ភ្នំពេញ ថ្ងៃទី១៥ ខែឧសភា ឆ្នាំ២០២៥ - ជាពេលដ៏គួរឲ្យមោទនៈសម្រាប់ប្រព័ន្ធអេកូឡូស៊ី Startup ដែលកំពុងរីកចម្រើនខ្លាំងនៅកម្ពុជា សហគ្រិនវ័យក្មេងកម្ពុជាបីរូបទទួលបានកន្លែងមួយនៅក្នុងបញ្ជីឈ្មោះ “៣០ ក្រោម ៣០ អាស៊ី” (30 Under 30 Asia) ប្រចាំឆ្នាំ២០២៥ របស់ទស្សនាវដ្តីល្បីល្បាញ Forbes។
លោក ស៊ូ សេដ្ឋី កញ្ញា ស៊ូ ស្រីពៅ និងកញ្ញា អ៊ុង លីឡាយ ដែលជាសហស្ថាបនិករបស់ Jalat Logistics ដែលជាក្រុមហ៊ុនផ្តល់សេវាកម្មដឹកជញ្ជូន B2B (អាជីវកម្មទៅអាជីវកម្ម) ដំណាក់កាលចុងក្រោយដែលកំពុងរីកចម្រើនយ៉ាងឆាប់រហ័សនៅកម្ពុជា ត្រូវបានជ្រើសរើសពីបេក្ខជនរាប់ពាន់នាក់ ដើម្បីចូលរួមជាមួយនឹងបុគ្គលត្រួសត្រាយផ្លូវចំនួន ៣០០ នាក់ផ្សេងទៀតនៅទូទាំងទ្វីបអាស៊ី ដែលត្រូវបានគេទទួលស្គាល់ចំពោះភាពឆ្នើម និងឥទ្ធិពលរបស់ពួកគាត់នៅក្នុងវិស័យរៀងៗខ្លួន។
ពួកគាត់ត្រូវបានទទួលស្គាល់ទៅលើផ្នែក “ការលក់រាយ និងពាណិជ្ជកម្មអេឡិចត្រូនិក” សម្រាប់វិធីសាស្ត្រប្រកបដោយការច្នៃប្រឌិតក្នុងការផ្លាស់ប្តូរវិស័យដឹកជញ្ជូននៅក្នុងប្រទេសតាមរយៈបច្ចេកវិទ្យា និងដំណោះស្រាយដឹកជញ្ជូនដែលត្រូវបានធ្វើមូលដ្ឋានីយកម្មសម្របទៅតាមទីផ្សារនៃប្រទេសកម្ពុជា។
បង្កើតឡើងមិនដល់បីឆ្នាំផង Jalat Logistics បានទទួលការចាប់អារម្មណ៍យ៉ាងឆាប់រហ័សចំពោះការប្រើប្រាស់ប្រតិបត្តិការដែលដំណើរការដោយបញ្ញាសិប្បនិម្មិត (AI) និងឃ្លាំងចល័ត ដែលជារ៉ឺម៉កចល័តដែលចតនៅទីតាំងយុទ្ធសាស្ត្រនានានៅទូទាំងទីក្រុង ដែលអនុញ្ញាតឲ្យអ្នកបើកបរដឹកជញ្ជូនអាចចូលទៅយកបញ្ញើបានកាន់តែជិតនឹងទីតាំងដឹកជញ្ជូន ដែលជួយពន្លឿនការដឹកជញ្ជូនក្នុងថ្ងៃតែមួយសម្រាប់សហគ្រាសធុនតូច និងមធ្យម (SMEs) យ៉ាងខ្លាំង។
លោក ស៊ូ សេដ្ឋី ដែលជានាយកប្រតិបត្តិ និងសហស្ថាបនិក បានមានប្រសាសន៍នៅក្នុងបទសម្ភាសន៍ ថា “នៅកម្ពុជា តម្រូវការពាណិជ្ជកម្មអេឡិចត្រូនិកមានការកើនឡើង ហើយបញ្ហាប្រឈមតែងតែជាការដឹកជញ្ជូនដែលអាចទុកចិត្តបាន មានតម្លៃសមរម្យ និង ល្បឿនលឿន ទាំងនៅតំបន់ទីក្រុង និងរវាងទីក្រុង”។ “យើងចង់ដោះស្រាយបញ្ហានោះដោយប្រើប្រាស់បច្ចេកវិទ្យា និងដំណោះស្រាយដែលត្រូវបានធ្វើមូលដ្ឋានីយកម្ម ដែលសមស្របសម្រាប់ហេដ្ឋារចនាសម្ព័ន្ធ អ្នកដឹកជញ្ជូន និង SMEs របស់យើង។”
អាជីវកម្មដែលទើបបង្កើតថ្មីនេះ បានទាក់ទាញចំណាប់អារម្មណ៍ពីវិនិយោគិនអន្តរជាតិនៅឆ្នាំ២០២៤ ដោយទទួលបានការផ្តល់មូលនិធិពីក្រុមហ៊ុនបច្ចេកវិទ្យាក្នុងស្រុក IG International Group ក្រុមហ៊ុន Venture Studios Satori Giants ដែលមានមូលដ្ឋាននៅសិង្ហបុរី និង X Venture Holding ដែលមានមូលដ្ឋាននៅហុងកុង ដែលជាសញ្ញាបង្ហាញពីការចាប់អារម្មណ៍យ៉ាងខ្លាំងក្នុងតំបន់ចំពោះសក្តានុពលបច្ចេកវិទ្យារបស់កម្ពុជា។
ការដាក់បញ្ចូល Jalat ទៅក្នុងបញ្ជីរបស់ Forbes បានធ្វើឲ្យពួកគាត់ស្ថិតនៅក្នុងចំណោមអាជីវកម្មដែលទើបបង្កើតថ្មីដែលមានសក្តានុពល និងប្រកបដោយការច្នៃប្រឌិតផ្សេងទៀតនៅទូទាំងទ្វីបអាស៊ី ហើយបានបញ្ចាំងពន្លឺទៅលើរលកថ្មីនៃសហគ្រិនវ័យក្មេងកម្ពុជាដែលកំពុងដោះស្រាយបញ្ហាជាក់ស្តែងជាមួយនឹងដំណោះស្រាយដែលអាចពង្រីកខ្លួនបានរហ័ស។
ខណៈដែលការទទួលស្គាល់របស់ Forbes គឺជាសមិទ្ធផលដ៏សំខាន់មួយ ក្រុមការងារបាននិយាយថា ការយកចិត្តទុកដាក់របស់ពួកគាត់នៅតែផ្តោតលើការពង្រីកប្រតិបត្តិការ និងធ្វើឲ្យការដឹកជញ្ជូនកាន់តែងាយស្រួលសម្រាប់អាជីវកម្មគ្រប់ទំហំនៅទូទាំងប្រទេសកម្ពុជា។
គូសបញ្ជាក់ផងដែរថា ឆ្នាំនេះជាឆ្នាំទី៩ ហើយដែលបញ្ជី Forbes 30 Under 30 Asia គឺជាបញ្ជីមួយដែលត្រូវបានគេគោរពឱ្យតម្លៃបំផុតនៅលើពិភពលោក ដោយមានអ្នកដែលធ្លាប់ទទួលបានកិត្តិយសកាលពីមុនរួមមាន Melanie Perkins (ស្ថាបនិក Canva), Harshil Mathur (Razorpay), Eric Gnock Fah (Klook), Tan Min-Liang (Razer) និងតារាល្បីៗលំដាប់ពិភពលោកដូចជា BTS ជាដើម។
