ក្រុមអ្នករចនាម៉ូតរថយន្តរបស់ក្រុមហ៊ុន Ford បានយករថយន្តដឹកអ៊ីវ៉ាន់ SuperVan មកកែច្នៃបំពាក់ជាមួយម៉ូទ័រអគ្គិសនីចំនួន ៤ គ្រឿង ធ្វើឲ្យឡានដឹកអ៊ីវ៉ាន់មួយនេះ កើនឡើងដល់ ១៩៧៣ សេះ សូម្បីតែឡានកំពូលរថយន្តទំនើបបំផុត តម្លៃ ៣លានដុល្លារ Bugatti Chiron មានកម្លាំងម៉ាស៊ីនតែ ១៥០០សេះ តែប៉ុណ្ណោះ ។
បើយោងតាមការចេញផ្សាយរបស់គេហទំព័រ BusinessInsider បានឲ្យដឹងថា ឡានដឹកអ៊ីវ៉ាន់នេះ គឺជារថយន្ត SuperVan ជំនាន់ទី ៤ ដែលក្រុមហ៊ុន Ford ចាប់ផ្តើមផលិតតាំងពីឆ្នាំ ១៩៧១ មកម្លេះ ដោយមុនដំបូងឡើង SuperVan ជំនាន់ទី១ ត្រូវបានបំពាក់ជាមួយនឹងម៉ាស៊ីនសាំង របស់រថយន្តប្រណាំង Ford G40 ដែលធ្លាប់ឈ្នះពានរង្វាន់ Le Mans ចាប់ពីឆ្នាំ ១៩៦០ ដល់ ឆ្នាំ ១៩៦៥ ។
ចំណែកឯ SuperVan ជំនាន់ទី២ ផលិតនៅឆ្នាំ ១៩៨៤ និង ជំនាន់ទី ៣ ត្រូវបានផលិតនៅឆ្នាំ ១៩៩៤ ដែលបានប្តូរម៉ាស៊ីនរបស់ G40 មកប្រើជាមួយនឹងម៉ាស៊ីនសាំងរបស់ Formula 1 វិញម្តង រហូតមក Supervan ទី៤ ត្រូវបានគេបំពាក់ជាមួយនឹងម៉ូទ័រអគ្គិសនីសុទ្ធចំនួន ៤ គ្រាប់ ដែលអាចបង្កើតកម្លាំងសរុប ១៩៧៣ សេះ ។
តួយ៉ាងរូបរាងផ្នែកខាងក្រៅត្រូវបានកែច្នៃបន្តិចបន្តួចពី ជំនាន់មុនៗ ដោយគ្រាន់តែបន្ថែមទឹកថ្នាំពណ៌ និងតែមខ្លះ ព្រមទាំងឌីហ្សាញចំណុចខ្លះ ឲ្យមើលទៅទំនើបជាងមុន ប្រៀបបានទៅនឹងឡានប្រណាំងអ៊ីចឹងដែរ ។
រីឯផ្នែកខាងក្នុងវិញនោះ ត្រូវបានឌីហ្សាញមានភាពរញ៉ែរញ៉ាយដូចទៅនឹងឡានប្រណាំងទៅ ប៉ុន្តែចំណុចគួរឲ្យចាប់អារម្មណ៍នោះ ទៅលើអេក្រង់ Touchscreen ដែលត្រូវបានខ្ចីពី F-150 lightning ៕
គួរជំរាបផងដែរ សម្រាប់ Supervan ជំនាន់ទី៤ មួយនេះមិនត្រូវបានអនុញ្ញាតឲ្យលក់នៅស្រុកកំណើតខ្លូនទេ (USA) ហើយតម្លៃក៏គេមិនទាន់បង្ហាញជាផ្លូវការនៅឡើយដែរ ៕
អត្ថបទដោយ ៖ ព្រឹម ភក្តី
