រថយន្តអគ្គិសនី Seagull របស់ក្រុមហ៊ុន BYD ដែលជារថយន្តអគ្គិសនីដែលមានតម្លៃទាបមួយរបស់ក្រុមហ៊ុននេះ បានក្លាយជារថយន្តលក់ដាច់បំផុតនៅប្រទេសចិនក្នុងខែមុន ដោយលក់បានជិត 41,000 គ្រឿង ជាមួយនឹងតម្លៃទាបជាង 10,000 ដុល្លារ ហើយជោគជ័យរបស់ Seagull កំពុងតែបង្កការព្រួយបារម្ភដល់ក្រុមហ៊ុនផលិតរថយន្តអាមេរិកផងដែរ។
កាលពីខែសីហា ក្រុមហ៊ុន BYD បានលក់រថយន្តថាមពលថ្មីចំនួន 373,000 គ្រឿង ដែលរួមមានម៉ូដែលអគ្គិសនីពេញលេញចំនួន 148,470 គ្រឿង។ Seagull បាននាំមុខគេក្នុងតារាងលក់នៅប្រទេសចិន ដោយលក់បាន 40,949 គ្រឿង ដែលជាខែទី 6 ជាប់ៗគ្នាហើយដែលវាជារថយន្តអគ្គិសនីសុទ្ធលក់ដាច់បំផុតក្នុងថ្នាក់ A00។ រថយន្តអគ្គិសនី Seagull មានជម្រើសថ្មពីរប្រភេទ ដែលអាចបើកបរបានរហូតដល់ ៤០៥គីឡូម៉ែត្រ និងមានការរចនាដឹកនាំដោយអតីតអ្នករចនារបស់ Lamborghini លោក Wolfgang Egger។
ក្រុមហ៊ុន BYD កំពុងពង្រីកវិសាលភាពរបស់ Seagull ទូទាំងពិភពលោក ដោយលក់វាក្រោមឈ្មោះ Dolphin Mini នៅប្រទេសដូចជាប្រេស៊ីល និងម៉ិកស៊ិក ដែលតម្លៃចាប់ផ្តើមប្រហែល 20,000 ដុល្លារ។
Seagull ក៏រំពឹងថានឹងចូលទីផ្សារអឺរ៉ុបផងដែរ ដោយមានតម្លៃចាប់ផ្តើមទាបជាង 20,000 អឺរ៉ូ (21,500 ដុល្លារ) ធ្វើឱ្យវាក្លាយជារថយន្តអគ្គិសនីដែលមានតម្លៃទាបបំផុតមួយនៅអឺរ៉ុប។ ទោះបីជាមានប្រជាប្រិយភាពយ៉ាងណាក៏ដោយ BYD មិនមានគម្រោងណានាំ Seagull ចូលទីផ្សារសហរដ្ឋអាមេរិកទេ ទោះបីជានៅតែបន្តលក់រថយន្តក្រុងអគ្គិសនីនៅទីនោះក៏ដោយ។
ទោះជាយ៉ាងណា Seagull កំពុងទទួលបានការគាំទ្រនៅក្នុងទីផ្សារដូចជាអាស៊ីអាគ្នេយ៍ ម៉ិកស៊ិក និងអាចនឹងកាណាដាផងដែរ ខណៈដែលវាបង្កការប្រកួតប្រជែងយ៉ាងខ្លាំងដល់ក្រុមហ៊ុនផលិតរថយន្តប្រពៃណីនៅទូទាំងពិភពលោក។
ប្រវត្តិរបស់ BYD ក្នុងនាមជាក្រុមហ៊ុនផលិតថ្មផ្តល់ឱ្យពួកគេនូវភាពប្រកួតប្រជែងដោយមានខ្សែសង្វាក់ផ្គត់ផ្គង់ដ៏រឹងមាំ។ ក្រុមហ៊ុននេះមានគោលដៅដណ្តើមយកចំណែកទីផ្សារពីរថយន្តដែលប្រើម៉ាស៊ីនចំហេះក្នុង។
