Avatar, AI Voice, Video Translate, និងមុខងារជាច្រើនទៀត ដោយមុខងារទាំងអស់នេះគឺអនុញ្ញាតឲ្យយើងបង្កើតជាតួអង្គសិប្បនិម្មិត្ត បង្កើតសំឡេងសិប្បនិម្មិត្ត ឬក៏ការបកប្រែវីដេអូដែលយើងនិយាយទៅជាភាសាផ្សេងទៀតក៏បានដែរ ហើយអ្វីដែលកាន់តែពិសេសវេបសាយមួយនេះបច្ចុប្បន្នវាក៏ស្គាល់ជាមួយនឹងភាសាខ្មែររបស់យើងដែរ។
2, Synthesia
ចំពោះវេបសាយ AI ទី២នេះក៏មានសមត្ថភាពមិនចាញ់ជាមួយនឹងអាទីមួយដែរពោលគឺវាមានមុខងារច្រើន តាមតម្រូវការប្រើប្រាស់របស់យើងដូចជា៖ មុខងារបង្កើត Avatar មុខងារបង្កើតសំឡេងសិប្បនិម្មិតតាមរយៈការបញ្ចូលអត្ថបទ មានមុខងារសម្រាប់ឲ្យកាត់វីដេអូនៅលើវេបសាយនេះថែមទៀត។ ដូច្នេះពេលដែលយើងប្រើ AI ឲ្យបង្កើតវីដេអូរួចហើយ យើងក៏អាចកែសម្រួលវីដេអូបានភ្លាមៗនៅលើវេបសាយនេះតែម្តង។
3, Runway
វេបសាយ AI មួយនេះក៏អាចធ្វើឲ្យអ្នកទាំងអស់គ្នាចំហមាត់បានដែរ ព្រោះថាវាមានសមត្ថភាពសាហាវអាចបង្កើតវីដេអូតាមការស្រមើស្រមៃ ចេញមកសឹងដូចការពិត ពោលគឺយើងគ្រាន់តែបញ្ចូលពាក្យឬឃ្លាណាដែលយើងចង់ឲ្យ AI វាបង្កើតវីដេអូ នោះវានឹងបង្កើតទៅតាមអ្វីដែលយើងចង់បានភ្លាមតែម្តង។
លើសពីនេះទៅទៀត មិនត្រឹមតែការបង្កើតវីដេអូតែប៉ុណ្ណោះទេវាថែមទាំងអាចបង្កើតជារូបភាព អាចបំប្លែងវីដេអូដែលយើងមានស្រាប់ទៅជាវីដេអូបែបផ្សេងៗ អាចបង្កើតសំឡេង រួមទាំងអាចបំប្លែងកម្រិតគុណភាពវីដេអូថែមទៀត។
4, Fliki
សម្រាប់ Fliki ក៏មាន tools ច្រើនគួរសម ទាក់ទងទៅជាមួយនឹងការផលិតវីដេអូវាក៏អាចធ្វើការងារបានច្រើនដែរដូចជាការ បំប្លែងពីគំនិតដែលយើងមានទៅជាវីដេអូ បំប្លែងពីពាក្យឬឃ្លាផ្សេងៗទៅជាវីដេអូ អាចចម្លងសំឡេងរបស់យើងបាន រួមជាមួយសម្រាប់ជួយសម្រួលការងារជាច្រើនទៀតដែលអ្នកទាំងអស់គ្នាអាចសាកចូលទៅប្រើប្រាស់ខ្លួនឯងបាន។
5, Topview
ចុងក្រោយគឺ Topview ដែលវេបសាយមួយនេះរាងប្លែកពីគេបន្តិចត្រង់ថាវាអាចកាត់វីដេអូផ្សេងៗឲ្យុទៅជាវីដេអូខ្លីៗបានពោលគឺយើងគ្រាន់តែ Paste Link វីដេអូទាំងនោះចូល ហើយវាអាចបង្កើតជា script សម្រាប់ធ្វើវីដេអូ រួមជាមួយនឹងមុខងារបង្កើសំឡេងថែមទៀត ដូច្នេះគឺអាចប្រើបានច្រើនទម្រង់។
គូសបញ្ជាក់ផងដែរថាសម្រាប់វេបសាយទាំងអស់នេះគឺវានឹងគិតលុយប្រសិនបើយើងប្រើច្រើន ឬលើសកំណត់ដែលគេឲ្យ មានន័យថាគេឲ្យជា Credits មកយើងដើម្បីប្រើប្រាស់ ក្នុងករណីយើងប្រើប្រាស់អស់វានឹងត្រូវឲ្យយើងទិញដើម្បីប្រើតទៀត។
អត្ថបទដោយ៖ រិន មករា