អ្នកប្រើ Telegram នៅកម្ពុជាទាំងអស់ប្រហែលជាដឹងហើយថា នៅសុកៗស្រាប់តែត្រូវបានគេ Add ចូលទៅក្នុងគ្រុបប្លែកៗដែលមិនស្គាល់ហើយក្នុងគ្រុមនោះ មានសមាជិកជាច្រើននាក់។ មែនទែនទៅក្រៅពីគោលដៅផ្សព្វផ្សាយពាណិជ្ជកម្ម ឬក៏បង្កើតជាសហគមន៍ ជជែកពីអ្វីមួយ អនាគតអ្នកដែលមាន Channel ឬ Group ធំៗនៅលើ Telegram គឺអាចរកលុយក្នុងពេលឆាប់ៗខាងមុខ។
ជាក់ស្ដែង បើតាមការចុះផ្សាយរបស់គេហទំព័រ Feedough បានឱ្យដឹងថា បច្ចុប្បន្ននេះ Telegram រកចំណូលបានពីការបរិច្ចាគ របស់មហាជន និងស្ថាប័នធំៗផ្សេងៗជាច្រើនដែលប្រើប្រាស់ Telegram។ ហើយមួយផ្នែកទៀតគឺបានមកពីវិនិយោគគិន។
ថ្វីត្បិតតែ Telegram ត្រូវបានបង្កើតឡើងក្នុងគោលដៅបម្រើដល់មនុស្សលោកក្នុងន័យសប្បុរធម៌ក៏ពិតមែន ប៉ុន្ដែការរស់ដោយពឹងលើការបរិច្ចាគពីគេ ប្រហែលជាមិនអាចធ្វើឱ្យ Telegram អាចរីកចម្រើនបានយូរអង្វែងទៅ អនាគតនោះទេ ហេតុនេះ Telegram កាលពីឆ្នាំ២០២១ កន្លងទៅថ្មីៗនេះ Telegram បានគិតគូរពីគម្រោង រកចំណូលបន្ថែមចូលក្រុមហ៊ុន តាមរយៈការផ្សាយពាណិជ្ជកម្មនៅតាម Group និងតាមឆានែលធំៗដែលមានសមាជិកច្រើន ហើយចំណែកឯម្ចាស់គ្រុបនិង Channel ទាំងនោះក៏អាចបានចំណូលផងដែរ។
គម្រោងចេញផ្សព្វផ្សាយពាណិជ្ជកម្មនេះគឺកំពុងតែស្ថិតនៅក្នុងការពិចារណាតែប៉ុណ្ណោះ ប៉ុន្តែវាក៏ជាដំណឹងល្អមួយផងដែរសម្រាប់ម្ចាស់ Group និង Chanel ធំៗដែលមានសមាជិកច្រើន ពោលគឺគាត់អាចនឹងទាញចំណូលបាន បើសិនជា Telegram ពិតជាចេញគោលការណ៍ផ្សាយពាណិជ្ជកម្មពិតមែន។ ប៉ុន្ដែយ៉ាងណាក៏ដោយ គម្រោងមួយនេះទំនងជាអាចនឹងកើតឡើង ខណៈ Telegram ត្រូវការចំណូលសម្រាប់ផ្គត់ផ្គង់ក្រុមហ៊ុន។
គួរជម្រាបងផងដែរថា បច្ចុប្បន្ននេះ Telegram មានអ្នកប្រើប្រាស់សរុបប្រមាណ ៥០០លាននាក់ ខណៈ Telegram បានជាប់ជាកម្មវិធីផ្ញើសារលេខ១ នៅកម្ពុជាក្នុងចំណោមកម្មវិធីដទៃទៀតប្រចាំឆ្នាំ២០២១៕
