អ្នកដែលចូលចិត្តជាមួយនឹងស្មាតហ្វូនប្រភេទ Gaming គឺប្រាកដជាបានដឹងរួចមកហើយថាក្រុមហ៊ុន ASUS មានស្មាតហ្វូនមួយប្រភេទគឺត្រកូល ROG Phone (Republic of Gaming) ដោយវាមានសមត្ថភាពខ្លាំងរួមជាមួយនឹងរូបរាងប្លែកពីស្មាតហ្វូនធម្មតា ជាក់ស្តែងបើតាមការចុះផ្សាយរបស់ GSMARENA ASUS ROG 6 នឹងចេញនៅថ្ងៃទី5 ខែកក្កដា ខាងមុខនេះហើយ។
ចំពោះ ASUS ROG 6 ដែលត្រៀមនឹងចេញនេះគឺគេរំពឹងថាវានឹងក្លាយជាស្មាតហ្វូនដំបូងដែលបំពាក់មកជាមួយនឹងឈីប Snapdragon 8+ Gen 1 លើសពីនេះទៅទៀតវាអាចនឹងមាន RAM 16GB កញ្ចក់អេក្រង់ AMOLED 6.78អិញ ជាមួយនឹង Refresh Rate 165Hz ផងដែរ។ មិនតែប៉ុណ្ណោះវាក៏អាចញាត់ថ្មទំហំ 6000mAh ចូល រួមជាមួយនឹងល្បឿនសាក 65W។
យ៉ាងណាមិញក្រៅពីកម្លាំងនិងសមត្ថភាពរបស់ ROG 6 យើងឃើញថាការលេចធ្លាយនូវរូបរាងនៃ ASUS ROG 6 ថ្មីនេះគឺវាបង្ហាញឱ្យឃើញនូវរាងកាន់តែកាចជាងមុនជាពិសេសស្រោមការពារដែលព័ទ្ធជុំវិញកាមេរ៉ានិងកង្ហារត្រជាក់ AeroActive cooler ដើម្បីជំនួយពេលលេងហ្គេមថែមទៀតផង។
លើសពីនេះទៅទៀតសម្រាប់ ROG 6 គឺនៅតែរក្សាទម្រង់នៃការ Design ដដែលដោយមិនមានឆកនៅផ្នែកខាងលើនោះទេពោលគឺទុកកន្លែងសម្រាប់ដាក់កាមេរ៉ាតែម្តង។ ចំពោះផ្នែកខាងឆ្វេងវិញគឺភ្ជាប់មកជាមួយនឹងរន្ធ USB មួយនិងរន្ធសម្រាប់ដាក់ស៊ីមមួយ ហើយខាងស្តាំនៃតួទូរស័ព្ទគឺមានជាមួយនឹងប៊ូតុង2សម្រាប់បញ្ជាពេលលេងហ្គេមស្ថិតនៅសងខាងនៃកង្ហារ។
ប៉ុន្តែទោះបីជាយ៉ាងណាក៏ដោយ ចំពោះតម្លៃវិញគឺយើងមិនទាន់ដឹងច្បាស់ថាវានឹងលោតដល់ប៉ុន្មានដែរ ហើយសម្រាប់អ្នកទាំងអស់គ្នាវិញប្រសិនបើ ASUS ROG 6 មកដល់ខ្មែរតើហ៊ានដកលុយពីហោប៉ៅទិញវាទេ?
អត្ថបទដោយ៖ រិន មករា