កំណើននៃអ្នកឆបោកតាមប្រព័ន្ធអនឡាញ ហាក់មានការកើនឡើងច្រើន ជាពិសេសគឺអ្នកបបួលវិនិយោគដាក់លុយ ដោយសន្យាខ្យល់ថានឹងផ្ដល់ប្រាក់ចំណេញនៅពេលជាក់លាក់ណាមួយ។ ចំពោះបញ្ហានេះផ្សារមូលបត្រកម្ពុជា ក៏បានអំពាវនាវដល់ប្រជាជនខ្មែរទាំងអស់ឱ្យមានការប្រុងប្រយ័ត្នផងដែរ។
ថ្មីៗនេះផ្សារមូលបត្រកម្ពុជាបានប្រកាសថា “សូមវិនិយោគិនទាំងអស់ប្រុងប្រយ័ត្នចំពោះសារអេឡិចត្រូនិចនានាដែលព្យាយាមក្លែងបន្លំអត្តសញ្ញាណ និងគ្មានប្រភពច្បាស់លាស់។ ពុំមានការវិនិយោគណាដែលអាចសន្យាផ្តល់ប្រាក់ចំណេញច្រើនក្នុងរយៈពេលខ្លីដោយគ្មានហេតុផលច្បាស់លាស់ឡើយ។”
អាស្រ័យហេតុនេះសូមបងប្អូនទាំងអស់ មេត្តាជ្រាបជាព័ត៌មាន និងមានការប្រុងប្រយ័ត្នឱ្យបានខ្ពស់ អំពីព័ត៌មាននៃការវិនិយោគជាច្រើនលើប្រព័ន្ធអនឡាញ ដោយមិនស្គាល់គេច្បាស់ ឬមិនយល់ពីវិស័យដែលខ្លួនវិនិយោគ ព្រោះវាអាចធ្វើឱ្យយើងខាតបង់ថវិកាដែលរកបានមកដោយលំបាក៕
អត្ថបទដោយ៖ ផែន ផាន់ណា
