នេះជា ឡានអគ្គិសនីទី១ កូនច្បងគេតែម្តងរបស់ Lexus ឈ្មោះថា RZ 450e ស៊េរីឆ្នាំ២០២៣ ដែលត្រូវបានបង្ហាញមុខនៅប្រទេសជប៉ុនកាលពីមួយហឹកមុន ហើយថ្មីៗនេះ វាក៏បានលេចមុខនៅប្រទេសថៃក្នុងកម្មវិធី Expo Motor show 2022 ហីខណ:ពេលនេះដែរ RZ 450e នៅអាមេរិកបានចេញតម្លៃច្បាស់ការមែនទែនហើយ ជាមួយតម្លៃហែកកេសចាប់ពី 59,650ដុល្លារ សម្រាប់ចម្ងាយរត់ 354Km ពោលគឺវាថ្លៃជាង Tesla Model Y ដែលតម្លៃត្រឹម 54,990ដុល្លារដែលមានចម្ងាយរត់ 530Km ទៅទៀត។
ហើយយោងតាមការចេញផ្សាយពីគេហទំព័រ Electrek បានឲ្យដឹងថា Lexus RZ 450e នេះ ជាឡានអគ្គិសនីទី១ របស់ក្រុមហ៊ុន Lexus តែម្តងប៉ុន្តែវាជាផលិតផលទី២ របស់ក្រុមហ៊ុនមេធំ Toyota Motor Corp ហើយក៏ត្រូវជាបងប្អូននឹង Toyota bz4x ដែលស្ថិតក្នុងត្រកូល Crown ។
Toyota Lexus ដូចជារាងយឺតយ៉ាវបន្តិចហើយ ក្នុងការផលិតឡានអគ្គិសនីទៅឲ្យពិភពលោក ខណ:ដែលក្រុមហ៊ុនផ្សេង គឺមានឡានអគ្គិសនី ៣ទៅ ៤ ម៉ូដែលក្នុងដៃរួចទៅហើយ បើធៀបពេលវេលាដែលខាងសភាអឺរ៉ុបបានធ្វើការក្រើនរំលឹកដល់បណ្តារក្រុមហ៊ុនយក្សដែលរកស៊ីលក់ឡានទាំងអស់លើពិភពលោក ជួយជម្រុញផ្តោតលើខ្សែសង្វាក់នៃការផលិតឡានអគ្គិសនីបានឲ្យច្រើន ដើម្បីកាន់ដៃគ្នាឆ្ពោះទៅកាន់អនាគតឆ្នាំ២០៥០ ពិភពលោកគ្មានយានយន្តប្រើម៉ាស៊ីនចំហេះប្រេងសាំង។
Lexus RZ 450e ជាប្រភេទឡានខ្នាត SUV អាចផ្ទុកមនុស្សបាន៦ ទៅ ៧ សម្រាប់មនុស្សពេញវ័យអ៊ីចឹងណា ។ បាណាខាងមុខរបស់វាត្រូវបានបិទជិត ខុសប្លែកពីឡានម៉ាស៊ីនសាំងដែលត្រូវការខ្យល់ចាំបាច់ ប្តូរមកវិញជា Logo Lexus ដ៏ស្រស់ស្អាត។ ចំណែកឯលើថ្ពាល់ឃួចសងខាងរបស់ RZ 450e នេះវិញមានអំពូល LED គុជ ១គ្រាប់ ជាមួយចង្អៀងប្រដេញរាងផ្លែសន្ទួច។ ចំណែកកន្ទុយឡានក្រោយនេះវិញ ត្រង់ស្តុបឡាននេះវារាងទ្រវែង ដែលពណ៌ជាប្រភេទពណ៌ Lava ឬកម្អែលភ្នំភ្លើងចឹង។
Lexus RZ 450e នេះត្រូវបាន Lexus ចាប់បំពាក់ជាមួយតួរថយន្តជាប្រភេទ e-TNGA Platform ដែលវាដូចនឹង Toyota bz4X ដែរ ពាក្យពេញរបស់វាបានមកពី (Electric Toyota New Global Architecture) ហើយបច្ចុប្បន្ននេះមានតែនៅលើឡានអគ្គិសនីទាំង២នេះទេ តែអនាគតយើងនឹងឃើញវាមានគ្រប់ម៉ូដែល ឡានអគ្គិសនីទាំងអស់របស់ Toyota និង Lexus ។
អ្វីដែលគួរឲ្យចាប់អារម្មណ៍ខ្លាំងនោះ គឺទៅលើចង្កូត ដែលមានលក្ខណ:ឌីហ្សាញដូចចង្កូតយន្តហោះចឹង មើលទៅវា Luxury មែនទែនត្រង់ចង្កូតនេះ រីឯអេក្រង់ touchscreen មួយផ្តែងធំនៅកណ្តាលនេះ វាមានទំហំ 14អ៊ីញ ព្រមទាំងមានប្រព័ន្ធសំឡេង ដែលហៅថាប៉ាសនោះ ដល់ទៅ 13 Speaker ថែមទាំងមានដំបូលជា panoramic sunroof អាចបើកកញ្ចក់បានជាដើម។
សម្រាប់ដំណើរការរត់លើដងវិធីផ្លូវជាតិ វាត្រូវដំណើរការកង់ទាំង៤ ឬប៉ុង២ ប្រើបច្ចេកវិទ្យា DIRECT4 ហើយក៏ត្រូវបានបំពាក់នូវម៉ូទ័រចំនួន២ គ្រឿងមុខក្រោយ ដោយផ្នែកខាងមុខមានម៉ូទ័រកម្លាំង 150Kw និងផ្នែកខាងក្រោយកម្លាំង 80kw សរុបមកបើផ្គួបកម្លាំងម៉ូទ័ររួមគ្នាវាអាចមានកម្លាំង 230Kw ឬ 313HP ។ ចំណែកឯអាគុយដែលខាងក្រោមឡាននេះវិញ មានទំហំ 71.4Kwh ដែលសាកថ្មពេញម្តង រត់បានចម្ងាយ 354Km ។
គួរជំរាបផងដែរថា ក្រុមហ៊ុន Lexus ប្រកាសបើកដំណើរការកក់នូវ RZ 450e ស៊េរី២០២៣ ហើយជាមួយតម្លៃ Trim level ប្រភេទ Premium ចាប់ពី 59 650ដុល្លារ និងប្រភេទ Luxerxy អាចឡើងដល់ 65,150ដុល្លារ ៕
អត្ថបទដោយ៖ ព្រឹម ភក្តី
