នេះគឺជារឿងដ៏គួរឱ្យសរសើរមួយ ដោយយុវជនខ្មែរមួយរូប គឺលោក ប៉ាង វរៈ ឧត្តម អាចបង្កើតនូវផ្លែតហ្វមបង្រៀនមេរៀនសរសេរកូដកម្មវិធីជាភាសាខ្មែរឈ្មោះ Uddompang.com ដែលមានសិស្សចូលរៀនជាង២០០នាក់ជាង និងមានសិស្សជាច្រើចូលរៀនជាបន្ដបន្ទាប់ ខណៈជំនាញសរសេរកូដកម្មវិធី គឺជាជំនាញដែលកំពុងតែមានតម្រូវការទីផ្សារមួយ នៅក្នុងពេលបច្ចុប្បន្ននេះផងដែរ។
នៅក្នុងបទសម្ភាសន៍ជាមួយក្រុមការងារ Technology Cambodia លោក ប៉ាង វរៈ ឧត្តម បានឱ្យដឹងថា ខ្លួនបានចាប់ផ្ដើមរៀនសរសេរកូដតាំងតែពីរៀនថ្នាក់ទី១០ មកម្លេះ ដែលធ្វើឱ្យលោកមានសមត្ថភាព អាចសរសេរកូដបង្កើតកម្មវិធី វេបសាយ និង App ផ្សេងៗបាន។ ហើយបច្ចុប្បន្ននេះលោកកំពុងតែរៀនបន្ដនូវជំនាញវិទ្យាសាស្រ្ដកុំព្យូទ័រ ឆ្នាំទីនៅឯងសាកលវិទ្យាល័យមួយនៅក្នុងប្រទេសអូស្រ្ដាលីផងដែរ។
លោក ប៉ាង វរៈ ឧត្តម បានឱ្យដឹងទៀតថា មូលហេតុដែលោកបង្កើតផ្លែតហ្វម Uddompang.com នេះឡើងគឺដោយសារតែ លោកមើលឃើញថា បច្ចុប្បន្ននេះ មានមនុស្សជាច្រើនចង់ចាប់ផ្ដើមរៀនសរសេរកូដ ប៉ុន្ដែអ្វីដែលជាបញ្ហា គឺមេរៀនសរសេរកូដទាំងអស់នោះ ភាគច្រើនមានតែមេរៀនជាភាសាអង់គ្លេស មិនសូវមានជាភាសាខ្មែរនោះឡើយ ហេតុនេះហើយកាលពីឆ្នាំ២០២២ កន្លងទៅនេះលោកក៏បានសម្រេចចិត្តបង្កើតផ្លែតហ្វម Uddompang.com ឡើងមក ដោយមានគោលដៅក្នុងការផលិតមេរៀនសរសេរកូដខ្លីខ្លឹមងាយយល់ ទៅតាមកម្រិយនីមួយៗ និងមានតម្លៃសមរម្យដែលមនុស្សទូទៅអាចមានលទ្ធភាពចូលរៀនបាន ពោលគឺចំណាយត្រឹមតែ ៩.៩៩ដុល្លារប៉ុណ្ណោះក្នុងមួយខែ។
លោក ប៉ាង វរៈ ឧត្តម បានឱ្យដឹងទៀតថា បច្ចុប្បន្ននេះ តាមរយៈផ្លែតហ្វមរបស់លោកមានសិស្សរហូតដល់ទៅជាង ២០០នាក់ និងមានអ្នកបន្ដធ្វើការចុះឈ្មោះចូលរៀនជាងរៀងរាល់ថ្ងៃ។ ហើយអ្វីដែលកាន់តែពិសេស សម្រាប់ការផ្លែតហ្វមរៀនកូដ Uddompang.com ត្រូវបានទទួលស្គាល់ដោយ បណ្ឌិត Ng Tek Ming ដែលជាសាស្ត្រាចារ្យរង និងព្រឹទ្ធបុរសផ្នែកព័ត៌មានវិទ្យា នៃសាកលវិទ្យាល័យអាមេរិកាំងភ្នំពេញ (AUPP) ថាជាផ្លែតហ្វមដែលគួរឱ្យទុកចិត្ត និងមានប្រសិទ្ធិភាពបំផុតមួយសម្រាប់ការរៀនសរសេរកូដអនឡាញ ដែលសិស្សនិស្សិតកម្ពុជាជាច្រើនបានបង្ហាញពីការពេញចិត្តទៅលើវគ្គសិក្សានៅលើផ្លែតហ្វម Uddompang.com។
គួរជម្រាបផងដែរថា បច្ចុប្បន្ននេះ ក្រៅពីការបង្កើតផ្លែតហ្វមបង្រៀនសរសេរកូដ លោក ប៉ាង វរៈ ឧត្តម ក៏ជាអ្នកផលិតមាតិកាមួយរូបផងដែរ។ ដោយភាគច្រើនលោក ផលិតវីដេអូពាក់ព័ន្ធនឹងបច្ចេកវិទ្យា ក៏ដូចជាការសរសេរកូដផ្សេងៗ តាមរយៈហ្វេសប៊ុកផេក Uddom Pang និង TikTok ឈ្មោះ uddomp។ ដោយឡែកប្រសិនបើអ្នកចង់រៀនពីរបៀបសរសេរកូដ ជាមួយនឹងវគ្គសិក្សា ខ្លីខ្លឹម ងាយយល់ និងមានតម្លៃសមរម្យ អាចចូលទៅកាន់គេហទំព័រ Uddompang.com ឬអាចចូលទៅកាន់ហ្វេសប៊ុកផេក Uddom Site៕
អត្ថបទដោយ៖ ម៉ម ណាវ៉ាសិរិ (Tel: 0966034563 | Telegram: @Navasiri)