ការិយាល័យរបស់ក្រុមហ៊ុន Tesla ស្ថិតក្នុងរដ្ឋកាលីហ្វញ៉ាសហរដ្ឋអាមេរិក ត្រូវបានបិទទ្វារ ដោយរួមទាំងបញ្ឈប់ការងារបុគ្គលិកផ្នែក Autopilot ប្រមាណ ២០០នាក់ចេញ គ្មានស្ដាយស្រណោះបន្ដិចឡើយ ទោះបីជាបុគ្គលិកទាំងនោះ ប្រឹងប្រែងធ្វើការងារឱ្យក្រុមហ៊ុនបានយ៉ាងល្អក៏ដោយ។ នេះបើយោងតាមការចុះផ្សាយរបស់ fox business។
ភាគច្រើននៃបុគ្គលិកដែលត្រូវបានក្រុមហ៊ុន Tesla បញ្ឈប់នេះសុទ្ធតែបាន ចូលរួមចំណែកក្នុងការធ្វើប្រព័ន្ធជំនួយដល់ការបើកបរ ឬ Autopilot មានភាពល្អប្រសើរ។ ប្រភពដដែលបានបន្តថា មានបុគ្គលិកជាងពាក់កណ្ដាលនៅក្នុងការិយាល័យនេះ ត្រូវបានលុបចោលនូវរាល់ការងាររបស់ពួកគេ ហើយបុគ្គលិកដែលនៅសេសសល់ នឹងត្រូវផ្លាស់ប្ដូរទៅកាន់ការិយាល័យផ្សេងទៀត ដើម្បីបិទទ្វាការិយាល័យនៅតំបន់ San Mateo ក្នុងរដ្ឋកាលីហ្វរញ៉ាចោលតែម្ដង។
ការផ្លាស់ប្ដូរនេះបានធ្វើឡើង បន្ទាប់ពីលោក Elon Musk បាននិយាយថា “ខ្ញុំមានអារម្មណ៍មិនល្អចំពោះសេដ្ឋកិច្ច”។ ចាប់តាំងពីពេលនោះមក លោក Elon Musk បានបញ្ជាឱ្យអ្នកគ្រប់គ្រងក្នុងក្រុមហ៊ុន Tesla ត្រូវតែផ្អាកការជួលបុគ្គលិកទាំងអស់នៅទូទាំងពិភពលោក។ យ៉ាងណាមិញ ការធ្វើនេះ កើតឡើងស្របពេលកំពុងមានការព្រួយបារម្ភកាន់តែខ្លាំង អំពីវិបត្តិសេដ្ឋកិច្ចដែលអាចកើតមាន។
គួរជម្រាបថា ឥឡូវនេះរោងចក្រផលិតឡាន Tesla នៅក្នុងរដ្ឋតិចសាស និងប្រទេសអាឡឺម៉ង់ កំពុងតែខាតបង់លុយអស់រាប់ពាន់លានដុល្លារ ដែលបណ្ដាលមកពីបញ្ហាខែសង្វាក់ផ្គត់ផ្គង់ នឹងប៉ះពាល់ដល់ការផលិតរថយន្តធ្ងន់ធ្ងរ។ ស្របពេលជាមួយគ្នានេះដែរ រោងចក្រពីរទាំងដែលស្ថិតនៅ Berlin និង Austin ក៏ត្រូវបានលោក Elon Musk ចាត់ទុកថាជាចង្រ្កានដុតលុយដ៏ធំមួយដែរ ខណៈលុយរាប់ពាន់លានដុល្លារត្រូវបានខាតបង់ ក្នុងរោងចក្រទាំង២ខាងលើនេះ។
គួររំលឹកបន្តិចថា៖ បញ្ហាដែលធ្វើឱ្យប៉ះពាល់ដល់ខ្សែសង្វាក់ផ្គត់ផ្គង់នេះ គឺបណ្ដាលមកពីការដឹងជញ្ជូនគ្រឿងអាគុយ និងគ្រឿងបង្គំផ្សេងៗពីប្រទេសចិន មានភាពយឺតយាវ ព្រោះកាលពីដើមឆ្នាំ២០២២កន្លងទៅ ប្រទេសចិនបានបិទខ្ទប់ប្រទេសដោយសារការរីលរាលដាលនៃវីរុសកូវីដ១៩។
អត្ថបទដោយ៖ ផែន ផាន់ណា