យោងតាមការចុះផ្សាយរបស់សារព័ត៌មាន Bloomberg បានឱ្យដឹងថា តុលាការកូរ៉េខាងត្បូងបានចេញដីកាចាប់ខ្លួនលោក Do Kwon ដែលជាសហស្ថាបនិកក្រុមហ៊ុន Terraform Labs (TFL) ដែលជាអ្នកបង្កើតកាក់គ្រីបតូ LUNA និងកាក់ Stablecoin ឈ្មោះ UST ដែលចាប់ផ្ដើមការដួលរលំកាលពីខែ ឧសភា ឆ្នាំ២០២២ កន្លងមក។
ប្រភពដដែលបានឱ្យដឹងទៀតថា ក្រៅពីចេញដីការចាប់ខ្លួនលោក Do Kwon តុលាការទីក្រុងសេអ៊ូកក៏បានចេញដីកាចាប់ខ្លួនមនុស្ស ៥នាក់ផ្សេងទៀត រួមមានទាំងលោក Nicholas Platias ដែលជាសហស្ថាបនិកក្រុមហ៊ុន Terraform Labs ពីបទបំពានច្បាប់ទីផ្សារមូលធនរបស់ប្រទេស។
ជាមួយគ្នានេះដែរ បច្ចុប្បន្ននេះ លោក Do Kwon និងជនជាប់ចោទទាំង៥រូបផ្សេងទៀត ត្រូវបានគេដឹងថាកំពុងតែរស់នៅក្នុងប្រទេសសិង្ហបុរីនៅឡើយ ខណៈដីការកោះចាប់ខ្លួននេះ មានសុពលភាពរយៈពេល១ឆ្នាំ ហើយរដ្ឋអាជ្ញាកូរ៉េសង្ឃឹមថា នឹងមានការសហការរវាងនឹងស្ថាប័នប៉ូលីសឧក្រិដ្ឋកម្មអន្តរជាតិ (Interpol) ក្នុងការចាប់អនុវត្តច្បាប់ចាប់ខ្លួនលោក Do Kwon ដែលជាជនសង្ស័យរស់នៅក្នុងប្រទេសសិង្ហបុរី។
គួរជម្រាបផងដែរថា បញ្ហាទាំងអស់នេះ បានកើតឡើងក្រោយពីកើតមានការដួលរលំនូវប្រព័ន្ធអេកូឡូស៊ីរបស់ Terra និងកាក់ Stablecoin (UST) នៅខ្ទង់ពាក់កណ្ដាលខែ ឧសភា ឆ្នាំ២០២២។ ហើយការដួររលំនេះ បានធ្វើឱ្យក្រុមហ៊ុន Terraform Labs (TFL) ដែលមានតម្លៃរាប់លានដុល្លារ ដែលសហគ្រិនវ័យក្មេងកូរ៉េ លោក Do Kwow ខំកសាងយ៉ាងលំបាក បានដួលរលំត្រឹមមួយពព្រិចភ្នែក។ លើសពីនេះទៅទៀត ការដួលរលំនៃអាណាចក្រគ្រីតូមួយនេះ ក៏បានជះឥទ្ធិពលអវិជ្ជមានយ៉ាងធ្ងន់ធ្ងរដល់ទីផ្សារគ្រីបតូទូទាំងពិភពលោកមកទល់នឹងសព្វថ្ងៃនេះផងដែរ៕
