នាពេលបច្ចុប្បន្ននេះ បច្ចេកវិទ្យាកាន់តែរីកចម្រើនមែនទែនហើយ សូម្បីតែគ្រឿងចក្រសម្រាប់បម្រើក្នុងវិស័យកសិកម្មដូចជា ត្រាក់ទ័រអគ្គិសនីគ្មានមនុស្សបើករបស់ ចនឌារមួយនេះ មានថាមពលថ្មដល់ 1000kwh ស្មើនឹងថ្មរបស់រថយន្តអគ្គិសនី Ford F-150 Lighting ដល់ ៧ដង មិនត្រឹមតែប៉ុណ្ណោះគេក៏អាចបញ្ជាវាដោយស្វ័យប្រវត្តិបានថែមទៀតផង ។
បើយោងតាមការចុះផ្សាយពីគេហទំព័រ futurefarming បានឲ្យដឹងថា ក្រុមហ៊ុនចនឌារ បានបញ្ចេញនូវត្រាក់ទ័រជំនាន់ថ្មី Sesam 2 (Sustainable Energy supply for Agricultural Machinery 2 ) ដែលមានថាមពលផ្ទុកថ្មដល់ 1000Kwh ព្រមទាំងបំពាក់ជាមួយនឹងម៉ូទ័រអគ្គិសនីចំនួន ២ មានកម្លាំងសរុប 500Kw ឬ 680hp បើធៀបជាមួយនឹងត្រាក់ទ័រប្រើម៉ាស៊ីនម៉ាស៊ូតម៉ូដែល 5055E ដែលកំពុងចរាចណ៍នៅប្រទេសកម្ពុជាយើង ស្មើនឹង ១២ គ្រឿងឯណោះ ។
ម្យ៉ាងវិញទៀត ត្រាក់ទ័រមួយនេះ យើងអាចបញ្ជាដោយស្វ័យប្រវត្តិយ៉ាងស្រួល គ្រាន់តែបញ្ជាលើកុំព្យូទ័រដែលបានភ្ជាប់មកជាមួយមកស្រាប់ បើកលោកអ្នកពិបាកក្នុងការបញ្ជាពីចម្ងាយនោះ ចនឌារក៏មានកាប៊ីនកញ្ចក់ថ្លដូចទៅនឹងការបើកត្រាក់ទ័រធម្មតាអ៊ីចឹងដែរ។ ជាមួយគ្នានេះដែរ កាលពីឆ្នាំ២០១៦ ក្រុមហ៊ុនចនឌារ ក៏បានបញ្ចេញនូវត្រាក់ទ័រអគ្គិសនីជំនាន់ទី១ ហៅថា Sesam tractor ដែលកាលនោះ ថាមពលថ្មមានតែ 130Kwh បំពាក់ជាមួយនឹងម៉ូទ័រអគ្គិសនី ២ គ្រាប់ ដែលអាចផលិតកម្លាំងបាន 300kw ឬ 400hp ។
យ៉ាងណាមិញ ចំពោះការបង្កើតត្រាក់ទ័រអគ្គិសនីនេះ ត្រូវបានរចនាចេញពីផ្នែក គម្រោង GridCON 2 របស់ប្រទេសអាឡឺម៉ង់ ក្នុងគោលដៅធ្វើឲ្យការបំភាយឧស្ម័នពុលចេញពីចំហេះប្រេងឥន្ធន:ចំនួនសូនន្យពីគ្រឿងចក្រកសិកម្ម ។
គួរបញ្ជាក់ផងដែរថា សម្រាប់ត្រាក់ទ័រអគ្គិសនីនេះមិនទាន់បានដាក់បញ្ចេញលក់នៅឡើយទេ ប៉ុន្តែគេសង្ឃឹមថាអាចនឹងចេញលក់នៅឆាប់ៗនេះ ។ តើលោកអ្នកយល់យ៉ាងណាដែរចំពោះត្រាក់ទ័រអគ្គិសនីរបស់ ចនឌារ បើគេដាក់លក់នោះ គិតថាចង់ទិញមួយគ្រឿងទុកធ្វើកសិកម្មដែរឬយ៉ាងណា?សុំបញ្ចេញមតិបន្តិចមក៕
អត្ថបទដោយ៖ ព្រឹម ភក្តី
