បើនិយាយទៅដល់ microSD Card អ្នកប្រាកដជាបានស្គាល់មកហើយថាវាគឺជា ឧបករណ៍ផ្ទុកទិន្នន័យដ៏តូចមួយសម្រាប់ញាត់បញ្ចូលទៅក្នុងទូរស័ព្ទ កាមេរ៉ា ឬឧបករណ៍ប្រើប្រាស់ផ្សេងៗទៀតដើម្បីផ្ទុកទិន្នន័យប៉ុន្តែវាអាចផ្ទុកបានក្នុងទំហំដ៏តូចមួយតែប៉ុណ្ណោះ ដោយឡែកកាលពីពេលថ្មីៗក្រុមហ៊ុនរបស់អាមេរិក Micron បានបញ្ចេញ microSD Card ដំបូងបំផុតលើលោកដែលអាចផ្ទុកទិន្នន័យបានរហូតទៅដល់ 1.5TB ។
ចំពោះ microSD Card ដែលមានសមត្ថភាពដាក់ទិន្ន័យដ៏ច្រើនបែបនេះគឺត្រូវបានគេហៅវាថា i400 ដោយគេបានរចនាវាឡើងយ៉ាងពិសេសសម្រាប់ការផ្ទុកទិន្នន័យវីដេអូដែលយកចេញពីកាមេរ៉ាសុវត្ថិភាពជាមួយនឹងគុណភាពក៏ដូចសមត្ថភាពនៃដំណើរការខ្លាំងជាងមុនផងដែរ។
លើសពីនេះទៅទៀត microSD Card i400 មួយនេះមានសមត្ថភាពក្នុងការផ្ទុកទិន្នន័យវីដេអូដែលទទួលបានពីកាមេរ៉ាសុវត្ថិភាពរហូតដល់ 4ខែឬ 120ថ្ងៃឯណោះ។ ហើយអ្វីដែលកាន់តែពិសេសទៅទៀតនោះ i400 មានគុណភាពរហូតដល់5ឆ្នាំក្នុងការថតរយៈពេល24ម៉ោងក្នុងមួយសប្តាហ៍បន្តជាប់គ្នារហូត។
មិនតែប៉ុណ្ណោះវាក៏មានសមត្ថភាពក្នុងការចាប់យកវីដេអូក្នុងកម្រិត 4K ហើយអាចទទួលនូវយកនូវការចាប់យកសកម្មភាពរបស់ AI ចំនួន8ផ្សេងៗគ្នា ដូចជាការចាប់សម្គាល់វត្ថុ ចាប់សម្គាល់ស្លាកលេខ និងសម្គាល់មុខជាដើម។
យ៉ាងណាមិញ ក្រុមហ៊ុន Micron នៅមិនទាន់បានបញ្ចេញអំពីដំណឹងថានឹងដាក់ឱ្យប្រើប្រាស់នៅពេលណាដែរ រួមជាមួយនឹងតម្លៃក៏មិនទាន់បានបង្ហាញថាវាមានតម្លៃថ្លៃប៉ុណ្ណានោះដែរ ប៉ុន្តែបើគេចេញលក់ជាផ្លូវការតើអ្នកហ៊ានចាយលុយដើម្បីទិញវាយកមកប្រើទេ?
អត្ថបទដោយ៖ រិន មករា