ការចុះហត្ថលេខាខាងលើនេះ ត្រូវបានលោក Liang Hua ប្រធានក្រុមហ៊ុន Huawei បានប្រកាសពីការសម្រេចចិត្ត នៅក្នុងវេទិកានិរន្តរភាពឆ្នាំ ២០២២ (2022 Sustainability Forum) របស់ក្រុមហ៊ុន Huawei ដែលត្រូវបានបានធ្វើឡើងក្រោមប្រធានបទ ការតភ្ជាប់ និងការនវានវត្តន៍ ដើម្បីកើតមានឥទ្ធិពលវិជ្ជមានក្នុងសង្គម (Connectivity+: Innovate for Impact) ។

ជាមួយគ្នានេះដែរ សម្រាប់វាគ្មិននៅក្នុងព្រឹត្តិការណ៍នេះ រួមមានថ្នាក់ដឹកនាំជាន់ខ្ពស់មកពី ITU អង្គការសហប្រជាជាតិ រដ្ឋមន្ត្រីទូរគមនាគមន៍ និងនិយតករមកពីបណ្ដារប្រទេសជាច្រើនដូចជា ប្រទេសកម្ពុជា នីហ្សេរីយ៉ា បង់ក្លាដែស និងប៉ាគីស្ថាន និងអ្នកដឹកនាំធុរកិច្ច ដៃគូសហការ អ្នកជំនាញ និងអតិថិជនមកពីប្រទេសចិន អាហ្រ្វិកខាងត្បូង បែលហ្សិក និងអាល្លឺម៉ង់ផងដែរ។

លោក Liang Hua ប្រធានក្រុមហ៊ុន Huawei បានលើកឡើងថា ការជួយឱ្យប្រជនជននៅតំបន់ដាច់ស្រយាលចូលដល់អ៊ីនធឺណិត គឺជាជំហានដំបូងក្នុងការជួយផ្លាស់ប្ដូរជីវិតរបស់ពួកគេឱ្យកាន់តែប្រសើរឡើង ពោលគឺពួកគេនឹងអាចភ្ជាប់ទៅកាន់ពិភពឌីជីថល ដែលអាចមានលទ្ធភាពក្នុងការទទួលបានព័ត៌មាន អាចរៀនសូត្រចំណេះជំនាញថ្មីៗ ជាមួយនឹងឯកសារគ្មានដែនកំណត់ អាចទំនាក់ទំនងជាមួយមនុស្សជុំវិញពិភពលោក  និងឱកាសធ្វើអាជីវកម្មកាន់តែទូលំទូលាយ។

ដោយឡែក បើតាម លោក Cao Ming ប្រធានក្រុមហ៊ុន Huawei Wireless Solution បានលើកឡើងថា គម្រោងបច្ចេកវិទ្យា RuralStar របស់ក្រុមហ៊ុន Huawei បានជួយឱ្យមនុស្សជាង៦០លាននាក់ រស់នៅតំបន់ដាច់ស្រយាលនៅក្នុងជាង៧០ប្រទេសចូលដល់អ៊ីនធឺណិត។ ហើយបច្ចុប្បន្ននេះ Huawei កំពុងតែបន្ដធ្វើការទៅលើគម្រោងមួយនេះ ដើម្បីជួយឱ្យប្រជាជននៅក្នុងតំបន់ដាច់ស្រយាលជុំវិញពិភពលោកចូលដល់ឱកាសដូចអ្នកដទៃ តាមរយៈការចូលដល់អ៊ីនធឺណិត។

គួរជម្រាបផងដែរថា ក្រុមហ៊ុន Huawei Technology បានប្រកាសប្ដេជ្ញាចិត្តបន្ដជួយប្រជាជននៅតំបន់ជនបទ ១២០លាននាក់ នៅក្នុង៨០ប្រទេស ឱ្យចូលដល់អ៊ីនធឺណិតនៅក្នុងឆ្នាំ២០២៥។

ដោយឡែកសម្រាប់ប្រទេសកម្ពុជា ដែលជាដៃគូរសហការក្នុងគម្រោង P2C ដំបូងបង្អស់របស់ ITU ខាងក្រុមហ៊ុន​ Huawei នឹងធ្វើការជាមួយនឹងក្រសួងប្រៃសណីយ៍ និងទូរគមនាគមន៍ និងសាកលវិទ្យាល័យនានារបស់កម្ពុជា ដើម្បីផ្តល់ឱកាសបណ្តុះបណ្តាលសម្រាប់សិស្ស ១០០០០នាក់ ទៅលើជំនាញផ្នែក ICT ក្នុងរយៈពេល ៥ឆ្នាំខាងមុខនេះ៕